ەرىكتىلەر ەڭبەگى ەلەندى
تاۋەلسىزدىكتىڭ 30 جىلدىعى اياسىندا Uzdik volonter 2021 ەرىكتىلەرىنە قۇرمەت كورسەتۋ سالتاناتتى ءراسىمى ءوتتى، وندا جىل قورىتىندىسى شىعارىلىپ، الماتى ەرىكتىلەر قوزعالىسىنىڭ ەڭ بەلسەندى جانە جاناشىر قاتىسۋشىلارى ماراپاتتالدى، دەپ حابارلايدى Almaty-akshamy.kz
ق ر تاۋەلسىزدىگىنىڭ 30 جىلدىعىنا وراي وتكىزىلگەن ءىس-شارانى الماتى قالاسى اكىمىنىڭ ورىنباسارى ەرجان باباقۇماروۆ اشتى. ول مۇقتاج جاندارعا رياسىز كومەكتەسىپ، قوعامدى جاقسارتا تۇسەتىن ەرىكتىلەر قوزعالىسىنىڭ بەلسەندىلەرىنىڭ ەرەكشە ءرولىن اتاپ ءوتتى.
سونداي-اق، قوعام قايراتكەرى، قايىرىمدىلىق قورىنىڭ ديرەكتورى ا. ساين؛ قالالىق ءماسليحاتتىڭ دەپۋتاتى، Q3 Worldwide ينۆەستيسيالىق حولدينگىنىڭ يەسى ق.قۇدايبەرگەن؛ «قازاقستان ۆولونتەرلەرى ليگاسى» قوعامدىق قورىنىڭ ءتورايىمى ا. ەرنيازوۆا؛ قالالىق ءماسليحاتتىڭ دەپۋتاتى س. ەسمات؛ الماتى قالاسى ۆولونتەرلەرىنىڭ وڭىرلىك ءفرونت-وفيسىنىڭ وكىلى ب. اناربايەۆا قۇتتىقتاۋ ءسوز سويلەدى.
ءتۇرلى نوميناسيالار بويىنشا ماراپاتتالعانداردىڭ اراسىندا Lider.kz ەرىكتىلەر قوزعالىسىنىڭ جەتەكشىسى د. بلاس؛ Menin Armanym كورپوراتيۆتىك قورىنىڭ اتقارۋشى ديرەكتورى ش. ۆانكەيەۆ؛ Asar-ume قورىنان ا. نۇرماعامبەتوۆ، د. مالايەۆا، س. اسىلبەك؛ «ساليقالى ۇرپاق» قورىنان ق. قاسابەكوۆ؛ «حارەكەت» قق، گ. مۇحان قىزى، ا. تەمىروۆ، «حارەكەت» قق، ا. وقاس، ە. ۇلتانبەكوۆ، ە. شاياحمەت، م. مىرزاحمەتوۆا «الماتى مەيىرىمدىلىك كلۋبىنان»؛ قايسار ق.، ل. يبراگيموۆا، «قىزىل جارتى اي»؛ ا. كيم، «قازاقستان ەرىكتىلەر ليگاسى»؛ ب. شەرالييەۆا، «راحىم» الەۋمەتتىك ءۇيى؛ م. لەجنيەۆا، «كوتوپەس»، س. شۇڭكەيەۆ، «حالىق» قورى، م. انۋاربەكوۆا، «مەن الماتىلىقپىن» جانە باسقالار.
فورۋم بارىسىندا Asar-ume قوعامدىق قورى مۇقتاج جانە كوپ بالالى وتباسىلارعا ءۇي ساتىپ الۋعا سەرتيفيكات بەردى. باسقا ەرىكتىلەر جاڭا ۇيگە قاجەتتى تەحنيكانى سىيعا تارتتى. مەيىرىمدى جۇرەكتەردىڭ ارقاسىندا تاعى ءبىر وتباسى جاڭا جىلدى ءوز شاڭىراعىنىڭ تورىندە قارسى الادى.
ايتا كەتەرلىگى، جاڭا جىل قارساڭىندا ەرىكتىلەر جاقسىلىق سىيلاۋدى توقتاتپايدى. قالانىڭ ۆولونتەرلىك ۇيىمدارى «كەرەمەت اياز اتا» جاڭاجىلدىق اكسياسىن وتكىزۋدە، ونىڭ اياسىندا كەز كەلگەن ادام مۇقتاج جاننىڭ جاڭاجىلدىق تىلەگىن ورىنداي الادى.