ەپيداحۋالىمىز جاۋاپكەرشىلىكتىڭ جوقتىعىنان جاقسارماي وتىر

ۆيرۋستىڭ جاڭا ءتۇرى ۋشىعىپ تۇرعان كەزەڭدە ءار ازامات ءوزى ءۇشىن، وتباسى ءۇشىن جاۋاپكەرشىلىك الۋى كەرەك.

 كوۆيدتىق جاعدايى اسقىنىپ تۇرعان قالانىڭ باسشىسى باقىتجان ساعىنتايەۆ وسىلاي دەيدى، دەپ حابارلايدى Almaty-akshamy.kz ءتىلشىسى.

قالانىڭ قازىرگى احۋالى جايلى مالىمەت بەرگەن اكىم بىلاي دەدى: «كۇندەلىكتى مالىمەتتەردى اقپارات قۇرالدارىنان ءبىلىپ وتىرسىزدار. ءبىرقالىپتى دەڭگەيدە تۇرمىز. ءبىراق وسىلاي كەتە بەرسە، جاعداي بۇدان ءارى ناشارلاۋى مۇمكىن. ول كەزدە دەنساۋلىق ساقتاۋ سالاسىنا دا وڭاي تيمەيدى. سوندىقتان سانەپيدەميولوگ-دارىگەرلەردىڭ تالابىنا بارشامىز باعىنۋعا ءتيىسپىز. ول ەڭ قاراپايىم – بەتپەردە تاعۋ، قاشىقتىق ساقتاۋ، كوپشىلىك جيىنعا بارماۋ دەگەن تالاپ. ەكى ميلليون تۇرعىنى بار قالانىڭ 115 مىڭ ادامى اۋىرىپ جاتىر دەگەن ستاتيستيكا جاقسى كورسەتكىش ەمەس.»

 مەگاپوليس باسشىسىنىڭ ايتۋىنشا، قالاداعى ۋشىققان جاعدايعا قاراماستان، كارانتين تالاپتارىنا باعىنعىسى كەلمەيتىندەر دە بارشىلىق.

 «جاعدايدىڭ بارلىعىن ءتۇسىندىرىپ ايتىپ، شارا قولدانساق تا، قىزمەت كورسەتۋ سالاسىنداعى كاسىپكەرلەر شەكتەۋگە باعىنباي وتىر. ءبىز ولاردى قانشا جەردەن تەكسەرىپ، ايىپپۇل سالىپ، ليسەنزياسىن الىپ، سوتقا بەرىپ جاتساق تا، ولار جۇمىستى توقتاتپاي وتىر. بۇل دەگەن ەشقانداي جاۋاپكەرشىلىكتىڭ جوقتىعى. ەكپە سالدىرۋدى توقتاتپاۋىمىز كەرەك. الىپ-قاشپا اڭگىمەدەن گورى اركىم ءوزىنىڭ دەنساۋلىعىن ويلاۋى قاجەت»، - دەدى باقىتجان ءابدىر ۇلى.