الەۋمەتتىك مەديسينالىق ساقتاندىرۋ قورىنىڭ الماتى قالالىق فيليالى حابارلاۋىنشا، 2026 جىلعى 1 قاڭتاردان باستاپ ءمامس جۇيەسىنە كەمى بەس جىل بويى تۇراقتى جارنا تولەگەن ازاماتتاردىڭ مارتەبەسى تولەم ۋاقىتشا توقتاعان جاعدايدا دا التى اي بويى ساقتاندىرىلادى، دەپ حابارلايدى aqshamnews.kz
«مىندەتتى الەۋمەتتىك مەديسينالىق ساقتاندىرۋ تۋرالى» زاڭعا ەنگىزىلگەن وزگەرىستەر اياسىندا قابىلدانعان جاڭا نورما بۇرىن ءمامس جۇيەسىنە تۇراقتى جارنا تولەپ كەلگەن، ءبىراق ۋاقىتشا تابىسسىز قالعان ازاماتتارعا قاتىستى.
«ەگەر ازامات ءمامس جۇيەسىنە كەمىندە بەس جىل قاتارىنان جارنا تولەگەن بولسا، ونىڭ ساقتاندىرۋ مارتەبەسى التى اي بويى ساقتالماق. مۇنداي جاعدايعا كوبىنە جۇمىسىنان ايىرىلىپ، ۋاقىتشا جۇمىسسىز قالعان ادامدار تاپ بولۋى مۇمكىن. ءبىراق بۇل جەڭىلدىكتى جۇيەدەگى بارلىق تولەۋشىلەر بىردەي قولدانا الادى»، – دەدى مسق الماتى قالالىق فيليالىنىڭ ديرەكتورى ءىلياس مۇحامەدجان.
بۇل وزگەرىستەر جۇمىسىنان ايىرىلعان نەمەسە ۋاقىتشا قارجىلىق قيىندىقتارعا تاپ بولعان تۇرعىنداردىڭ مەديسينالىق كومەكتەن قاعىلماۋىن قامتاماسىز ەتەدى. ءبىراق تابىس تۇراقتانعاننان كەيىن تولەنبەگەن ايلار ءۇشىن بەرەشەكتى وتەۋ قاجەت بولماق. جارنا تولەنبەي قالعان ايلار ۇشىنتولەمدى دەربەس تولەۋشى رەتىندە تولەۋگە بولادى. 2026 جىلى بۇل ساناتتاعى ازاماتتار ءۇشىن اي سايىنعى جارنا مولشەرى 4 250 تەڭگەنى قۇرايدى.
ايتا كەتۋ كەرەك، قازىرگى قولدانىستاعى نورماعا سايكەس، تولەمدەر توقتاعان جاعدايدا ساقتاندىرىلعان مارتەبەسى 3-اق اي ساقتالادى. الداعى ۋاقىتتا بۇل تالاپ تا ساقتالىپ قالماق.