ەربولات دوسايەۆ مەكتەپ وقۋشىلارىن تەگىن تاماقتاندىرۋ ماسەلەسىنە قاتىستى پىكىر ءبىلدىردى

1 قىركۇيەكتەن باستاپ الماتىدا العاش رەت باستاۋىش سىنىپ وقۋشىلارى تەگىن تاماقپەن قامتىلدى.

«اتامەكەن» ۇلتتىق كاسىپكەرلەر پالاتاسىمەن العاشقى بىرلەسكەن جيىندا مەگاپوليس باسشىسى ەربولات دوسايەۆ مەكتەپ وقۋشىلارىنىڭ تەگىن تاماقتاندىرۋ ماسەلەسىنە قاتىستى پىكىر ءبىلدىردى، دەپ حابارلايدى Almaty-akshamy.kz

«الماتىدا 1 قىركۇيەكتەن باستاپ باستاۋىش سىنىپ وقۋشىلارىن تەگىن تاماقتاندىرۋ ەنگىزىلدى. بالاعا كۇنىنە 560 تەڭگە ەسەپتەلەدى. الايدا، بۇگىنگى كۇنى بۇل سوما جۇمىس پەن تاماق دايىنداۋعا كەتەتىن شىعىندى ەسەپتەمەگەندە تەك تاماققا عانا جەتەدى. پاندەميادان بەرى كاسىپكەرلەر بالالاردى ازىق-تۇلىكپەن قامتاماسىز ەتۋ جونىندەگى مىندەتتەمەلەرىن ورىنداۋ ءۇشىن نەسيە الىپ جاتىر. الدىن الا تولەم ماسەلەسىن قاراستىرۋعا بولا ما؟» - دەپ سۇرادى كاسىپكەرلەر.

اكىم بۇل ماسەلەنىڭ وزەكتىلىگىن اتاپ ءوتتى.

«1 قىركۇيەكتەن باستاپ قالامىزدا العاش رەت بالالارىمىز – باستاۋىش سىنىپ وقۋشىلارىن تەگىن تاماقتاندىرۋدى قولعا الدىق. مەن مۇنى جاريالاعان كەزدە، بيزنەسمەندەر جۇمىستىڭ كوپ بولاتىنىن ءتۇسىنۋى كەرەك دەپ ويلادىم. جاۋاپتى قۇرىلىمدار بيۋدجەتتى قالىپتاستىرۋدا نارىقتىق باعاعا باعىتتالعان. ءبىراق ءسىزدىڭ سۇراعىڭىز دۇرىس تەزيس بولىپ كورىنەدى، ويتكەنى بۇل باعالاۋلار ءساۋىر ايىندا جۇرگىزىلگەن. كەلەسى جىلدىڭ بيۋدجەتىن جاساقتاۋ كەزىندە الدىن الا تولەۋ ماسەلەسىن زەرتتەپ، قاراستىرامىز»، - دەپ جاۋاپ بەردى ەربولات دوسايەۆ.