اكىم سالىنىپ جاتقان پروبلەمالى نىسانداردى ارالاپ جۇمىستاردى اياقتاۋدىڭ ناقتى مەرزىمدەرىن اتادى.
الماتى اكىمى ەربولات دوسايەۆ جۇمىس ساپارى اياسىندا الەۋمەتتىك جانە ينجەنەرلىك ينفراقۇرىلىمنىڭ پروبلەمالىق نىساندارىن ارالادى، بۇلاردا قۇرىلىس-مونتاج جۇمىستارى مەرزىمدەرى بۇزىلىپ جۇزەگە اسىرىلۋدا، دەپ حابارلايدى Almaty-akshamy.kz
اتاپ ايتقاندا، № 9 مەكتەپ-ينتەرناتى مەن بالالارعا شۇعىل مەديسينالىق كومەك كورسەتۋ ورتالىعىنىڭ جاڭا عيماراتتارى، سكەيتپەن سىرعاناۋ ءۇشىن سالىنىپ جاتقان ايماعى بار جاڭا ساياباق، سونداي-اق گاگارين داڭعىلى بويىنداعى جىلۋ ماگيسترالىنىڭ جوندەلەتىن ۋچاسكەسى بار.
ءبىرىنشى نىساندا اكىم سويلەۋ قابىلەتى بۇزىلعان بالالارعا ارنالعان № 9 مەكتەپ-ينتەرناتتىڭ جاڭا عيماراتىن قاراپ شىقتى. قۇرىلىس-مونتاج جۇمىستارى 2021 جىلدىڭ 20 شىلدەسىندە باستالدى. جوبانى تۇزەتۋدى ەسكەرە وتىرىپ، مەردىگەرلىك ۇيىم قۇرىلىستى وتكەن جىلدىڭ سوڭىنا دەيىن اياقتاۋى كەرەك ەدى. جەلتوقسان ايىندا «Barat & Co» ج ش س مەردىگەرىنە قاتىستى ۇزارتىلعان مەرزىمدى بۇزعانى ءۇشىن سوتقا تالاپ ارىز بەرىلدى.
سوت تالقىلاۋىنان كەيىن جۇمىستار قايتا جانداندى. بۇگىنگى تاڭدا نىسان 95% - عا اياقتالدى. ەربولات دوسايەۆ قۇرىلىس جانە ءبىلىم باسقارمالارى باسشىلىعىنىڭ نازارىن بالالاردى ينكليۋزيۆتى وقىتۋ ءۇشىن عيماراتتىڭ جايلىلىعىنا اسەر ەتەتىن ناقتى كەمشىلىكتەرگە اۋداردى. اكىمنىڭ تاپسىرماسى بويىنشا قوسىمشا بيۋدجەت قاراجاتى بولىنگەن وقۋ كورپۋسىن جاراقتاندىرۋعا ەرەكشە نازار اۋدارىلدى. اكىم اتاپ وتكەندەي، مەكتەپ اعىمداعى جىلدىڭ شىلدە ايىنىڭ سوڭىنا دەيىن تاپسىرىلۋى ءتيىس جانە اكىمدىك بارلىق سايكەسسىزدىكتەر تولىق جويىلعانعا دەيىن مەردىگەردىڭ جۇمىسىن قابىلدامايدى. سونداي – اق اكىم بەلگىلەگەن مىندەتتەردىڭ قاتارىندا مەكتەپ اۋماعىندا جاسىل جەلەكتەرگە كۇتىم جاساۋ جۇيەسىن جولعا قويۋ دا بار.
الماتى اكىمى قالالىق نىسانداردى ارالاۋ بارىسىندا قۇرىلىسى 2021 جىلدىڭ تامىز ايىندا باستالعان بوستاندىق اۋدانىنداعى بالالارعا شۇعىل كومەك كورسەتۋ ورتالىعىنىڭ جاڭا كورپۋسىنىڭ عيماراتىن ارالادى. مەردىگەر جۇمىستى 2022 جىلدىڭ جەلتوقسانىندا اياقتاۋى كەرەك ەدى، ءبىراق نىسان ۋاقىتىندا تاپسىرىلمادى. اعىمداعى جىلدىڭ ناۋرىز ايىندا اكىمدىك پايدالانۋعا بەرۋ مەرزىمدەرىنىڭ بۇزىلۋىنا بايلانىستى «اق ورداسى كورپوراسياسى» جشس-نا سوتقا تالاپ ارىز بەردى. نىسانداعى جۇمىستار جاڭارتىلىپ، كۇشەيتىلگەن رەجيمدە جۇرگىزىلۋدە. بۇگىنگى تاڭدا نىسانداعى جۇمىستار 85% - عا اياقتالدى، جابدىق 96% - عا ساتىپ الىندى. اكىم جاڭا كورپۋس عيماراتىنىڭ قۇرىلىسىن تامىز ايىنىڭ سوڭىنا دەيىن اياقتاۋدى، بۇل رەتتە جاقىن ورنالاسقان № 12 اۋرۋحانانى ەسكەرە وتىرىپ، ورتالىق عيماراتىنا ءبىرىڭعاي كىرۋ ايماعىن ۇيىمداستىرۋ ماسەلەلەرىن الدىن الا پىسىقتاۋدى تاپسىردى. جالپى، قۋاتتىلىعى تاۋلىگىنە 300 كەلۋشى بولاتىن جاڭا كورپۋس بالالارعا شۇعىل مەديسينالىق كومەك كورسەتۋ ساپاسىن جاقسارتۋعا مۇمكىندىك بەرەدى.
