الماتى پوليسياسى جىل قورىتىندىسىن شىعاردى
الماتى پوليسياسى وتكەن جىلدىڭ جۇمىسىن قورىتىندىلادى. كۇن تارتىبىندە ىشكى ىستەر مينيسترلىگىنىڭ كەڭەيتىلگەن القا ماجىلىسىندە مەملەكەت باسشىسى قاسىم-جومارت توقايەۆ ناقتىلاعان ماسەلەلەر بار، دەپ حابارلايىد almaty-akshamy.kz
قازاقستان رەسپۋبليكاسىنىڭ پرەزيدەنتى ءوز سوزىندە، پوليسيانىڭ ەلىمىزدە “زاڭ جانە ءتارتىپ” قاعيداتىن قالىپتاستىرۋدا ماڭىزدى ءرول اتقاراتىنىن اتاپ ءوتتى. مەملەكەت باسشىسىنىڭ ايتۋىنشا، ءاربىر ازامات ءوزىن ءقاۋىپسىز سەزىنۋى كەرەك. سوندىقتان قۇقىق قورعاۋ جۇيەسى ۇيلەسىمدى ءارى ءتيىمدى جۇمىس ىستەۋى كەرەك.
– قازاقستان رەسپۋبليكاسى پرەزيدەنتىنىڭ ازاماتتاردىڭ، اسىرەسە بالالاردىڭ قاۋىپسىزدىگىن قامتاماسىز ەتۋ، ولاردىڭ كونستيتۋسيالىق قۇقىقتارىن قورعاۋ، تۇرمىستىق زورلىق-زومبىلىقتىڭ الدىن الۋ، زاڭدىلىق پەن قۇقىقتىق ءتارتىپتى قامتاماسىز ەتۋ، جازاتايىم وقيعالاردى ازايتۋ، ازاماتتاردىڭ قۇقىقتىق ساۋاتتىلىعىن ارتتىرۋ، حالىقتى كوشى-قوندى باقىلاۋدى كۇشەيتۋ، ەسىرتكى قىلمىسىمەن كۇرەسۋ، سونداي-اق جەكە قۇرام اراسىنداعى ءتارتىپ پەن زاڭدىلىق جونىندەگى تاپسىرمالارىن ورىنداۋ ماسەلەلەرى قارالدى. ىشكى ىستەر ءمينيسترىنىڭ اعىمداعى 2024 جىلدى كادرلار ساپاسىن ارتتىرۋ جىلى دەپ جاريالاۋى، باسشىلاردىڭ باستى نازارىن قاراماعىنداعى قىزمەتكەرلەردىڭ ادامگەرشىلىك قاسيەتتەرىن ارتتىرۋعا اۋدارۋ كەرەكتىگىن اتاپ وتكىم كەلەدى. قاسىم-جومارت توقايەۆ اتاپ وتكەندەي، قوعاممەن بىرگە پوليسيا دا تۇبەگەيلى وزگەرۋى كەرەك، – دەدى قورىتىندى جيىندا الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.
الماتى قالاسىنىڭ باس پوليسەيى جيىنعا قاتىسۋشىلاردىڭ نازارىن شاھارداعى قىلمىستىق احۋالدى جاقسارتۋعا باعىتتالعان پروفيلاكتيكالىق شارالاردى كۇشەيتۋگە، سونداي-اق قالاداعى قوعامدىق ءتارتىپتى ساقتاۋعا جۇرتشىلىقتى بەلسەندى تارتۋعا اۋداردى.
– پروفيلاكتيكالىق جۇمىستى مەكتەپ باسشىلىعىمەن بىرگە كۇشەيتۋ قاجەت. بۇل جۇمىسقا ازاماتتىق قوعام ينستيتۋتتارى مەن ساراپشىلاردى تارتۋ قاجەت. بالالارعا وڭ تاربيە بەرۋ ءۇشىن قۇزىرلى قىزمەتتەرمەن بىرلەسىپ، بالالاردىڭ ءتۇرلى ۇيىرمەلەر مەن سپورت سەكسيالارىنا بارۋىن قامتاماسىز ەتۋ، ولاردىڭ ساباققا قاتىسۋىن قاداعالاي الۋى ءۇشىن بىرلەسكەن جۇمىستى ۇيىمداستىرۋ قاجەت. سونىمەن قاتار قورقىتۋ، قورلاۋ جانە بوپسالاۋ دەرەكتەرىن انىقتاۋ ءۇشىن جاسوسپىرىمدەر مەن جاستار اراسىندا ماقساتتى ءىس-شارالاردى وتكىزۋگە جەدەل قىزمەتتەردى باعدارلاۋعا ەرەكشە نازار اۋدارۋ قاجەت، – دەدى ارىستانعاني زاپپاروۆ.
سونىمەن قاتار جيىن بارىسىندا ارىستانعاني زاپپاروۆ جەرگىلىكتى پوليسيا قىزمەتىنە بالالاردىڭ قاۋىپسىزدىگىن قامتاماسىز ەتىپ، جاسوسپىرىمدەر اراسىنداعى قىلمىستىڭ الدىن الۋدى كۇشەيتۋدى تاپسىردى. سپيكەر قۇقىق بۇزۋشىلىقتىڭ الدىن الۋ ماسەلەسىنە دە توقتالىپ، قۇقىق بۇزۋشىلىقتىڭ الدىن الۋدىڭ تولىققاندى جۇيەسىن قالىپتاستىرۋ، ولاردىڭ جاسالۋ سەبەپتەرىن جويۋ باعىتىندا ماقساتتى جۇمىستار جۇرگىزۋ قاجەتتىگىن ايتتى.
جەدەل كەڭەستىڭ قورىتىندىسى بويىنشا پد باسشىسى الماتى پوليسياسىنىڭ قىزمەتىن ودان ءارى جەتىلدىرۋگە باعىتتالعان ءبىرقاتار ناقتى تاپسىرمالار بەرىپ، قىزمەتتە ەرەكشە كوزگە تۇسكەن پوليسيا قىزمەتكەرلەرىن ماراپاتتادى.