كومەك كورسەتۋگە قالا تۇرعىندارى، كاسىپكەرلەر مەن بەلسەندى جاستار قاتىستى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ەرىكتىلەر فرونت-كەڭسەسىنىڭ باسشىسى، «QAMQOR CHARITY» قوعامدىق قورىنىڭ ءتوراعاسى باعدات اناربايەۆا مالىمدەدى، دەپ حابارلايدى almaty-akshamy.kz
ونىڭ ايتۋىنشا، 2024 جىلدىڭ 29 ناۋرىزىنان 15 ساۋىرىنە دەيىن المالى اۋدانىنىڭ كوميۋنيتي ورتالىعى بازاسىندا الماتى قالاسى جاستار ساياساتى باسقارماسىنىڭ قولداۋىمەن اشىلعان قازاقستاننىڭ سۋ تاسقىنىنان زارداپ شەككەن وڭىرلەرىنە گۋمانيتارلىق كومەك قابىلداۋ پۋنكتى جۇمىس ىستەدى. پۋنكت كۇن سايىن ساعات 10:00-دەن 19:00-گە دەيىن جۇمىس ىستەدى. ساعات 19:00-دەن 24: 00-گە دەيىن ەرىكتىلەر گۋمانيتارلىق كومەكتى ساناۋ جانە جيناقتاۋ بويىنشا جۇمىس جۇرگىزدى.
كۇن سايىن الماتىلىقتار قاجەتتى زاتتاردى اكەلىپ، زارداپ شەككەن وڭىرلەرگە كومەك كورسەتۋگە ءوز ۇلەستەرىن قوستى.
«كومەك جيناۋ پۋنكتىنىڭ جۇمىسىنا قالانىڭ 30-دان استام ءىرى ۆولونتەرلىك ۇيىمدارى، 200 ۆولونتەر جانە راديوەلەكترونيكا جانە بايلانىس اسكەري - ينجەنەرلىك ينستيتۋتىنىڭ 100-دەن استام كۋرسانتتارى جۇمىلدىرىلدى»، - دەدى باعدات اناربايەۆا.
ەرىكتىلەردىڭ نەگىزگى بولىگى گۋمانيتارلىق كومەكتى قابىلداۋ، وراۋ جانە جيناقتاۋ جۇمىستارىنا تارتىلدى. سونىمەن قاتار، ەرىكتىلەردىڭ جەكەلەگەن بولىگى زارداپ شەككەن ايماقتارعا تىكەلەي كومەك كورسەتتى. الماتى قالاسىنان ەرىكتىلەر اتىراۋ، باتىس قازاقستان جانە اقتوبە وبلىستارىنا جىبەرىلدى.
گۋمانيتارلىق كومەك جيناۋ پۋنكتىنىڭ جۇمىسىنا بۇقارالىق اقپارات قۇرالدارى، بلوگەرلەر مەن مەديا تۇلعالار ۇلكەن اقپاراتتىق قولداۋ كورسەتتى.
«كۇن سايىن ەرىكتىلەر ءفرونت-وفيسىنىڭ كولل-ورتالىعىنا قالا تۇرعىندارىنان 1000-نان استام قوڭىراۋ كەلىپ ءتۇستى. گۋمانيتارلىق كومەك قابىلداۋ پۋنكتىنە كۇنىنە 500-دەن استام ادام كەلدى. وسى مۇمكىندىكتى پايدالانا وتىرىپ، گۋمانيتارلىق كومەك جيناۋدىڭ العاشقى كۇندەرىنەن باستاپ ۇلكەن بەلسەندىلىك تانىتىپ،بەي-جاي قاراماعان الماتى قالاسىنىڭ بارلىق جاناشىر تۇرعىندارىنا جەكە العىس بىلدىرگىم كەلەدى»، - دەپ ءبولىستى ب.اناربايەۆا.
اعىمداعى جىلدىڭ 29 ناۋرىزى مەن 15 مامىرى ارالىعىندا 592 توننا گۋمانيتارلىق كومەك جينالدى (200 توننا – ازىق – تۇلىك، 147 توننا – گيگيەنالىق قۇرالدار، 70 توننا – كيىم، قالعان 35 توننا-تۇرمىستىق زاتتار)، ولاردان جونەلتىلگەندەرى:
- ورالعا 70 توننا (40-اۆيارەيسپەن، 30-فۋرامەن)؛
- اقتوبە وبلىسىنا 44 توننا (40-فۋراممەن، 4-اۆيارەيس)؛
- اتىراۋ وبلىسىنا 268 توننا (13-اۆيارەيسپەن، 253-فۋرامەن)؛
- قوستاناي وبلىسىنا 70 توننا (10-جۇك كولىگى، 60-فۋرا)؛
- پەتروپاۆلعا 140 توننا (65 – جۇك كولىگى، 35 – "Mitsubishi Delica" ماركالى اۆتوموبيلدەر، 40-فۋرامەن).
بريفينگكە قاتىسقان «Jas Live» جاستار مەديا-ورتالىعىنىڭ باسشىسى مەيىرجان كەلمەدەنوۆ ەرىكتىلەردىڭ سۋ باسقان اۋدانداردىڭ تۇرعىندارىنا قالاي كومەكتەسكەنىن ايتىپ بەردى.
«بىزدە الماتى قالاسىنان سۋ باسقان وڭىرلەرگە، سونىڭ ىشىندە ءوزىمىزدى قوسا العاندا، بارعان ەرىكتىلەر بولدى. توتەنشە جاعدايدىڭ العاشقى كۇندەرىندە 10 توننا گۋمانيتارلىق كومەك جىبەرىلىپ، ورال قالاسىنا ەرىكتىلەر جىبەرىلدى. سودان كەيىن ءبىز وڭىرلەردىڭ قاجەتتىلىكتەرىنە قاراي الماتىدان اتىراۋ وبلىسى مەن اقتوبە قالاسىنا 50 - گە جۋىق ەرىكتى جىبەردىك»، - دەدى ول.
سونداي-اق، ەرىكتىلەر باسقالاردىڭ قيىن جاعدايدا قالعانىنا بەي-جاي قارامايتىنىن جانە كەز كەلگەن ۋاقىتتا بەلسەندى قولداۋ كورسەتۋگە دايىن ەكەنىن ايتتى.
بريفينگ سوڭىندا سپيكەرلەر الماتىلىقتارعا يگى ىستە كورسەتكەن بەلسەندىلىگى مەن قولداۋى ءۇشىن العىس ءبىلدىردى.