عاسىر جاساعان كەيۋانا، 101 جاستاعى جامبىلدىق ءجۇمابۇبى احمەتوۆا اجەي ءوز ۇيىندە سايلاۋعا داۋىس بەرىپ، وسىلاي دەدى.
جامبىل وبلىسىندا 101 جاسقا كەلگەن اجەي داۋىس بەردى، دەپ حابارلايدى Almaty-akshamy.kz «ايقىن» گازەتىنە سىلتەمە جاساپ.
مەركى اۋدانى، انداس باتىر اۋىلىنىڭ تۇرعىنىنا تاسىمالداۋ جاشىگىن سايلاۋ كوميسسياسىنىڭ مۇشەلەرى اپارىپ، №297 سايلاۋ ۋچاسكەسى ارقىلى داۋسىن قابىلدادى. قوس عاسىر كورگەن كەيۋانا ەلدىڭ اماندىعىن تىلەپ، اق باتاسىن بەردى.
«ەلىمىز امان، جۇرتىمىز تىنىش بولعاي. وسى جاسىما كەلىپ، داۋىس بەرىپ وتىرعانىما قۋانىشتىمىن. پرەزيدەنتىمىز اۋىل اكىمدەرىن سايلاۋ تۋرالى جارلىق شىعارعاننان كەيىن وسى كۇندى اسىعا كۇتتىم. مىنە، بۇگىن ءوز تاڭداۋىمدى جاساپ وتىرمىن. قۇداي بۇيىرسا، اۋىلعا اكىم بولار ازامات ادالىنان كەلسىن دەپ تىلەيمىن. ەڭ باستىسى، قۇلقىنىن ەمەس، ۇلتىن ويلاسىن. سوندا عانا ونى حالىق قولدايدى. ۇرپاعىمىز الەمدى جايلاپ جاتقان كەسەلدەن امان بولسىن! ءبىز كورمەگەن قىزىقتى سولارعا بۇيىرتسىن!» – دەيدى ءجۇمابۇبى اجەي.