نايب يمامنىڭ ايتۋىنشا، ۆاكسينالاردىڭ حالالدىلىعى جونىندە الاڭداۋدىڭ قاجەتى جوق.
الماتىدا وڭىرلىك كوممۋنيكاسيالار قىزمەتى الاڭىندا قالانىڭ ورتالىق مەشىتىنىڭ نايب يمامى ەرجان ەسىم يسلام تۇرعىسىنان ۆاكسينالانۋ تۋرالى سۇراقتارعا جاۋاپ بەردى، دەپ حابارلايدى Almaty-akshamy.kz
ءدىن وكىلىنىڭ ايتۋىنشا، بىردە-بىر ءداستۇرلى دىندە ۆاكسينالانۋعا تىيىم سالىنباعان، كەرىسىنشە، دەنساۋلىقتى ساقتاۋعا دەگەن ۇمتىلىس قولداۋ تابادى.
«ءبىز وتباسىلارىمىزدى كوروناۆيرۋستان قورعاپ، ءارقايسىمىزدىڭ جاعدايىمىزعا قامقورلىق جاساۋعا ءتيىسپىز. ۆاكسينالانۋ – بۇل جالعىز شەشىم جانە ءقازىر وتە ماڭىزدى. ءدىن اركىمگە ءومىر مەن دەنساۋلىققا دۇرىس كۇتىم جاساۋدى جانە اۋرۋدىڭ الدىن-الۋ جولدارىن ىزدەۋدى مىندەتتەيتىنىن ەستە ۇستاعان ءجون. ۆاكسينالار ءبىرقاتار مۇسىلمان ەلدەرىندە قولدانىلادى، سوندىقتان ۋاقىت جوعالتپاي، حالال جانە حالال ەمەس ۆاكسينالاردى قاراستىرۋ قاجەت. ادامداردىڭ ءومىرىن قۇتقاراتىن كەز كەلدى. ۆاكسيناعا قارسىلاردىڭ مەديسيناعا قاتىسى جوق»،– دەدى ءدىن قىزمەتكەرى.
ول سونداي-اق ساۋد ارابياسى بيلىگىنىڭ شەشىمىمەن مەككە مەن مەديناداعى قاسيەتتى ورىندارعا ۇلكەن جانە كىشى قاجىلىققا قاتىسۋ ءۇشىن مۇسىلمان قاجىلارى كوروناۆيرۋسقا قارسى ۆاكسينالاۋدان ءوتۋى كەرەك ەكەنىن ايتتى. بۇل شەشىمدى بۇكىل الەمدەگى ءدىندارلار قولدادى.
ەرجان ەسىم ۆاكسينالاردىڭ حالالدىلىعى جونىندە الاڭداۋدىڭ قاجەتى جوق ەكەنىن اتاپ ءوتتى. مىسالى، QazVac قازاقستاندىق ۆاكسيناسى حالال جالپى تالاپتارعا سايكەستىك سەرتيفيكاتىن الدى.