قازاقستان اۋىل شارۋاشىلىعى ونىمدەرىنىڭ ساۋداسىن ۇلعايتپاق.
قازاقستان يران نارىعىنا 250 ملن دوللاردىڭ تاۋارىن جەتكىزۋگە دايىن، دەپ حابارلايدى Almaty-akshamy.kz ۇكىمەت باسشىسىنىڭ رەسمي سايتىنا سىلتەمە جاساپ.
قازاقستان پرەمەر-مينيسترى ءاليحان سمايىلوۆ پەن يراننىڭ اۋىل شارۋاشىلىعى ءمينيسترى سەيەد دجاۆاد ساداتي نەدجاد اگرارلىق جانە كولىك-لوگيستيكالىق سالالارداعى ىنتىماقتاستىقتى كەڭەيتۋ پەرسپەكتيۆالارىن تالقىلادى.
پرەمەر-مينيستر 2022 جىلعى قاڭتار-قاراشا ايلارىندا ەكى ەل اراسىنداعى تاۋار اينالىمى 20%-دان استامعا ءوسىپ، $500 ملن قۇراعانىن اتاپ ءوتتى. سونىمەن قاتار ءوزارا ساۋدا كولەمىن ودان ءارى ۇلعايتۋ ماقساتىندا قازاقستان يران نارىعىنا جالپى قۇنى شامامەن $250 ملن بولاتىن قوسىمشا 75 تاۋار پوزيسياسىن جەتكىزۋگە دايىن.
«اۋىل شارۋاشىلىعى قازىرگى تاڭدا دامۋ پەرسپەكتيۆاسى وتە جوعارى سالا بولىپ وتىر. ونىڭ ءوزارا ساۋداداعى ۇلەسى – شامامەن 80%. ءبىزدىڭ ەلدەرىمىزدە اوك ءونىمىنىڭ تاۋار اينالىمىن $1 ملرد-قا دەيىن ارتتىرۋعا مۇمكىندىك بار»، - دەدى ءاليحان سمايىلوۆ.
جالپى، ۇكىمەت باسشىسىنىڭ ايتۋىنشا، قازاقستان ۇكىمەتى ەكى ەلدىڭ باسشىلارى قويعان جالپى ساۋدا كولەمىن $3 ملرد-قا دەيىن ۇلعايتۋ جونىندەگى مىندەتتى ورىنداۋ ءۇشىن بەلسەندى جۇمىس ىستەۋگە دايىن.
سونىمەن قاتار ءاليحان سمايىلوۆ ءوزارا ءىس-قيمىلدىڭ نەگىزگى باعىتتارىنىڭ ءبىرى كولىك-لوگيستيكا سالاسى ەكەنىن اتاپ ءوتتى. بۇل تۇرعىدا «سولتۇستىك-وڭتۇستىك» كولىك ءدالىزى ەرەكشە ماڭىزعا يە.
«وسى مارشرۋتتىڭ وتكىزۋ قابىلەتىن ۇلعايتۋ بويىنشا بىرلەسكەن شارالار قابىلداۋ، اتاپ ايتقاندا، «تار جەرلەردى» جويۋ جونىندەگى جول كارتاسىن بەكىتىپ، ونى ىسكە اسىرۋ جاقىن بولاشاقتا جۇك تاسىمالداۋ كولەمىن ەداۋىر ۇلعايتۋعا جول اشار ەدى»، - دەدى ءاليحان سمايىلوۆ.
ونىڭ ايتۋىنشا، جول كارتاسىن ىسكە اسىرۋ 2025 جىلعا قاراي ءدالىزدىڭ وتكىزۋ قابىلەتىن جىلىنا 10 ملن تونناعا دەيىن ارتتىرۋعا مۇمكىندىك بەرمەك.
ال سەيەد دجاۆاد ساداتي نەجاد قازاقستان-يران ۇكىمەتارالىق كوميسسياسىنىڭ 18ء-شى وتىرىسى تابىستى وتكەنىن ايتتى، ونىڭ قورىتىندىسى بويىنشا تاراپتار كوپتەگەن ءوزارا ءتيىمدى كەلىسىمگە كەلدى.
سونىمەن قاتار يراننىڭ اۋىل شارۋاشىلىعى ءمينيسترى ساۋدا جانە جۇك تاسىمالداۋ كولەمىن ۇلعايتۋ ءۇشىن تەمىرجول جەلىسى مەن تەڭىز ينفراقۇرىلىمىن ودان ءارى دامىتۋدىڭ ماڭىزى زور ەكەنىن اتاپ ءوتتى، سونداي-اق يران قازاقستان نارىعىنا سيترۋس ونىمدەرىن جەتكىزۋ كولەمىن كەڭەيتۋگە دايىن ەكەنىن مالىمدەدى.