الماتىداعى ناۋرىزباي اۋدانىنىڭ 50 مىڭنان استام تۇرعىنى ورتالىق كوممۋنيكاسيالارمەن قامتىلاتىن بولادى
الماتى اكىمى ەربولات دوسايەۆ ناۋرىزباي اۋدانىنا جۇمىس ساپارى بارىسىندا «كارگالى» سۇزگى ستانسياسىنىڭ كارىز كوللەكتورىن سالۋ بويىنشا اۋقىمدى جوبانى ىسكە اسىرۋ بارىسىمەن تانىستى، دەپ حابارلايدى aqshamnews.kz
بۇل اۋداندا سۋ بۇرۋ ماسەلەسىن تۇبەگەيلى شەشۋ ءۇشىن 2023 جىلدىڭ سوڭىندا «كارگالى» سۇزگى ستانسياسى سالىندى. بۇل ستانسيانىڭ تولىق جۇمىس ىستەۋى ءۇشىن كارىز كوللەكتورىنىڭ قۇرىلىسى قاجەت.
«2019 جىلى «كارگالى» سۇزگى ستانسياسىن جوبالاۋ كەزىندە كارىز كوللەكتورىنىڭ قۇرىلىسى ەسكەرىلمەگەن. وسى كەمشىلىكتەردى جويۋ جانە جۇمىستىڭ دۇرىس رەتتىلىگىن قامتاماسىز ەتۋ ءۇشىن ءبىز ءقازىر ماگيسترالدىق جەلىلەردى جۇرگىزەمىز، سودان كەيىن ولاردى بولەتىن بولامىز. كوللەكتوردىڭ قۇرىلىسى اياقتالعاننان كەيىن ول «قارعالى» سۇزگى ستانسياسىنا قوسىلادى، بۇل تۇرعىنداردى تۇراقتى سۋمەن جانە ورتالىقتاندىرىلعان كارىزبەن قامتاماسىز ەتەدى»، - دەدى ەربولات دوسايەۆ.
كوللەكتوردىڭ جالپى ۇزىندىعى 8،6 كم. جۇمىستى ەنەرگەتيكا جانە سۋمەن جابدىقتاۋ باسقارماسىنىڭ جانە اۋدان اكىمدىگىنىڭ تاپسىرىسى بويىنشا ەكى مەردىگەر ۇيىم - «نكو» جانە «كولساي ستروي» ج ش س جۇرگىزەدى. بۇگىنگى تاڭدا جوبانىڭ دايىندىعى كوللەكتوردىڭ جالپى كولەمىنىڭ شامامەن 70%-ىن قۇرايدى. قۇرىلىس-مونتاج جۇمىستارىن وسى جىلدىڭ قاراشا ايىنىڭ سوڭىنا دەيىن اياقتاۋ جوسپارلانۋدا.
جوبانى ىسكە اسىرۋ قاراعايلى، قۇرامىس، قارعالى جانە تاۋسامالى شاعىن اۋداندارىنىڭ 50 مىڭنان استام تۇرعىنى ءۇشىن سۋ بۇرۋدى قامتاماسىز ەتۋگە مۇمكىندىك بەرەدى. بۇل قارقىندى دامىپ كەلە جاتقان اۋداندا ەكولوگيالىق قاۋىپسىزدىككە ىقپال ەتەدى، لاستانۋ ءقاۋپىن ازايتادى جانە حالىقتىڭ سانيتارلىق جاعدايىن جاقسارتادى.
قالا باسشىسى ناۋرىزباي اۋدانىنىڭ اكىمى مەن ەنەرگەتيكا جانە سۋمەن جابدىقتاۋ باسقارماسىنىڭ باسشىسىنا جۇمىستاردىڭ ورىندالۋ قارقىنىن جەدەلدەتۋدى جانە كوللەكتور قۇرىلىسىنىڭ ساپالى، ۋاقتىلى اياقتالۋىن قامتاماسىز ەتۋدى تاپسىردى.
ەربولات دوسايەۆ كارىز كوللەكتورىنىڭ قۇرىلىسىن اياقتاۋ قالاعا قوسىلعان شاعىن اۋدانداردىڭ تۇرعىندارىنا ورتالىق كوممۋنيكاسيالارعا قوسىلۋعا جانە ناۋرىزباي اۋدانىنىڭ ينفراقۇرىلىمىنىڭ تۇراقتى دامۋىن قامتاماسىز ەتۋگە مۇمكىندىك بەرەتىنىن اتاپ ءوتتى.
