ەرەكشە ءنومىر ءۇشىن ەرەكشە قارجى

قازاقستاندىقتار VIP نومىرلەرگە 6 ميلليارد تەڭگە جۇمساپ، 2021 جىلى 20 مىڭنان استام قازاقستاندىق ادەمى نومىرلەرگە يە بولعان، دەپ حابارلايدى اlmaty-akshamy.kz «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسپا ءسوز قىزمەتىنە سىلتەمە جاساپ.

وتكەن جىلى قازاقستاندىقتار جالپى سوماسى 5،8 ملرد تەڭگەگە جوعارى سۇرانىسقا يە نەمەسە VIP دەپ اتالاتىن نومىرلەردى ساتىپ العان. اۆتوكولىك يەلەرى 2020 جىلمەن سالىستىرعاندا ادەمى نومىرلەردى كوبىرەك راسىمدەي باستاعان، ول كەزدە 3،9 ملرد تەڭگەگە 12 616 ءنومىر الىنعان بولاتىن، – دەلىنگەن «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسپا ءسوز قىزمەتى تاراتقان اقپاراتتا.

2021 جىلى VIP نومىرلەرگە ەڭ كوپ قاراجاتتى الماتىلىقتار جۇمساعان: 2،2 ملرد تەڭگەگە 6882 ءنومىر الىنعان. ەكىنشى ورىندا شىمكەنتتىك اۆتوكولىك يەلەرى  818 ملن تەڭگەگە 3190 ءنومىر ساتىپ السا، 667 ملن تەڭگەگە 2231 ءنومىر العان نۇرسۇلتاندىقتار ۇشتىكتى تۇيىندەگەن.

VIP نومىرلەرگە سولتۇستىك قازاقستان وبلىسىندا سۇرانىس از. وتكەن جىلى وندا 45 ملن تەڭگەگە بارلىعى 169 ەرەكشە ءنومىر تىزبەگى ساتىپ الىنعان.

ساندار مەن ارىپتەردىڭ كومبيناسياسىنا بايلانىستى VIP-نومىرلەردىڭ باعاسى 174 591 تەڭگەدەن باستالادى، ەڭ قىمباتى 872 955 تەڭگە تۇرادى، – دەلىنگەن «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسپا ءسوز قىزمەتى حابارلاماسىندا.

مەملەكەتتىك كورپوراسيا وكىلى ءنومىر يەسى ەرەكشە نومىرلەر تىزبەگىن ءۇشىنشى تاراپقا سىيلاي دا، ساتا دا المايتىنىن ايتتى.

ەگەر كولىك ساتىلسا، ءنومىر يەسى ونى جاڭا كولىك ساتىپ العانعا دەيىن مامانداندىرىلعان حقو-دا 6 اي ساقتاي الادى، – دەيدى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسپا ءسوز قىزمەتى.