بۇل تۋرالى ايتقان ق ر مادەنيەت جانە سپورت ءمينيسترىنىڭ ورىنباسارى عابيدوللا ءابدىراحمانوۆ كەلەسى جىلدان باستاپ ارحيۆ قىزمەتكەرلەرىنىڭ جالاقىسى وسەتىنىن دە ءمالىم ەتتى.
قازاقستاندا ارحيۆتىك قۇجاتتاردى سيفرلىق فورماتتا ساقتايتىن جاڭا اقپاراتتىق جۇيە ەنگىزىلىپ جاتىر، دەپ حابارلايدى Almaty-akshamy.kz
«ارحيۆيست ماماندىعىنا وسى ۋاقىتقا دەيىن ءجىتى كوڭىل بولىنبەي كەلدى. ونىڭ ىشىندە مەملەكەتتىك ورگاندار تاراپىنان دا از نازار اۋدارىلدى. ءقازىر ءبىز ە-ارحيۆ جاڭا اقپاراتتىق جۇيەسىن ەنگىزۋدەمىز. ونىڭ نەگىزىندە بارلىق مەملەكەتتىك ورگانداردان دەرەكتەر بازاسى جانە ەلەكتروندىق ارحيۆپەن جۇمىس ىستەي الاتىن جوعارى بىلىكتى IT-تەحنولوگيالاردى مەڭگەرگەن مامانداردىڭ جۇمىس ىستەۋى تالاپ ەتىلەدى. سەبەبى مەملەكەت باسشىسى جولداۋدا ارحيۆ قىزمەتكەرلەرىنىڭ جالاقىسىمەن قوسا بىلىكتىلىگىن دە ارتتىرۋدى مىندەتتەدى. جالپى ارحيۆ جۇمىسىن زاماناۋي تۇردە ىلگەرىلەتۋدەگى ماڭىزدى باعىتتىڭ ءبىرى ونى سيفرلىق فورماتقا اۋىستىرۋ. ياعني، بارلىق قۇجاتتاردى ەلەكتروندى فورماتتا ساقتاۋىمىز قاجەت»، - دەدى عابيدوللا ءابدىراحمانوۆ.
سونداي-اق، ۆيسە-مينيستر مەملەكەت باسشىسى شەتەلدەگى ەلىمىزگە قاتىستى ارحيۆ قۇجاتتارىن زەرتتەۋدى تاپسىرعانىن ايتتى.
«پرەزيدەنتتىڭ وسى تاپسىرماسىنا سايكەس، ارنايى كەشەندى جوسپار قابىلداندى. جوسپار اياسىندا ءبىزدىڭ ماماندار شەتەلدىك مۇراعاتتارعا بارىپ، ونداعى قۇندى قۇجاتتارمەن تانىسىپ جاتىر»، - دەيدى ول.