«بۇگىن قازاقستاندا العاش رەت اۋىل اكىمدەرىنىڭ تىكەلەي سايلاۋى وتۋدە. بۇل – پرەزيدەنت ايتقانداي، ەلىمىزدە ساياسي جاڭعىرۋدىڭ جاڭا كەزەڭىن اشاتىن وتە ماڭىزدى ءسات.
مەملەكەت باسشىسى وتكەن جىلعى جولداۋىندا اكىمدەردى تىكەلەي سايلاۋ تۋرالى باستاما كوتەرگەن بولاتىن. ناتيجەسىندە، ونى ۇسىنعاننان باستاپ ناقتى ىسكە اسىرىلعانعا دەيىن ءبىر جىلدان از ۋاقىت ءوتتى.
اۋىل اكىمدەرىن سايلاۋ ازاماتتارعا ءوز ەلدى مەكەندەرىنىڭ دامۋىنا تىكەلەي ىقپال ەتۋگە جاڭا مۇمكىندىكتەر اشادى. ولار مەملەكەتتىك باسقارۋ جۇيەسىنىڭ جۇمىس ىستەۋىنىڭ جاڭا ۇزاق مەرزىمدى قاعيداتتارىن قالىپتاستىرادى، مەملەكەت پەن قوعام اراسىنداعى ءوزارا قارىم-قاتىناستاردىڭ سيپاتىن ساپالى تۇردە وزگەرتەدى.
سوندىقتان بۇل سايلاۋ ناۋقانىنىڭ بارىسى ازاماتتار اراسىندا ۇلكەن قىزىعۋشىلىق تۋدىردى، ەلدىڭ ساياسي ءورىسىن جانداندىرۋعا اكەلدى جانە جەرگىلىكتى جەرلەردە ساياسي باسەكەلەستىكتىڭ ارتقانىن كورسەتتى. وسى تۇرعىدان العاندا، بارلىق 6 ساياسي پارتيانىڭ ءوز كانديداتتارىن ۇسىنعانى، كوپتەگەن ءوزىن-وزى ۇسىنۋشىلار تىركەلگەنى دە ماڭىزدى.
جالپى، قاسىم-جومارت توقايەۆ باستاماشى بولعان ءۇش ساياسي باعىت شەڭبەرىندەگى بارلىق وزگەرىستەر دايەكتى تۇردە ءىس جۇزىندە جۇزەگە اسىرىلىپ، قوعامنىڭ سۇرانىستارىنا ساي كەلەدى جانە ەلدىڭ ودان ءارى دەموكراتيالانۋىنا ىقپال ەتەدى».