مەملەكەت باسشىسى قاسىم-جومارت توقايەۆ ەرەكشە قاجەتتىلىگى بار ادامداردى جانە ولاردىڭ كۇتۋشىلەرىن قولداۋ شارالارىن كۇشەيتۋدى تاپسىردى، دەپ حابارلايدى قازاقپارات ءتىلشىسى.
«الەۋمەتتىك تۇرعىدان وسال توپتاعى ازاماتتاردى قولداۋ – باستى مىندەتتىڭ ءبىرى. قيىندىققا تاپ بولعان جاندار ەش كومەكسىز قالماۋى كەرەك. مەملەكەتتىڭ ادىلدىگى مەن قوعامنىڭ جاناشىرلىعى وسىندايدا كورىنەدى. اسىرەسە، انا مەن بالانى قورعاۋعا ايرىقشا كوڭىل بولىنۋگە ءتيىس. مەنىڭ تاپسىرماممەن بيىل بالا كۇتىمىنە جاردەماقى بەرۋ مەرزىمى 1 جىلدان 1،5 جىلعا ۇزارتىلدى. تۇرمىسى تومەن وتباسىنداعى 1 جاستان 6 جاسقا دەيىنگى بالالارعا بەرىلەتىن الەۋمەتتىك كومەك قايتا قارالدى. ەندى 100 مىڭنان استام بالا بۇل كومەكتى اقشالاي الاتىن بولادى»، - دەدى قاسىم-جومارت توقايەۆ VIII سايلانعان ق ر پارلامەنتىنىڭ ءبىرىنشى سەسسياسىندا.
مەملەكەت باسشىسى كوپ بالالى وتباسىلارعا دا ايتارلىقتاي قولداۋ كورسەتىلىپ جاتقانىن ەسكە سالدى.
«جارتى ميلليوننان استام وتباسىنا ارنايى جاردەماقى تولەنەدى. مەن بىلتىر «ۇلتتىق قور – بالالارعا» باستاماسىن كوتەردىم. ءقازىر وسى باستامانى جۇزەگە اسىرۋعا دايىندىق جۇرگىزىلىپ جاتىر. مەملەكەت مۇقتاج جاندارعا اتاۋلى الەۋمەتتىك كومەك كورسەتۋدى جالعاستىرا بەرەدى. وسى ورايدا، ەرەكشە قاجەتتىلىگى بار ازاماتتارعا ارنايى توقتالعىم كەلەدى. ەلىمىزدە وسى ساناتقا كىرەتىن 700 مىڭنان استام ادام بار. ازىق-تۇلىك پەن دارى-دارمەك باعاسىنىڭ قىمباتتاۋى ولارعا وڭاي ءتيىپ وتىرعان جوق. ءبىز ەرەكشە قاجەتتىلىگى بار ادامداردى جانە ولاردىڭ كۇتۋشىلەرىن قولداۋ شارالارىن كۇشەيتۋىمىز قاجەت»، - دەدى پرەزيدەنت.