الماتىدا 2025 جىلى جالپى ۇزىندىعى 270 شاقىرىم بولاتىن 326 كوشەگە ورتاشا جوندەۋ جۇمىستارى جۇرگىزىلەدى دەپ جوسپارلانعان. سونىڭ ىشىندە جەتىسۋ اۋدانىندا 26،2 شاقىرىمعا سوزىلعان 33 كوشە قامتىلدى. ونىڭ 15ء-ى كەمەل شاعىناۋدانىندا ورنالاسقان، مۇندا شامامەن 17 شاقىرىم جول جاڭارتىلدى،-دەپ حابارلايدى Aqshamnews.kz.
جوندەلەتىن تىزىمگە جايسان، پوستىشيەۆ، ەسىم حان، جولىمبەت، پاللادين، بورالداي جانە باسقا دا كوشەلەر كىردى. اسىرەسە، پوستىشيەۆ كوشەسى ەرەكشە ماڭىزعا يە، ول شاعىناۋداننىڭ نەگىزگى كولىك ارتەرياسى سانالادى جانە قالانى قالا ماڭىنداعى ەلدى مەكەندەرمەن بايلانىستىرادى.
بىرنەشە جىل بۇرىن بۇل كوشەدە ينجەنەرلىك جەلىلەر تارتىلعان بولاتىن، سول سەبەپتى تۇرعىندار جوندەۋ جۇمىستارىن E-otinish جۇيەسى جانە ەسەپتىك كەزدەسۋلەر ارقىلى بىرنەشە رەت سۇراعان.
— بۇگىندە اۋدان بويىنشا 31 كوشەدە جول جامىلعىسى توسەلدى. كەمەل شاعىناۋدانىندا ينجەنەرلىك جەلىلەر جۇرگىزىلگەن سوڭ كوپتەگەن كوشە قازىلىپ قالعان ەدى. سول جۇمىستار اياقتالعاننان كەيىن جوندەۋ باستالدى. اسفالت توسەلىپ، تروتۋارلار جاسالدى، جول سىزىقتارى مەن بەلگىلەر قويىلدى. ەندى قالعان ەكى كوشە قازان ايىنىڭ سوڭىنا دەيىن اياقتالادى. شارت بويىنشا مەرزىم 30 قاراشاعا دەيىن بەلگىلەنگەن. مەردىگەرلەرگە 5 جىلدىق كەپىلدىك قاراستىرىلعان: وسى ۋاقىت ىشىندە اقاۋدى ءوز ەسەبىنەن جويادى، — دەدى الماتى قالالىق موبيلدىلىك باسقارماسى جول جەلىلەرىن دامىتۋ ءبولىمىنىڭ باسشىسى نۇرزات وردابايەۆ.
جۇمىستار كەشەندى تۇردە جۇرگىزىلدى: شامامەن 6-10 ادامنان تۇراتىن 15 بريگادا جانە 27 بىرلىك تەحنيكا تارتىلدى. اسفالت كۇندىز دە، تۇندە دە توسەلدى.
— نەگىزگى جۇمىستار جول بويىندا اياقتالدى، تروتۋارلاردا ۇساق كەمشىلىكتەردى تۇزەتۋ مەن ليۋكتەردى كوتەرۋ عانا قالدى. ءبىز بۇل سالادا كوپ جىلدان بەرى جۇمىس ىستەپ كەلەمىز جانە ءاردايىم ساپانى جوعارى دەڭگەيدە ۇستاۋعا تىرىسامىز. بارلىق نىسانعا 5 جىلدىق كەپىلدىك بەرىلگەن، — دەدى ۋچاسكە باستىعى يۋريي چجەن.
كەمەل شاعىاۋدانىنىڭ تۇرعىندارى جوندەۋ جۇمىستارىنا ەرەكشە ريزا. ەكاتەرينا ترەگۋبەنكو بىلاي دەيدى:
— بىرنەشە جىل بويى پوستىشيەۆ كوشەسىندە ينجەنەرلىك جەلىلەر تارتىلىپ، اينالا لاي مەن شۇڭقىرعا تولى ەدى. كولىكتەر مەن اۆتوبۋستار باتىپ قالاتىن، بالالار ۇيگە جەتۋ ءۇشىن اياقتارىنا پاكەت كيەتىن. ەندى ءبارى وزگەردى: اسفالت توسەلگەن جول، تروتۋارلار مەن جۇرگىنشىلەر وتكەلدەرى بار. ۇيگە تىنىش ءارى ىڭعايلى جەتەمىز، بالالار ءۇشىن ءقاۋىپسىز. اۋدان بيلىگى تۇرعىندارمەن جول جاعدايىن تالقىلاعان ەدى، مىنە، ناتيجەسى. ءيا، ءالى اسفالت توسەلمەگەن كوشەلەر بار، ءبىراق كەلەسى جىلى ولار دا جوندەۋ تىزىمىنە ەنەدى دەپ ۋادە بەردى.
مامانداردىڭ ايتۋىنشا، جاڭارتىلعان جولدار اۋداننىڭ كولىك قولجەتىمدىلىگىن ارتتىرىپ، جول قاۋىپسىزدىگىن جاقسارتادى جانە قالا تۇرعىندارىنىڭ ءومىر ءسۇرۋ ساپاسىن ايتارلىقتاي ارتتىرادى.