الماتىنىڭ تۇركسىب اۋدانىندا ينجەنەرلىك جەلىلەردىڭ قۇرىلىس جوباسى اياقتالىپ كەلەدى
قالا اكىمى ەربولات دوسايەۆ تومەنگى بەسارىق شاعىن اۋدانىنىڭ تۇرعىندارىنا سۋمەن جابدىقتاۋ جانە سۋ بۇرۋ جەلىلەرىنىڭ قۇرىلىس مەرزىمى مەن ساپاسىنا قاتىستى سۇراقتارعا جاۋاپ بەردى، دەپ حابارلايدى aqshamnews.kz.
بۇگىنگى كۇنى جوسپارلانعان 115،5 كم سۋ قۇبىرىنىڭ 100 كم-ى، 31،8 كم كارىز جەلىسىنىڭ 27،8 كم-ى سالىندى. جەلىلەرگە 4080 ابونەنت، 67 كوشە قوسىلادى. الماتى اكىمى اتاپ وتكەندەي، اسفالتتاۋ جەلىلەردى توسەۋ مەن تەكسەرۋدەن كەيىن جۇرگىزىلەدى، وسىلايشا جول جابىنىن قايتادان قازباۋعا مۇمكىندىك تۋادى. 45 كوشەدە اسفالت توسەلدى، بارلىعى 280 مىڭ شارشى مەتر جول جابىنىن قالپىنا كەلتىرۋ جوسپارلانعان، سونىڭ 150 مىڭ شارشى مەترى قالپىنا كەلتىرىلدى.
تۇرعىندار اتقارىلىپ جاتقان جۇمىستىڭ ساپاسىنا نازار اۋدارعاندىقتان، ەربولات دوسايەۆ ينجەنەرلىك جەلىلەر بويىنشا تەحنيكالىق باقىلاۋدى جۇزەگە اسىراتىن كومپانيامەن بىرلەسىپ باقىلاۋدى كۇشەيتۋدى تاپسىردى. اسفالتتاۋ ساپاسىن قالالىق موبيلدىلىك باسقارماسى مەن جول اكتيۆتەرىنىڭ ۇلتتىق ساپا ورتالىعى تەكسەرەدى. سونىمەن قاتار، مەردىگەرگە جاياۋ جۇرگىنشىلەردىڭ ءقاۋىپسىز قوزعالىسىن قامتاماسىز ەتۋ ءۇشىن جەكە تروتۋارلاردىڭ قۇرىلىسىن جۇرگىزۋ قاجەتتىگى تۋرالى ەسكەرتىلدى.
قالا اكىمى قۇرىلىس جۇمىستارى 15 جەلتوقسانعا دەيىن اياقتالاتىنىن اتاپ ءوتتى.
«بۇل جوبانىڭ جاعدايىن وتە جاقسى بىلەمىن. ينجەنەرلىك جەلىلەردى بەلگىلەنگەن مەرزىمدە ساپالى تۇردە جۇرگىزۋ ءبىزدىڭ مۇددەمىز بەن تۇرعىنداردىڭ مۇددەسى. بۇل كوشەلەردىڭ اسفالتتالۋىنا دا قاتىستى. ەگەر دە جول جابىنى شوگىپ نەمەسە بۇلىنسە، مەردىگەر كەپىلدىك مىندەتتەمەلەرى اياسىندا قالپىنا كەلتىرۋ جۇمىستارىن جۇرگىزەدى. تۇرعىندار كوتەرگەن بارلىق ماسەلە بويىنشا تاپسىرمالار بەرىلدى، ولار حاتتامامەن بەكىتىلدى جانە مەنىڭ جەكە باقىلاۋىمدا بولادى»، - دەدى ەربولات دوسايەۆ.
ايتا كەتۋ كەرەك، تومەنگى بەسارىق شاعىن اۋدانىندا سۋ قۇبىرى مەن كارىز جەلىلەرىن سالۋ جوباسى 2021 جىلدان باستاپ ەنەرگەتيكا جانە سۋ شارۋاشىلىعى باسقارماسىنىڭ تاپسىرىسى بويىنشا «الۆيس» جاۋاپكەرشىلىگى شەكتەۋلى سەرىكتەستىگىمەن جۇزەگە اسىرىلۋدا. وتكەن جىلى ماتەريالداردىڭ قىمباتتاۋىنا بايلانىستى جوبا 8 اي بويى تۇزەتىلدى.