ەربولات دوسايەۆ: الماتىدا جىلىتۋ ماۋسىمى شتاتتىق رەجيمدە وتۋدە
الماتى قالاسىنىڭ اكىمى ەربولات دوسايەۆ جۇمىس كەڭەسىن وتكىزدى، جيىندا 2023-2024 جىلدارداعى جىلىتۋ ماۋسىمىنىڭ بارىسى قارالدى، دەپ حابارلايدى Almaty-akshamy.kz.
ەنەرگەتيكا جانە سۋمەن جابدىقتاۋ، كوممۋنالدىق ينفراقۇرىلىمدى دامىتۋ، ءبىلىم باسقارمالارىنىڭ باسشىلارى، سونداي-اق «الماتى جىلۋ جەلىلەرى» ج ش س، «الماتىجىلۋكوممۋنەنەرگو» ج ش س، «الماتى سۋ» مكك، «الماتى ەلەكتر ستانسيالارى» اق، «الاتاۋ جارىق كومپانياسى» اق جانە «قازترانسگازايماق» اق باسشىلارى جىلىتۋ ماۋسىمىنىڭ اعىمداعى ءوتۋى تۋرالى باياندادى. الماتىنى جىلۋمەن جابدىقتاۋ جەو-1،2، «الەس» اق بجك (65%) جانە «اتكە» ءجشس-نىڭ 84 جەرگىلىكتى قازاندىعى (35%) ەسەبىنەن قامتاماسىز ەتىلەدى.
بۇگىنگى تاڭدا قالادا بارلىق الەۋمەتتىك نىساندار مەن كوپپاتەرلى تۇرعىن ۇيلەر (كتۇ – 8 863، ءبىلىم بەرۋ وبەكتىلەرى – 404، دەنساۋلىق ساقتاۋ وبەكتىلەرى - 128) ۇزدىكسىز جىلۋمەن قامتاماسىز ەتىلگەن. جىلۋ كوزدەرىندە جانە جىلۋ جەلىلەرىندە تەمپەراتۋرالىق رەجيم بەكىتىلگەن كەستەگە سايكەس ساقتالادى. اكىمگە جىلۋ بەرۋ ماۋسىمى كەزىندە قالا قىزمەتتەرىنىڭ جوعارى دايىندىق رەجيمىندە جۇمىس ىستەيتىنى باياندالدى. شتاتتان تىس جاعدايلاردى ۋاقتىلى جويۋ ءۇشىن بارلىق قاجەتتى قۇرىلعىلارمەن جابدىقتالعان اپاتتى جويۋ بريگادالارى جۇمىس ىستەيدى. بۇل ىسكە بارلىعى 400-گە جۋىق ادام، 100-دەن استام ارنايى تەحنيكا جۇمىلدىرىلعان.
مەگاپوليس باسشىسى ينفراقۇرىلىمنىڭ توزۋىن ازايتۋعا باعىتتالعان ينۆەستيسيالىق باعدارلامانى ىسكە اسىرۋعا باسا نازار اۋداردى. الماتى قالاسى بويىنشا جىلۋ جەلىلەرىنىڭ جالپى توزۋى 59،2%-دى قۇرادى، 2023 جىلى جۇرگىزىلىپ جاتقان شارالار جوسپارلانعان 0،6% ورنىنا توزۋدى 1،3% - عا قىسقارتۋعا مۇمكىندىك بەردى. وسىلايشا، اعىمداعى جىلدىڭ باسىندا 25 جىلدان استام ۋاقىت پايدالانىلىپ، توزعان جەلىلەردىڭ ۇزىندىعى 802،6 كم نەمەسە جەلىلەردىڭ بارلىق ۇزىندىعىنىڭ 57،9%-ىن قۇرايدى.
اعىمداعى جىلى جالپى ۇزىندىعى 20 كم جىلۋ جەلىلەرىن رەكونسترۋكسيالاۋ بويىنشا جۇمىستار جۇرگىزۋ جوسپارلانۋدا، بۇل جىلۋ جەلىلەرىنىڭ توزۋىن 1،8% - عا تومەندەتۋگە مۇمكىندىك بەرەدى.
كەڭەستىڭ قورىتىندىسى بويىنشا قالا اكىمى ەربولات دوسايەۆ جىلۋ بەرۋ ماۋسىمىن تۇراقتى ءارى ۇزدىكسىز وتكىزۋ قالا ءۇشىن ستراتەگيالىق ماڭىزدى مىندەت ەكەنىن اتاپ ءوتتى. جىلىتۋ ماۋسىمى ءالى جالعاسۋدا، سوندىقتان قالالىق قىزمەتتەرگە قالا تۇرعىندارىن تۇراقتى جانە ۇزدىكسىز جىلۋمەن قامتاماسىز ەتۋ ماسەلەسىن باقىلاۋدا ۇستاۋ تاپسىرىلدى.