بۇگىن ەلىمىز كونستيتۋسيا كۇنىن اتاپ ءوتىپ جاتىر. 2022 جىلى اتا زاڭعا ماڭىزدى وزگەرىستەر ەنگىزىلدى. ادىلدىك قاعيداتىنا نەگىزدەلگەن بۇل تۇزەتۋلەر بۇكىل قوعامنىڭ مۇددەسىن ەسكەرە وتىرىپ، ازاماتتاردىڭ قۇقىقتارى مەن بوستاندىقتارىن كەڭەيتە تۇسۋگە جول اشتى.
كونستيتۋسيالىق رەفورمانىڭ باستى جاڭالىعى – پرەزيدەنت جەتى جىلدىق مەرزىمگە ءبىر رەت قانا سايلاناتىن بولدى، پارلامەنتتىڭ ىقپالى كۇشەيدى. ءماجىلىس پەن ءماسليحات دەپۋتاتتارىن سايلاۋعا قاتىستى ارالاس سايلاۋ جۇيەسى ەنگىزىلدى. جاڭا ينستيتۋت – كونستيتۋسيالىق سوت قۇرىلدى، ادام قۇقىقتارىن قورعاۋ تەتىكتەرى ايتارلىقتاي كۇشەيتىلدى.
رەفورمانىڭ ناتيجەسىندە بۇكىل ساياسي جۇيەنىڭ جۇمىسى جاڭعىرتىلدى، ەلىمىزدە اۋقىمدى ءارى تەرەڭ ينستيتۋسيونالدىق وزگەرىستەر جاسالدى.
2022 جىلعى كونستيتۋسيالىق رەفورمادان تۋىندايتىن نەگىزگى باستامانىڭ ءبىرى رەتىندە «ۇلتتىق قور – بالالارعا» جوباسىن اتاپ وتۋگە بولادى.
جالپى، وسى وزگەرىستەردەن كەيىن ەكى جىل ءوتتى. بۇگىندە ءبىز جاڭارعان اتا زاڭ مەملەكەتىمىزدىڭ دامۋىنا زور ىقپال ەتتى دەپ نىق سەنىممەن ايتا الامىز.