بەيسەنبىنىڭ تاڭىندا الماتى اۋەجايىندا وتانداستارى ريزابەك ايتمۇحاندى سالتاناتپەن كۇتىپ الدى.
اۋەجايدىڭ كۇتۋ زالى ەركىن كۇرەستەن قازاقستان تاريحىنداعى تۇڭعىش الەم چەمپيونىن ءارى ەل تاريحىنا اتى قالاتىن ەڭ جاس بالۋاندى قارسى الۋعا كەلگەن قاۋىمعا لىق تولدى. ولار جۇلدەلى جۇيرىكتەردى شارا تولى اق داممەن، قۇشاق تولى گۇل شوقتارىمەن قارسى الدى.
سەربيا استاناسىندا الا كىلەمدى قارسىلاستارىنىڭ جاۋىرىنىمەن قاققان جۇلدەگەرلەر ريزابەك ايتمۇحان مەن ازامات داۋلەتبەكوۆكە جانكۇيەر وتانداستارى يىعىنا شاپان جاۋىپ ەل ىقلاسىن ءبىلدىردى. كۇتىپ الۋ كەزىندە سالتاناتتى مارش ەكپىنى، اق نوسەردەي سىركىرەگەن دۋ قول شاپالاق ءۇنى اۋەجايدى كەرنەپ تۇردى.
ب ا ق وكىلدەرىنە بەرگەن جاۋابىندا بالۋان بىلاي دەپ تەبىرەندى: «مۇنداي قوشەمەتپەن قارسى الىپ جاتقان ەلىمە العىس ايتامىن. وتە كۇشتى سەزىمدە بولىپ تۇرمىن.... سوزبەن ايتىپ جەتكىزە المايمىن. بۇل مەنىڭ ارمانىم ەدى. وتانداستارىما وسىنداي ءساتتى سىيلاعانىما قۋانىشتىمىن».
جارىس جايىنداعى سوزىندە ريزابەك: «قارسىلاستار وسال بولعان جوق، ارينە. دەگەنمەن، شەشۋشى كەزدە بارىمدى سالدىم. سوڭىنا قاراي قارسىلاستىڭ شارشاعانىن بايقادىم. سول ءساتتى ۇتىمدى پايدالاندىم دەپ ويلايمىن»، – دەپ العىنان جارىلدى.
بەلگرادتاعى بەلدەسۋدە قولا جۇلدەگە يە بولىپ، پاريج وليمپياداسىنىڭ جولداسىن ۇتىپ كەلگەن وتانداسىمىز ازامات داۋلەتبەكوۆ تە قوشامات كورسەتكەن جۇرتقا ريزاشىلىعىن جەتكىزدى. ءارى ءوزىنىڭ ارىپتەسى ريزابەككە دەگەن شىنايى قۇرمەتىمەن ءبولىستى. «ريزابەككە ريزامىن، 19 جاسىندا ەلىمىزدەن العاشقى الەم چەمپيونى اتاندى. بۇنىسى جاستارعا ۇلگى، ءتىپتى بىزگە دە موتيۆاسيا بەردى»، – دەيدى ازامات.
رەسپۋبليكالىق گرەك-ريم، ەركىن جانە ايەلدەر كۇرەسى فەدەراسياسىنىڭ ۆيسە-پرەزيدەنتى ءبىلالدين ۋشۋروۆ جيىلعان جۇرتتى قۇتتىقتادى. ءبىلالدين تالعات ۇلى سوزىندە: «ەركىن كۇرەستەن تاريحىمىزداعى ءبىرىنشى چەمپيونىمىز كەلىپ جاتىر. بارشاڭىزدى وسى قۋانىشپەن قۇتتىقتايمىن. كەلەشەكتە وسى بالامىزدىڭ جولىنىڭ اشىق بولۋىن، كەلەسى جولى فرانسيادا وليمپيادا چەمپيونى اتانىپ، بارشامىزدى قۋانتسىن دەپ تىلەيمىن!»، – دەدى.
ايتا كەتەيىك، سەربيانىڭ ورتالىق قالاسى بەلگرادتا وتكەن الەم چەمپيوناتىندا ريزابەك 92 كگ سالماقتا الەم بىرىنشىلىگىن جەڭىپ الدى. بۇل ەل تاريحىندا ەركىن كۇرەستەن العان العاشقى چەمپيوندىق اتاق.