BRT جەلىسى اياقسىز قالدىرىلمايدى.
BRT جوباسى 5 جىلدا اياقتالمادى، ءقازىر رەتتەلمەيتىن جەراستى وتكەلدەرى جانە اۆتوبۋس مارشرۋتتارىنىڭ ءجۇرىس ارالىعىنىڭ بولماۋى سىندى ايقىن ماسەلەلەر بار. بۇل تۋرالى قالا اكىمى المالى اۋدانىنىڭ تۇرعىندارىمەن كەزدەسۋ كەزىندە سۇراققا جاۋاپ بەرە وتىرىپ ايتتى، دەپ حابارلايدى Almaty-akshamy.kz.
«بىرەر كۇن بۇرىن BRT جەلىسى ارقىلى اۆتوبۋسپەن ءجۇردىم. مەن 32ء-شى مارشرۋتتى 33 مينۋت كۇتتىم، ويتكەنى سول كۇنى 4 اۆتوبۋس جولعا شىقپادى. سەبەبى، قالادا اۆتوبۋستار جەتىسپەيدى. مۇنى شەشۋ ءۇشىن بيىل جانە كەلەسى جىلى 300 جاڭا اۆتوبۋس پەن 100 تروللەيبۋس ساتىپ الىنادى»، - دەدى قالا اكىمى ەربولات دوسايەۆ.
اكىمنىڭ ايتۋىنشا، كلاسسيكالىق جوعارى جىلدامدىقتى BRT جەلىسى تيميريازيەۆ-بايتۇرسىنوۆ كوشەلەرىنىڭ قيىلىسىنان باستالىپ، ارنايى جولاق ورنالاسقان جەرگە دەيىن جۇرەدى، ال وسى ۋاقىتقا دەيىن اۆتوبۋستار وڭ جاق جولاقپەن ءجۇرىپ، ءاربىر باعدارشامدا تۇرىپ قالاتىن.
«تۇيتكىلدەر بار جانە ءبىز ولاردى بىرگە شەشەمىز. اياقتالعان جۇمىستى ەشكىم جوققا شىعارمايدى. BRT جەلىسىن اياقسىز قالدىرمايمىز»، - دەدى قالا اكىمى.