الماتى مەملەكەتتىك قۋىرشاق تەاترى «ناۋرىزناما» ونكۇندىگى شەڭبەرىندەگى شاڭىراق كۇنى بالالار نازارىنا «ەر توستىك» سپەكتاكلىن ۇسىندى.
«ەر توستىك» ەرتەگىسىنىڭ تەاتر تورىنە شىعىپ، پوەتيكالىق دراما جانرىندا ساحنالانعانىنا بىرەر جىلدىڭ عانا ءجۇزى بولدى. جىل وتكەن سايىن كىشكەنتاي كورەرمەندەرى كوبەيمەسە، ازايعان جوق.
بۇل – ءتىلى وتە باي قيال-عاجايىپ ەرتەگىلەردىڭ ءبىرى. سەگىز اعاسىن ىزدەپ شىققان توستىك جولىندا كەزدەسكەن بارلىق كەدەرگىنى اقىل-ايلاسىمەن جانە كولتاۋىسار، جەلاياق، شاپشاڭ، ساققۇلاق، شالقۇيرىق سىندى دوستارىنىڭ كومەگىمەن جەڭىپ شىعادى. جاڭاشىل يدەيا مەن ۇلتتىق قۇندىلىقتاردى قابىستىرا بىلگەن قويىلىم بالالارعا ۇناعانى انىق. سەبەبى، قۋىرشاقتار بەينەسىندەگى كەيىپكەرلەردىڭ ءار قيمىلىن، ءار ءسوزىن بالدىرعاندار اتا-انالارىمەن بىرگە تاپجىلماي كورىپ، تىڭداپ وتىردى. بىزگە كەرەگى دە سول. بالالار الەمى ەڭ شىنايى. ءارى ولار نە نارسەنى دە تەز ءسىڭىرىپ الادى. كىشكەنتاي جۇرەكتەرگە جول تاپقان «ەر توستىك» باتىرلىق، دوسقا ادالدىق، قايسارلىق، قايىرىمدىلىق، ادامگەرشىلىك، وتاندى ءسۇيۋ سىندى قۇندىلىقتاردى ناسيحاتتايدى.
– ءبىز «ەر توستىك» ەرتەگىسىن كىتاپتان وقىپ وسكەن ۇرپاقپىز. ال بۇگىن نەمەرەم سپەكتاكل تۇرىندە كوردى. بۇل – كەرەمەت! قازاقتىڭ رۋحاني قازىناسىن الاقانداي ۇيالى تەلەفونعا ءجىپسىز بايلانعان قازىرگى ۇرپاققا وسىلاي جەتكىزىپ وتىرۋ ءلازىم. ءبىر مەزگىل وسىلاي ويىن ءبولىپ، كوڭىلىن سەرگىتىپ، تەاترعا اكەلىپ تۇرۋىمىز كەرەك. قىزىقتى ءارى شىم-شىتىرىق وقيعالاردى كەشە وتىرىپ، ارمانىنا جەتەتىن توستىك باتىر مەن ونىڭ دوستارىنىڭ اۋىزبىرشىلىگى ءبىزدىڭ بالالارىمىزعا وڭ اسەر ەتەتىنى ءسوزسىز. بالامنىڭ اسەرلەنىپ شىققانىن كورىپ ءوزىم دە قۋانىپ تۇرمىن، – دەيدى الماتىلىق باعلان ەسىمدى كىشكەنتاي كورەرمەننىڭ اپاسى، زەينەتكەر-ۇستاز ءسابيرا ەسەن قىزى.
ايتا كەتەيىك، «ەر توستىك» جانرى – پوەتيكالىق دراما. اۆتورى – اقىن قاسىمحان بەگمانوۆ، ال رەجيسسەرى – ەركەبۇلان قابدىل.
