مەملەكەت باسشىسىنىڭ جارلىعىمەن تاعايىندالدى
بۇعان دەيىن پرەمەر-مينيستردىڭ ورىنباسارى قىزمەتىن اتقارعان ەرالى توعجانوۆ اقتوبە وبلىسىنىڭ اكىمى بولىپ تاعايىندالدى، دەپ حابارلايدى Almaty-akshamy.kz.
اقتوبە وبلىسى اۋماعىنداعى ءماسليحاتتار دەپۋتاتتارىنىڭ جينالىسى بۇگىن ساعات 14:00-گە بەكىتىلدى.
كۇن تارتىبىنە اقتوبە وبلىسىنىڭ اكىمىن تاعايىنداۋعا كەلىسىم بەرۋ عانا ەنگىزىلدى.
اققاعاز دوسجانوۆا اتىنداعى كونفەرەنس-حوللعا ەكى كانديدات كەلدى. ولار - پرەمەر-مينيستردىڭ ورىنباسارى ەرالى توعجانوۆ پەن اقتوبە قالاسىنىڭ اكىمى اسحات شاحاروۆ.
ۇكىمەت باسشىسى ءاليحان سمايىلوۆ ءماسليحات دەپۋتتاتتارىنا ەكى كانديداتتى تانىستىرىپ، كەيىن ولار ءوز باعدارلاماسىن ۇسىندى.
كانديدات ەرالى توعجانوۆ وبلىستىڭ الەۋمەتتىك-ەكونوميكالىق دامۋ كورسەتىشىن ارتتىرىپ، كادر دايىنداۋ جۇمىسىنا باسا ءمان بەرەتىنىن ايتتى.
سونىمەن بىرگە تۋريستىك الەۋەتتى دامىتۋ جوبالارىن ۇسىندى. ءارى وڭىردە اۆتوموبيل جولدارى ساپاسىن جاقسارتۋ جوباسىن ايتتى.
كانديدات اسحات شاحاروۆ تا جول، كاسىپكەرلىك پەن اۋىل شارۋاشىلىعى سالاسىن دامىتۋ جولىن ۇسىندى. قالا اكىمى قىزمەتىندەگى اسحات شاحاروۆ ەكى جىلدا شاھاردا ءبىرقاتار ءىس قولعا الىنىپ، ءساتتى ىسكە اسقانىن باسا جەتكىزدى.
كەيىن داۋىس بەرۋگە كەزەك كەلدى. اشىق داۋىس بەرۋ ناتيجەسى بويىنشا 160 دەپۋتاتتىڭ 104ء-ى ەرالى توعجانوۆتىڭ كانديداتۋراسىنا داۋىس بەردى، ال 56-سى اسحات شاحاروۆتى تاڭدادى.
وسىلايشا ەرالى توعجانوۆ مەملەكەت باسشىسىنىڭ جارلىعىمەن اقتوبە وبلىسىنىڭ اكىمى بولىپ تاعايىندالدى. ول قازاقستان رەسپۋبليكاسى پرەمەر-مينيسترىنىڭ ورىنباسارى لاۋازىمىنان بوساتىلدى.
ايتا كەتەيىك، ول 1963 جىلعى 13 مامىردا باتىس قازاقستان وبلىسىندا دۇنيەگە كەلگەن.
1988 جىلى قاراعاندى مەملەكەتتىك ۋنيۆەرسيتەتىن، 1994 جىلى قازاقستان رەسپۋبليكاسىنىڭ عىلىم اكادەمياسىنىڭ مەملەكەت جانە قۇقىق ينستيتۋتىن ءتامامداعان. ماماندىعى بويىنشا بىلىكتىلىگى — زاڭگەر.
ەڭبەك جولىن 1980 جىلى ورال وبلىسى، وكتيابر ورمان شارۋاشىلىعىنىڭ جۇمىسشىسى رەتىندە باستاعان.
1988-2001 جىلدارى — قاراعاندى مەملەكەتتىك ۋنيۆەرسيتەتىندە وقىتۋشى، ق ر عىلىم اكادەمياسىنىڭ مەملەكەت جانە قۇقىق ينستيتۋتىنىڭ ديرەكتورى، فاكۋلتەت دەكانى، قازاق مەملەكەتتىك زاڭ ۋنيۆەرسيتەتىنىڭ فيليالىنىڭ ديرەكتورى.
2001-2006 جىلدارى — قاراعاندى وبلىسى اكىمىنىڭ ورىنباسارى.
2006-2008 جىلدارى — قازاقستان رەسپۋبليكاسى ادىلەت مينيسترلىگىنىڭ ءدىن ىستەرى جونىندەگى كوميتەت ءتوراعاسى.
2008-2017 جىلدارى — قازاقستان حالقى اسسامبلەياسى ءتوراعاسىنىڭ ورىنباسارى، ق ر پرەزيدەنتى اكىمشىلىگىنىڭ قازاقستان حالقى اسسامبلەياسىنىڭ حاتشىلىعىنىڭ مەڭگەرۋشىسى، ق ر پرەزيدەنتى اكىمشىلىگىنىڭ ىشكى ساياسات ءبولىمىنىڭ سەكتور مەڭگەرۋشىسى.
2017-2019 جىلدارى — ماڭعىستاۋ وبلىسىنىڭ اكىمى.
2019-2020 جىلدارى — ق ر كاسىپوداقتار فەدەراسياسىنىڭ ءتوراعاسى.
2022 جىلعى 11 قاڭتاردا ق ر پرەزيدەنتىنىڭ جارلىعىمەن قازاقستان رەسپۋبليكاسى پرەمەر-مينيسترىنىڭ ورىنباسارى بولىپ قايتا تاعايىندالدى.