ارالاۋ بارىسىندا ەربولات دوسايەۆ المالى اۋدانىنداعى جاڭا ساياباق ايماعىنا باردى. ساياباقتىڭ قوعامدىق كەڭىستىگىن اباتتاندىرۋ بويىنشا قۇرىلىس-مونتاج جۇمىستارى 2022 جىلدىڭ كوكتەمىندە اعىمداعى جىلدىڭ 1 شىلدەسىندە تاپسىرۋ مەرزىمىمەن باستالدى.
بۇگىنگى تاڭدا جۇمىستىڭ 95% ورىندالدى. كونكي پاركىنىڭ قۇرىلىسى اياقتالۋ ساتىسىندا. تەكسەرۋ بارىسىندا اكىم نىساننىڭ قۇرىلىس نورمالارى مەن ەرەجەلەرىنە تولىق سايكەستىگىن تەكسەرۋدى تاپسىردى. قالالىق باسقارمالار كونكي پاركىن سالۋ ءۇشىن قاجەتتى بەتون قۇيۋ تەحنولوگياسىن ساقتاۋدى ەرەكشە باقىلاۋعا الۋى كەرەك. بار كەمشىلىكتەر تامىز ايىنىڭ باسىنا دەيىن جويىلۋى ءتيىس. سونىمەن قاتار، مەگاپوليس باسشىسى بەيىندى باسقارمالاردىڭ نازارىن ساياباقتىڭ جاسىل قورىن ودان ءارى دامىتۋ قاجەتتىگىنە اۋداردى، اعاشتاردى كۇتىپ ۇستاۋ مەن قورعاۋدى ەرەكشە باقىلاۋدا ۇستاۋدى، سۋارۋدى، ونىڭ ىشىندە اعىمداعى اۋا رايى جاعدايلارىن ەسكەرە وتىرىپ قامتاماسىز ەتۋدى تاپسىردى.
سونداي-اق، قالا اكىمى گاگارين داڭعىلى بويىنداعى جىلۋ كەشەنى-1-6-دان جىلۋ ەنەرگياسىنىڭ ورتالىق ترانزيتتىك-بولۋ پۋنكتىنە دەيىنگى جىلۋ ماگيسترالىن قايتا جاڭارتۋ قارقىنىن تەكسەردى.
بۇعان دەيىن تۇرعىندار جۇرگىزىلىپ جاتقان جۇمىستاردىڭ تومەن قارقىنى تۋرالى حابارلاعان بولاتىن. وسى ۋچاسكەدە جىلۋ ماگيسترالىنىڭ 17 زاقىمدانۋى انىقتالدى، وسى جىلدىڭ ماۋسىم ايىندا كۇردەلى جوندەۋ باستالدى. قازىرگى ۋاقىتتا گاگارين داڭعىلىندا ترانشەيانى ازىرلەۋ جۇمىستارى 100% اياقتالدى، قۇبىرلاردى ودان ءارى توسەۋ ارقىلى قۇراما وتپەيتىن ارنانىڭ تومەنگى ناۋالارىنىڭ نەگىزىن دايىنداۋ جانە مونتاجداۋ جۇمىستارى جۇرگىزىلۋدە. اكىم گاگارين داڭعىلىنداعى جۇمىستى اياقتاپ، تامىز ايىنىڭ سوڭىنا دەيىن قوزعالىستى اشۋدى تاپسىردى. الماتى اكىمى جىلۋ ەنەرگياسىن قايتا ءبولۋ جانە ونى قالا تۇرعىندارىنا جەتكىزۋ ءۇشىن بايلانىستىرۋشى بولىپ تابىلاتىن وسى ماگيسترالدىڭ ماڭىزدىلىعىن اتاپ ءوتتى. بۇل ماگيسترال جىل بويى 60 نىساندى جىلۋمەن قامتاماسىز ەتەدى، وعان 19 كوپپاتەرلى تۇرعىن ءۇي، ەكى بالاباقشا جانە باسقا 39 نىسان كىرەدى.
