ەندى سالىققا 1 تەڭگە قارىز بولعانىڭىز ءۇشىن ەسەپشوتىڭىز بۇعاتتالمايدى

ەندى كاسىپكەرلەردىڭ بانكتىك شوتتارى قارىزداردىڭ شامالى مولشەرىنە بايلانىستى بۇعاتتالمايدى، دەپ حابارلايدى Almaty-akshamy.kz.

ايتا كەتسەك، سالىق ورگاندارى سالىق بەرەشەگى 6 اەك-تەن اساتىن (2023 جىلى 20 700 تەڭگە) بانكتىك شوتقا تىيىم سالا الادى. الايدا الەۋمەتتىك تولەمدەر بويىنشا بانكتىك شوتتارعا تىيىم سالۋ 1 تەڭگەدەن استام بەرەشەك بويىنشا جۇرگىزىلەدى. سەبەبى بۇل ۇيىم قىزمەتكەرلەرى بويىنشا بەرەشەك (ولاردىڭ زەينەتاقى قورلارىنا، ءمامس قورىنا تۇسەتىن تۇسىمدەر) بولىپ ەسەپتەلىنەدى.

مەملەكەتتىك كىرىستەر كوميتەتى ەلىمىزدە كاسىپكەرلىكتى قولداۋ ماقساتىندا سالىق بەرەشەگى مەن الەۋمەتتىك تولەمدەر بويىنشا ماجبۇرلەپ ءوندىرىپ الۋ شارالارىن قابىلداۋ ءۇشىن شەكتى سومانى ۇلعايتۋ ماسەلەسى پىسىقتالىپ جاتقانىن مالىمدەدى.

«كىشىگىرىم قارىزدار ءۇشىن بانكتىك شوتتارعا تىيىم سالۋعا جول بەرمەۋ ءۇشىن شوتتار بويىنشا بەرەشەك سومالارى شەگىندە شەكتەۋلەر جۇرگىزۋ  ۇسىنىلادى. ياعني بەرەشەك 100 تەڭگە بولعاندا – تەك 100 تەڭگە بۇعاتتالادى. بۇل تۇزەتۋلەر بانكتىك شوتتارداعى بارلىق اقشانى بۇعاتتاۋ ماسەلەسىن شەشەدى»، دەلىنگەن رەسمي حابارلامادا.