بۇگىنگىدەي باعا تۇراقسىز كەزەڭدە اقشانىڭ باسىن قالاي قۇراعان ءجون؟
دەپوزيت پە، باسپانا ساتىپ الۋ ما؟ قايسىسى تيىمدىرەك. قوعامدا تۇيىتكىلى كوپ وسى ساۋالدىڭ جاۋابىن krisha.kz ماماندارى ىزدەپ كورگەن، دەپ حابارلايدى اlmaty-akshamy.kz.
ساراپشىلار ەسەپتەۋگە وڭتايلى بولۋ ماقساتىن وتكەن جىلعى كورسەتكىشتەردى باعىت-باعدار ەتىپ العان. دەمەك، ءبىر جىل ىشىندەگى پاتەر قۇنىنىڭ وزگەرۋى، ورتاشا جالداۋ اقىسى، ءبىر جىلداعى ينفلياسيا دەڭگەيى جانە ت.ب. ەسكەرىلگەن. ماماندار سالىستىرۋ ءۇشىن شامامەن ەكى بولمەلى پاتەر قۇنىنا تەڭ 25 ملن تەڭگەنى العان.
سونىمەن اقشانى دەپوزيتتە ساقتاۋ ءتيىمدى مە؟
قازاقستانداعى بانكتەردە ۇلتتىق ۆاليۋتاداعى دەپوزيت بويىنشا ورتاشا مولشەرلەمە جىلىنا 14% قۇرايتىنىن ەسكەرسەك، وتكەن جىلدىڭ قاڭتار ايىندا دەپوزيتكە 25 ميلليون تەڭگە سالساڭىز، ءبىر جىلدان كەيىن سىياقى 3 500 000 تەڭگەنى قۇرايتىن ەدى. بۇل سومانى دوللارعا ايىرباستاعاندا (قاڭتاردا ورتاشا باعام 453 تەڭگە بولدى)، 55،2 مىڭ دوللار بولاتىن ەدى. ءبىر جىلدا 1% سىياقى مولشەرلەمەسى بار دەپوزيتتەن (قازاقستانداعى بانكتەردە شەتەل ۆاليۋتاسى بويىنشا دەپوزيتتىڭ ەڭ جوعارى مولشەرلەمەسى) 551 دوللار الاسىز. بيىل قاڭتاردىڭ باسىندا دوللار 456 تەڭگە بولدى. ءبىر جىلدا دوللارداعى دەپوزيتتىڭ پايداسى 250 000 تەڭگەنى قۇرايتىن ەدى. ۆاليۋتالىق دەپوزيت اشقاندا باعانىڭ تەڭگەگە قاتىستى ءوسۋ مۇمكىندىگى بار. دوللار كوتەرىلسە، تابىس تا كوپ بولار ەدى. دەگەنمەن بىلتىر ۇلتتىق ۆاليۋتا ءوزىن تۇراقتى كورسەتتى، جىل باسىندا جانە اياعىندا ايىرباستاۋ باعامى بىردەي بولدى.
ال جىلجىمايتىن مۇلىككە ينۆەستيسيا سالۋ قانشالىقتى پايدا الىپ كەلەدى؟
سونىمەن، 25 ملن تەڭگەگە ءۇي ساتىپ الساڭىز، قانشا پايدا كورەسىز؟ بىلتىر قاڭتاردا 25 ملن تەڭگەگە 2 بولمەلى پاتەر الۋعا بولاتىن ەدى. مىسالى، استانانىڭ سول جاعالاۋىنداعى ەكونوم كلاستاعى جاڭا سالىنىپ جاتقان تۇرعىن ءۇي كەشەندەرى. جوندەۋ جۇمىستارىن جاساۋدىڭ قاجەتى جوق. پاتەردى ساتىپ العاننان كەيىن بىزدە ەكى جول بار: پاتەرگە اقشا سالماي، ونى ءبىر جىلدان كەيىن ساتىپ جىبەرۋ نەمەسە جيھازعا اقشا جۇمساپ، جالعا بەرۋ. ۇلتتىق ستاتيستيكا بيۋروسىنىڭ مالىمەتى بويىنشا، ءبىر جىلدا (2023 جىلدىڭ قاڭتارىنان 2024 جىلدىڭ قاڭتارىنا دەيىن) ەلوردادا جاڭا قۇرىلىستاعى پاتەرلەر ورتاشا ەسەپپەن 1،7%-عا قىمباتتاعان. وسىلايشا 25 ملن تەڭگە ۇستىنە 425 مىڭ تەڭگە قوسىلدى. پاتەردى ءبىر جىلدان كەيىن جارتى ميلليون تەڭگەگە قىمباتىراق ساتۋعا بولاتىن ەدى. ەسكەرەتىن جايت، 10% مولشەرىندە سالىق تولەگىڭىز كەلمەسە، پاتەردى ءبىر جىلدان كەيىن ساتۋ ءتيىمدى.