قازاقستاننىڭ ەنەرگەتيكا مينيسترلىگى كەيبىر وتىن تۇرلەرى رەسەيدەن ساتىپ الىنىپ جاتقانىن راستادى، دەپ حابارلايدى Almaty-akshamy.kz.
«ىشكى نارىقتا جانار-جاعارماي ماتەريالدارىنىڭ قاجەت كولەمىن ەسەپتەي كەلە، مۇناي ونىمدەرىنىڭ جەكەلەگەن تۇرلەرى رەسەيدەن يمپورتتالادى. بيتۋمعا قاتىستى توقتالساق، 2023 جىلعى 19 شىلدەدە ق ر مەن رەسەي فەدەراسياسى اراسىنداعى كەلىسىم اياسىندا رف-تەن جىلىنا 300 مىڭ تونناعا دەيىن بيتۋم جەتكىزۋدى قاراستىراتىن حاتتاماعا قول قويىلدى»، - دەلىنگەن مينيسترلىكتىڭ حابارلاماسىندا.
جاۋاپتا ايتىلعانداي، اي-95 بەنزينىنە باعا سۇرانىس پەن ۇسىنىس نەگىزىندە رەتتەلەدى.
«جازعى دەمالىس كەزەڭىنىڭ ەرەكشەلىگىن جانە وسى كەزدەگى اي-95 بەنزينىنە سۇرانىستىڭ ارتۋىن ەسكەرە وتىرىپ، ءىرى جانارماي قۇيۋ ستانسيالارى جەلىلەرى يمپورت جاساۋى مۇمكىن ەكەنىن مينيسترلىك تۇسىندىرگەن ەدى. بۇل تۇرعىدا رەسەي فەدەراسياسىنىڭ ەنەرگەتيكا مينيسترلىگىمەن ينديكاتيۆتىك تەڭگەرىم ەسكەرىلگەن. سونىمەن قاتار، اي-95 باعاسىن مەملەكەت رەتتەمەيدى. سوندىقتان جانارماي قۇيۋ بەكەتتەرىندەگى باعالار مەن ساتىپ الۋ كولەمى نارىقتاعى سۇرانىس پەن ۇسىنىسقا بايلانىستى وزگەرۋى مۇمكىن»، - دەپ اتالىپ وتكەن مينيسترلىك اقپاراتىندا.
بۇدان بولەك، ەنەرگەتيكا مينيسترلىگى بۇعان دەيىن ءورت ءقاۋپى مەن يمپورتتىڭ كوپ بولۋىنا بايلانىستى بيىلدىڭ 14 ماۋسىمى مەن 14 شىلدەسى ارالىعىندا (نارىقتاعى جاعداي تۇراقتانعانعا دەيىن) رەسەيلىك اۆياكەروسيندى تەمىرجول كولىگىمەن اكەلۋگە ءتيىستى شەكتەۋ ەنگىزىلگەنىن ەسكە سالدى.
«قازىرگى كەزدە اۆياوتىن نارىعىنداعى جاعداي تۇراقتاندى. جوعارىدا ايتىلعاندارعا بايلانىستى، سونداي-اق اۋەجايلاردان تۇسكەن وتىنىشتەردى ەسكەرە وتىرىپ، مينيسترلىك رەسەيلىك اۆياكەروسيننىڭ يمپورتىنا كونۆەنسيالىق تىيىم سالۋ مەرزىمىن ۇزارتۋ تۋرالى باستاما كوتەرمەدى»، - دەلىنگەن ۆەدومستۆو جاۋابىندا.
بۇدان بۇرىن حابارلانعانداي، ەنەرگەتيكا مينيسترلىگى رەسەي فەدەراسياسىنان اۆياكەروسين يمپورتىنا نەلىكتەن تىيىم سالىنعانىن ءتۇسىندىردى.