ەندى ترامۆايمەن قىدىرامىز

ترامۆايمەن سەرۋەن جاندانباق

ەندى الماتىلىقتار مەن قالا قوناقتارى ورتالىق ساياباقتا ترامۆايمەن قىدىرا الادى. ءبىراق ول رەلسپەن ەمەس، دوڭگەلەكپەن جۇرەدى، دەپ حابارلايدى Almaty-akshamy.kz.

قۇراستىرۋشىلار كولىكتى شاھاردىڭ بۇرىنعى اتاۋىمەن «الما-اتا» دەپ اتاعان. قالا تۇرعىندارىنىڭ ايتۋىنشا، رەترو-ۆاگون 1980 جىلدارى مەگوپوليستە جۇرگەن «لM-33» ماركالى ترامۆايعا ۇقسايدى. ترامۆايدا 12 ورىن بار. ۆاگون كەزىندە لەنينگرادتا شىعارىلعان «لم-33» نەمەسە حالىق اراسىندا «امەريكانكا» دەپ اتالعان ترامۆايعا ۇقساتىپ، قولدان قۇراستىرىلدى. ونى ەدىل كوبەبايەۆ باستاعان 4 جىگىت جاساپ شىعارعان. ولار رەتروكولىكتى قۇراستىرۋعا 3 ايعا جۋىق ۋاقىت جۇمساعان.

قالا قوناقتارىنىڭ ىشىندە بۇل كولىك ءتۇرىن مۇلدە كورمەگەندەر دە بار ەكەن.

الماتىدا ترامۆاي 1937 جىلى پايدا بولدى. 90-شى جىلداردان باستاپ ونىڭ قوزعالىسىنا شەكتەۋ قويىلا باستادى. كەيىننەن بىرتىندەپ رەلسى بۇزىلدى. ال 2015 جىلى مۇلدەم الىنىپ تاستالدى.

«ءبىز، الماتىلىقتار، ءوز قالامىزدى جاقسى كورەمىز. بايىرعى تۇرعىندار قالانىڭ بۇرىنعى كەلبەتىن ساعىنىشپەن ەسكە الادى. سوندىقتان سول كەزدە جۇرگەن ترامۆايدى جۇرتشىلىققا ۇسىنعىمىز كەلدى. بالالارمەن قوسا ۇلكەندەر دە وتىرىپ، بۇرىنعى كەزدى ەسكە الىپ جاتادى. ارينە، بۇل – دەكوراتيۆتى كولىك. ءبىراق ترامۆايدىڭ ەلەمەنتتەرىن ساقتاۋعا تىرىستىق. الداعى ۋاقىتتا ساياباققا وسىعان ۇقساس رەترو كولىكتەر قويساق دەگەن جوسپارىمىز بار»، – دەيدى مادەنيەت جانە دەمالىس ساياباعىنىڭ باسقارۋشىسى ۆلاديمير كالينين.

«بۇل ترامۆايدىڭ قۇرال-جابدىقتارىن ماسكەۋدەن تاپسىرىس بەرىپ الدىرتتىق، الماتى قالاسىندا تانىس جىگىتتەر جينادى. ونى وسى قالادا ءوزىمىز بويادىق. ءتورت ادام جينادى»، – دەدى ەدىل كوبەبايەۆ.

ونەرتاپقىشتار ترامۆايعا ءالى دە قوسىمشا بولشەكتەر قويىپ، تۇرلەندىرۋگە نيەتتى. ال باسشىلىق تۇرعىندار اراسىندا ساۋالناما جۇرگىزىپ، تاعى قانداي رەتروكولىكتى كورگىسى كەلەتىندەرىن بىلمەك.