الماتى تۇرعىندارى مەن قوناقتارى تازالىقتى قولدايدى — قالا كۇنىنە ارنالعان كونسەرتتەن كەيىن كورەرمەندەر اۋماقتى وزدەرى جينادى، دەپ حابارلايدى aqshamnews.kz
الماتىدا قالا كۇنىنە وراي استانا الاڭىندا «LUX FM» راديوستانسياسىنىڭ كونسەرتى ءوتتى. قازاقستاندىق ەسترادا جۇلدىزدارىنىڭ قاتىسۋىمەن وتكەن ءىس-شارا مىڭداعان كورەرمەندى جينادى. كورەرمەندەر مۋزىكالىق نومىرلەر مەن ءتۇرلى-تۇستى شوۋلاردى تاماشالادى.
كونسەرت اياقتالعان سوڭ، جۇرگىزۋشىلەر جينالعان قاۋىمعا اۋماقتى تازالاۋعا كومەك سۇراپ ۇندەۋ جاسادى. ولار مۇنداي اۋقىمدى مەرەكەدەن كەيىن تازالىق پەن ءتارتىپتى ساقتاۋدىڭ ماڭىزدىلىعىن اتاپ ءوتتى.
وسى ۇندەۋگە جاۋاپ رەتىندە ەرەسەكتەر مەن جاستار بالالارىمەن بىرگە بەلسەندىلىك تانىتىپ، ءىس-شارادان كەيىن قالعان قوقىستاردى جيناۋعا اتسالىستى.
مۇنداي ۇجىمدىق كۇش-جىگەر قالالىقتاردىڭ مەرەكەدەن ءلاززات الىپ قانا قويماي، ءوز قالاسىنا قامقورلىق كورسەتىپ، ونىڭ تازالىعى مەن ءتارتىبىن ساقتاۋعا دايىن ەكەندىكتەرىن كورسەتتى.
ايتا كەتەيىك، الماتى مەن ەلىمىزدىڭ باسقا قالالارىندا «تازا قازاقستان» رەسپۋبليكالىق ەكولوگيالىق باعدارلاماسى جۇزەگە اسىرىلۋدا. باعدارلاماعا تانىمال سپورتشىلار، ارتىستەر، تەاتر جانە كينو جۇلدىزدارى، ەرىكتىلەر مەن قوعامعا بەيجاي قارامايتىن ازاماتتار قاتىسۋدا. رەسپۋبليكا بويىنشا تازالىق جۇمىستارىن جۇرگىزۋ جانە جاسىل جەلەكتەر وتىرعىزۋ جالعاسۋدا.
- قالا كۇنىنە وراي مەگاپوليستە كوپتەگەن شارالار جوسپارلانعان. تۇڭعىش پرەزيدەنت ساياباعىندا بىرنەشە قويىلىمدار وتەدى. ساعات 14:30-دان باستاپ روزا رىمبايەۆا مەن الماتى اكىمىنىڭ ەسترادالىق-سيمفونيالىق وركەسترى باستى ساحنادا ونەر كورسەتەدى.
- ارباتتا ساعات 11:00-دەن باستاپ «تۋعان كۇنىم، الماتىم» فەستيۆالى وتەدى، وندا قالا تۇرعىندارى مەن قوناقتارى سۋرەتشىلەر كورمەسى، قولونەرشىلەر جارمەڭكەسى، شەبەرلىك سىنىپتارى جانە باسقا دا شارالارعا قاتىسا الادى.
- سونىمەن قاتار، مۇندا جىل سايىنعى كىتاپ fest فەستيۆالى دە ءوز جۇمىسىن جالعاستىرۋدا.
ساعات 17:00-دە استانا الاڭىندا قازاقستاندىق ەسترادا جۇلدىزدارىنىڭ قاتىسۋىمەن Almaty Cover Show باستالادى. ساحنادا ناعيما ەسقالييەۆا، مەيرامبەك بەسبايەۆ، Kalifarniya، RaiM، نۇرلان مەن مۇرات، ARO، ەربولات قۇدايبەرگەن، قايرات تۇنتەكوۆ جانە باسقا دا ورىنداۋشىلار ونەر كورسەتەدى. سول كۇنى ورتالىق ستاديوندا ەلىمىزدىڭ ەڭ تانىمال جاس انشىلەرىنىڭ ءبىرى سادراددين جەكە كونسەرت بەرەدى.
قالا كۇنىن مەرەكەلەۋدىڭ سوڭعى اككوردى رەتىندە «كوكتوبە» تەلەمۇناراسىندا قۇتتىقتاۋ شامدارى جاعىلادى.