مۇنداي ويىنشىقتار زورلىق-زومبىلىق پەن اگرەسسيامەن بايلانىستى ويىن سيۋجەتىن تۋدىرادى.
ەۋرازيالىق ەكونوميكالىق وداققا كىرەتىن مەملەكەتتەر بالالاردىڭ پسيحيكالىق دامۋىنا جاعىمسىز اسەر ەتەتىن ويىنشىقتارعا قويىلاتىن تالاپتاردى ازىرلەۋگە كەلىستى، دەپ حابارلايدى Almaty-akshamy.kz قازاقستان ساۋدا جانە ينتەگراسيا مينيسترلىگىنە سىلتەمە جاساپ.
ماماندار «پسيحولوگيالىق-پەداگوگيكالىق قاۋىپسىزدىك» تالاپتارىن ازىرلەۋدى ۇسىندى. سەبەبى نارىقتا قورقىنىشتى، كۇش كورسەتۋ بەلگىلەرى بار، گيبريدتى جانە تاعى باسقا بالالاردىڭ پسيحيكالىق دامۋىنا جاعىمسىز اسەر ەتەتىن ويىنشىقتار كوبەيدى. ال پسيحولوگتاردىڭ ايتۋىنشا، ونداي قورقىنىشتى ويىنشىقتار زورلىق-زومبىلىق پەن اگرەسسيامەن بايلانىستى ويىن سيۋجەتىن تۋدىرادى.
«ويىنشىقتارعا ارنالعان قولدانىستاعى تەحنيكالىق رەگلامەنتتە تەك ماتەريالدارعا، توكسيكولوگيالىق-گيگيەنالىق جانە ميكروبيولوگيالىق كورسەتكىشتەرگە، فيزيكالىق جانە مەحانيكالىق، حيميالىق جانە ەلەكترلىك قاسيەتتەرگە، رادياسيالىق قاۋىپسىزدىككە قويىلاتىن تالاپتار عانا بەلگىلەنگەن. وسىلايشا نارىقتان قورقىنىشتى ويىنشىقتاردى الىپ تاستاۋ مۇمكىن ەمەس»، - دەيدى ماماندار.
ماسكەۋدە ەەك كەڭەسىندە قازاقستاندىق ساراپشىلار بۇل ماسەلەنى قاراستىرۋ ءۇشىن ويىنشىقتىڭ بالاعا كەرى اسەرىن انىقتايتىن ولشەمدەردى بەلگىلەيتىن ستاندارتتار قاجەت ەكەنىن جەتكىزدى.
«بالالاردىڭ فيزيكالىق جانە پسيحيكالىق دەنساۋلىعىن قالىپتاستىرۋدىڭ ماڭىزدىلىعى كۇمان تۋدىرمايدى. قازاقستان 2015 جىلى ويىنشىقتارعا پسيحولوگيالىق-پەداگوگيكالىق ساراپتاما جۇرگىزۋ ءۇشىن تەحنيكالىق رەگلامەنتكە وزگەرىستەر ەنگىزۋگە باستاماشى بولدى. ول كەزدە مۇنداي ويىنشىقتاردىڭ بالانىڭ پسيحيكاسىنا جاعىمسىز اسەر ەتۋ كريتەرييلەرىن ايقىنداۋ ستاندارتىنىڭ بولماۋىنا، عىلىمي زەرتتەۋلەر جۇرگىزۋ قاجەتتىلىگىنە بايلانىستى قۇجات قولداۋ تاپپادى»، - دەدى دەنساۋلىق ساقتاۋ ۆيسە-مينيسترى ايجان ەسماعامبەتوۆا.
ونىڭ ايتۋىنشا، ويىنشىقتاردىڭ بالانىڭ پسيحيكاسىنا كەرى اسەر ەتۋ كريتەرييلەرىن ايقىنداۋ ستاندارتى دايىن بولعاننان كەيىن قولدانىستاعى تەحنيكالىق رەگلامەنتتەردى وزگەرتۋ كەرەك.