پرەمەر-مينيستر ولجاس بەكتەنوۆتىڭ توراعالىعىمەن وتاندىق كاسىپكەرلەر كەڭەسىنىڭ وتىرىسى ءوتتى
ماقساتى – پرەزيدەنتتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىنداعى مىندەتتەردى ىسكە اسىرۋ شەڭبەرىندە كاسىپكەرلىكتى دامىتۋدىڭ وزەكتى ماسەلەلەرىن تالقىلاۋ جانە ءوزارا ءىس-قيمىل شارالارىن قاراستىرۋ.
ولجاس بەكتەنوۆ مەملەكەت ينۆەستيسيالىق تارتىمدىلىقتى ارتتىرۋ، ونەركاسىپتىك الەۋەتتى اشۋ، ينفراقۇرىلىمدىق ماسەلەلەردى شەشۋ جانە ەكونوميكانىڭ ناقتى سەكتورىن دامىتۋ بويىنشا اۋقىمدى جۇمىستار اتقارىپ جاتقانىن اتاپ ءوتتى. ءىرى بيزنەس ەلىمىزدىڭ تەحنولوگيالىق جانە يننوۆاسيالىق دامۋىندا ماڭىزدى ءرول اتقارا وتىرىپ، شاعىن جانە ورتا كاسىپكەرلىكتى دامىتۋعا ىقپال ەتۋدە.
تالقىلاۋ بارىسىندا ەنەرگەتيكا، مۇناي-گاز سەكتورى، مەتاللۋرگيا، اۋىل شارۋاشىلىعى، كولىك، قارجى، دەنساۋلىق ساقتاۋ، ءىت، تۋريزم سالالارىنىڭ وكىلدەرى ۇسىنىستارىن ءبىلدىردى. مەتالداردى تەرەڭ وڭدەۋ، مۇناي-گاز حيمياسى جانە باسقا دا باسىم سالالارداعى جاڭا جوبالارعا باسا نازار اۋدارىلدى. وتاندىق تاۋار وندىرۋشىلەردى قولداۋ ماسەلەلەرى دە كوتەرىلدى.
ەلىشىلىك قۇندىلىقتى دامىتۋعا ەرەكشە كوڭىل ءبولىندى. ۇكىمەت «اتامەكەن» ۇكپ-مەن بىرلەسىپ، تاۋارلارداعى، جۇمىستار مەن قىزمەتتەردەگى قازاقستاندىق قامتۋ ۇلەسىن ارتتىرۋعا ارنالعان جاڭا ءادىسنامانى ازىرلەۋدە. ولجاس بەكتەنوۆ بۇل تەتىكتىڭ ءادىل بولاتىنىن جانە وتاندىق كاسىپورىندارعا سەرپىن بەرەتىنىن اتاپ ءوتتى.
جاساندى ينتەللەكت جۇيەلەرىن كەڭەيتۋ جانە سيفرلىق تەحنولوگيالاردى دامىتۋ ماسەلەلەرى دە قارالدى. تۋريزم، تۇرعىن ۇي-كوممۋنالدىق شارۋاشىلىق، «جاسىل» قارجىلاندىرۋ سالاسىندا ەكولوگيالىق تازا، ەنەرگيا ۇنەمدەيتىن جانە تومەن كومىرتەكتى جوبالاردى ىسكە اسىرۋدىڭ ماڭىزدىلىعى ايتىلدى.
بيزنەس وكىلدەرى مەملەكەت باسشىسىنىڭ اتوم ەنەرگەتيكاسىن دامىتۋ باستاماسىن قولداي وتىرىپ، ەنەرگيا تاپشىلىعى جاعدايىندا ونەركاسىپ پەن جاڭا نىسانداردى دامىتۋ ءۇشىن تۇراقتى ەنەرگيا كوزىنىڭ قاجەتتىلىگىن اتاپ ءوتتى. ەگەر 6 قازاندا وتەتىن رەفەرەندۋمدا اتوم ەلەكتر ستانساسىن سالۋ بويىنشا وڭ شەشىم قابىلدانسا، بۇل ەلدەگى وندىرىستەردىڭ ەنەرگەتيكالىق قاجەتتىلىكتەرىن جابۋعا جانە جاڭا جۇمىس ورىندارىن اشۋعا مۇمكىندىك بەرەدى.