ەقىۇ پارلامەنتتىك اسسامبلەياسىندا ارال تەڭىزىنىڭ پروبلەمالارى تالقىلاندى

ارال ەكولوگياسى مۇزدىقتاردىڭ ەرۋى مەن مۇحيت دەڭگەيىنىڭ جوعارىلاۋى سەبەپتەرىنىڭ بىرىنە اينالىپ وتىر. 

بيرمينگەم قالاسىندا (ۇلىبريتانيا) ەۋروپاداعى قاۋىپسىزدىك جانە ىنتىماقتاستىق ۇيىمى پارلامەنتتىك اسسامبلەياسىنىڭ جازعى سەسسياسى ءوز جۇمىسىن باستادى. وعان قازاقستان رەسپۋبليكاسى پارلامەنتىنىڭ دەلەگاسياسى قاتىستى، دەپ حابارلايدى Almaty-akshamy.kz. Egemen.kz سىلتەمە جاساپ.

ەقىۇ پا تۇراقتى كوميتەتىنىڭ وتىرىسى بارىسىندا قازاقستان دەلەگاسياسىن باستاعان اسقار شاكىروۆ پەن وزبەكستان دەلەگاسياسىن باستاپ كەلگەن سادىق سافويەۆ ۇيىمدى جانە وعان مۇشە مەملەكەتتەردى ارال تەڭىزىن قۇتقارۋ جونىندەگى جوبالاردى ىسكە اسىرۋعا دونور بولۋعا شاقىرىپ، ەكى ەل پارلامەنتتەرىنىڭ بىرلەسكەن ۇندەۋىن جاريا ەتتى.

سەسسياعا قاتىسۋشىلارعا تاراتىلعان قۇجاتتا سوڭعى 60 جىلدا ەڭ اۋقىمدى جابىق سۋ ايدىنىنىڭ بۇرىن-سوڭدى بولماعان كولەمدە ازايۋىنا جانە سورتاڭدانۋىنا نازار اۋدارىلدى. شاڭدى داۋىلدار جىل سايىن 100 ميلليون توننادان استام مايدا تۇزدى شاڭدى، ۋلى تۇز بەن قۇمدى مىڭداعان شاقىرىمعا اكەتەدى، ەۋروپا ەلدەرىنە، جاپون ارالدارى مەن انتاركتيداعا جەتكىزىپ، مۇزدىقتاردىڭ ەرۋى مەن مۇحيت دەڭگەيىنىڭ جوعارىلاۋى سەبەپتەرىنىڭ بىرىنە اينالىپ وتىر.

ونكولوگيالىق اۋرۋلار ەڭ جوعارى پايىزدى كورسەتىپ وتىرعان ورتالىق ازياداعى ارال ءوڭىرى حالقىنىڭ دەنساۋلىق جاعدايىنىڭ كۇرت ناشارلاۋىنا تۇرعىلىقتى جەردىڭ ەكولوگيالىق ازىپ-توزۋى سەبەپ بولعانى اتاپ ءوتىلدى.

ەكولوگيالىق اپاتتىڭ اۋقىمى ارال تەڭىزى باسسەينىندەگى الەۋمەتتىك-ەكونوميكالىق جانە ەكولوگيالىق احۋالدى ساۋىقتىرۋ جونىندەگى پروبلەمالاردى كەشەندى شەشۋ ءۇشىن وڭىردەگى ەلدەردىڭ عانا ەمەس، بۇكىل حالىقارالىق قوعامداستىقتىڭ كۇش-جىگەرىن بىرىكتىرۋ تالاپ ەتەتىنى اتاپ ءوتىلدى. قازاقستان مەن وزبەكستان كوشباسشىلارى قاسىم-جومارت توقايەۆ پەن شاۆكات ميرزيەيەۆ وسىنداي ورتاق پىكىرگە شاقىرۋدا.