ەربولات دوسايەۆ «حالىق قاتىساتىن بيۋدجەت» اياسىندا جاياۋ جۇرگىنشىلەر كوپىرىن جوندەۋ بارىسىمەن تانىستى، دەپ حابارلايدى almaty-akshamy.kz
الماتى اكىمى ەربولات دوسايەۆ جەتىسۋ اۋدانىندا جۇمىس ساپارى بارىسىندا «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلىپ جاتقان رايىمبەك داڭعىلىنداعى جاياۋ جۇرگىنشىلەر كوپىرىن جوندەۋ بارىسىن كوزبەن كوردى.
مەگاپوليس باسشىسى كوپىردىڭ جابىندىسىن، باسپالداقتارىن كورىپ، قالا تۇرعىندارى ءۇشىن قۇرىلىستىڭ قاۋىپسىزدىگىن قامتاماسىز ەتۋدىڭ ماڭىزدىلىعىن اتادى.
جالپى ۇزىندىعى 50 مەتر بولاتىن كوپىر قۇرىلىسى جەتىسۋ جانە المالى اۋدانىن جالعايدى. كوپىر 70ء-شى جىلدارى سالىنىپ، جۇك ۆاگوندارى ءۇشىن تۇيىق رەتىندە قولدانىلعان، كەيىن جاياۋ جۇرگىنشىلەر جۇرە باستادى.
جەتىسۋ اۋدانىنىڭ اكىمى گۇلنار كوكەبايەۆا «حالىق قاتىساتىن بيۋدجەت» جوباسى اياسىندا جاقىن ماڭداعى ۇيلەردىڭ تۇرعىندارى وتكەلدى جوندەۋگە باستاماشى بولعانىن جەتكىزدى. كوپىردىڭ رايىمبەك داڭعىلىندا ەكەنىن ەسكەرسەك، بۇل ۇسىنىستى داۋىس بەرۋ كەزەڭىندە اۋداننىڭ باسقا تۇرعىندارى دا بەلسەندى قولداعان.
جوندەۋ جۇمىستارىن «Lux-stroy Group» ج ش س مەردىگەرلىك ۇيىمى بيىل 1 قىركۇيەكتە باستادى، جوبا قۇنى 45 ملن. تەڭگە. ءقازىر ءقاۋىپتى قورشاۋ جاياۋ جۇرگىنشىلەردىڭ قاۋىپسىزدىگى ءۇشىن بەرىك قورشاۋعا اۋىستىرىلدى، رەلستەر ساقتالىپ، گۇلزارلار ءۇشىن پايدالانىلدى. جاقىن اۋماقتى كوگالداندىرۋ اياسىندا 9 تۋيا مەن 65 ارشا وتىرعىزۋ كوزدەلگەن. جۇمىس وسى جىلدىڭ 1 قاراشاسىندا تولىق اياقتالادى.
قالا باسشىسى اۋدان تۇرعىندارىنا ىڭعايلى بولۋ ءۇشىن بوكەيحانوۆ كوشەسىنە پاراللەل جاياۋ جۇرگىنشىلەر ايماعىن ۇزارتۋدى تاپسىردى. بۇل رەتتە، قاۋىپسىزدىك تولىق كولەمدە قامتاماسىز ەتىلۋى ءتيىس، دەپ اتاپ ءوتتى ەربولات دوسايەۆ. مەگاپوليس باسشىسى اۋدان اكىمىنە جارىقتاندىرۋدى جولعا قويۋدى، جول توسەمىن رەتكە كەلتىرىپ، وتكەلدى مۇمكىندىگى شەكتەۋلى جاندارعا ىڭعايلاۋدى تاپسىردى.
«حالىق قاتىساتىن بيۋدجەت» باعدارلاماسى بويىنشا بيىل جەتىسۋ اۋدانىندا 40 جوبا جۇزەگە اسىرىلىپ جاتىر. سونىڭ ىشىندە اۋلالاردى، گۇلزارلار مەن ساياباقتاردى اباتتاندىرۋ جانە ت.ب. جوبالار بار. بارلىق جوبانى بيىل قازان ايىنىڭ سوڭىنا دەيىن اياقتاۋ جوسپارعا ەنگەن.
انىقتاما:
الماتىدا 2023 جىلدىڭ 13-23 قازان ارالىعىندا budget.open-almaty.kz پورتالى ارقىلى اۋدان اكىمدىكتەرى 2024 جىلى جۇزەگە اسىراتىن «حالىق قاتىساتىن بيۋدجەتتىڭ» ۇزدىك جوبالارى ءۇشىن داۋىس بەرۋ جالعاسىپ جاتىر. تۇرعىنداردان كەلىپ تۇسكەن 2213 جوبالىق ۇسىنىس قاراستىرىلادى. جەتىسۋ اۋدانىندا اباتتاندىرۋ جانە دامىتۋ بويىنشا باستامانى 84 تۇرعىن كوتەرگەن. الماتىدا تۇراقتى تىركەلگەن ءارى كامەلەتكە تولعان تۇرعىندار داۋىس بەرۋگە قۇقىلى. كەڭەستى اۋداندىق اكىمدىكتەردەن نەمەسە Open Almaty اكىمدىگىنىڭ قوعامدىق قابىلداۋ بولمەسىنەن 224 39 29 (ىشكى. 203، 127) الۋعا بولادى.