2021 جىلى اۋداندا ءۇش مەكتەپ كۇردەلى جوندەۋدەن وتەدى، بەس مەكتەپتىڭ جاڭا عيماراتى، سونداي-اق جاڭا بالاباقشا سالىنادى.
بۇگىن وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسى بارىسىندا بوستاندىق اۋدانىنىڭ اكىمى التاي راحىمبەتوۆ وسىلاي دەدى، دەپ حابارلايدى Almaty-akshamy.kz
«ورتا ءبىلىم بەرۋ ينفراقۇرىلىمى تۋرالى ايتاتىن بولساق، ءبىزدىڭ اۋداندا جوبالىق قۋاتى 26 373 ورىندى 34 مەملەكەتتىك مەكتەپ جۇمىس ىستەيدى، وندا ناقتىلى 36 269 وقۋشى وقيدى جانە 8 587 وقۋشىنى قامتيتىن 21 جەكە مەكتەپ بار. وقۋشى ورىندارىنىڭ تاپشىلىعى 4 475 بىرلىكتى قۇرايدى»، – دەدى بوستاندىق اۋدانىنىڭ اكىمى.
اۋدانداعى وقۋشى ورىندارىنىڭ تاپشىلىعى ماسەلەسى بۇرىننان بار ءبىلىم بەرۋ نىساندارىن كەڭەيتۋ ارقىلى شەشىلەتىن بولادى.
«قازىرگى كەزدە ءۇش مەكتەپتىڭ جاڭا كورپۋستارىنىڭ قۇرىلىسى جۇرگىزىلۋدە: ولارعا 600 ورىندىق №38، 300 ورىندىق №191 مەن 425 ورىندىق №199 گيمنازيا كىرەدى. №60 گيمنازياعا 600 ورىندىق جاپسارجاي قۇرىلىسى اياقتالدى. «بازيس-ا» ينۆەستور-كاسىپورنىنىڭ ەسەبىنەن 300 ورىندىق №65 جالپى ءبىلىم بەرەتىن مەكتەپتەردىڭ جانە №146 ليسەيدىڭ جاڭا كورپۋستارىنىڭ قۇرىلىسى باستالدى»، – دەدى التاي راحىمبەتوۆ.
سونداي-اق №81 مەكتەپ-گيمنازياسىندا كۇردەلى جوندەۋ جۇمىستارى جۇرگىزىلدى. №40 جانە №45 مەكتەپ عيماراتتارى كۇردەلى جوندەۋدەن وتۋدە. وربيتا-3 شاعىناۋدانىنداعى №145 مەكتەپتى قالپىنا كەلتىرۋ، سەيسميكالىق نىعايتۋ جانە كۇردەلى جوندەۋ جوسپارلانعان.
التاي راحىمبەتوۆ بوستاندىق اۋدانىندا مەكتەپ جاسىنا دەيىنگى 10 423 بالانى قامتيتىن 30 مەملەكەتتىك، 36 جەكەمەنشىك بالاباقشا مەن 36 شاعىن ورتالىق جۇمىس ىستەيتىنىن ايتتى.
«مەملەكەتتىك-جەكەمەنشىك سەرىكتەستىك اياسىندا «بالاپان» رەسپۋبليكالىق باعدارلاماسى بويىنشا اۋداندا 19 ۇيىم جۇمىس ىستەيدى، ولارعا 984 بالا بارادى»، – دەدى اۋدان اكىمى.
اۋداندا جىل سوڭىنا دەيىن №21 گيمنازيا اۋماعىندا 120 ورىندى جاڭا بالاباقشا سالىنادى. №71 بالاباقشادا كۇردەلى جوندەۋ جۇمىستارى اياقتالدى.
الەۋمەتتىك ماڭىزى بار نىسانداردىڭ قۇرىلىسى تاقىرىبىن جالعاستىرا وتىرىپ، اۋدان اكىمى وسى جىلدىڭ سوڭىنا دەيىن «جاڭا الماتى» كەشەندى جوسپارىن ىسكە اسىرۋ اياسىندا جيتس ورتالىعىنىڭ بولىمشەسى بار حوسپيس عيماراتىنىڭ (قازىرگى ۋاقىتتا جسق ازىرلەۋگە كونكۋرس جاريالاندى، قۇلجا تراكتىسى اۋدانىندا جەر تەلىمى ءبولىندى) جانە 70 كەرەۋەتتىك «قالالىق بالالار كلينيكالىق جۇقپالى اۋرۋلار اۋرۋحاناسىنىڭ» جاڭا كورپۋسىنىڭ قۇرىلىسى جوسپارلانعانىن حابارلادى.