قازاقستاندا ەندى تۇرعىن ءۇيدى ونلاين ساتۋعا جانە ساتىپ الۋعا بولادى، دەپ حابارلايدى اlmaty-akshamy.kz.
ادىلەت مينيسترلىگى Freedom بانكپەن بىرلەسىپ جىلجىمايتىن مۇلىكتى ونلاين قايتا تىركەۋ بويىنشا پيلوتتىق جوبانى ىسكە قوستى. تۇرعىن ءۇيدىڭ ورنالاسقان جەرىنە قاراماستان مەملەكەتتىك تىركەۋگە قۇجاتتاردى تاپسىرۋ مۇمكىندىگى پايدا بولدى.
«ەندى قازاقستاندىقتار تۇرعىن ءۇيدى حالىققا قىزمەت كورسەتۋ ورتالىعىنا جانە نوتاريۋسقا بارماستان ونلاين رەجيمدە ساتىپ الىپ، ساتا الادى. مامىلەنىڭ جاۋابى ءوتىنىم بەرگەن ساتتەن باستاپ 8 ساعاتتان اسپاي كەلەدى، ال تىركەۋ نەبارى 10 مينۋتتى قۇرايدى»، - دەپ ءتۇسىندىردى ادىلەت مينيسترلىگىنىڭ رەسمي وكىلى تالعات ءۋالي جۋرناليستەرگە ارنالعان بريفينگتە.
مامىلە پروسەسى بيومەتريالىق اۋتەنتيفيكاسيا ارقىلى ساتۋشى مەن ساتىپ الۋشىنىڭ جەكە باسىن بەينە سايكەستەندىرۋدەن باستالادى. ەگەر ساتۋشى نەكەدە بولسا، وندا جۇبايى دا وسى پروسەدۋرادان ءوتۋى كەرەك. ءارى قاراي مامىلەگە قاتىسۋشىلار نوتاريۋسپەن بەينەقوڭىراۋ ارقىلى بايلانىسىپ، نوتاريۋس ساتۋشى مەن ساتىپ الۋشىنىڭ اراسىنداعى كەلىسىمنىڭ ءتۇپنۇسقالىعىنا كوز جەتكىزەدى. ساتىپ الۋ-ساتۋ شارتىنا ەلەكتروندىق-سيفرلىق قولتاڭبا ارقىلى قول قويىلادى.
ينتەرنەتتەگى كەز-كەلگەن ساتىپ الۋ-ساتۋ مامىلەسىن ءارقاشان ساتىپ الۋشى باستايدى. ياعني ول ءوتىنىم جىبەرەدى، ال ساتۋشى ونى راستايدى.
تالعات ءۋاليدىڭ ايتۋىنشا، ءۇيدى ونلاين ساتۋ نەمەسە ساتىپ الۋ ءۇشىن Freedom بانكتىڭ كليەنتى بولۋ شارت ەمەس. مۇنى كەز كەلگەن ادام جاساي الادى. ەڭ باستىسى – قازاقستان ازاماتى بولۋ جانە ەلەكتروندىق-سيفرلىق قولتاڭباسى بولۋى كەرەك.
سونداي-اق، جىلجىمايتىن مۇلىككە قۇقىقتار 2015 جىلدان باستاپ ەلەكتروندىق فورماتتا رەسىمدەلۋگە ءتيىس.
ايتا كەتەرى، العاشقى كەزەڭدە ساتىپ الىناتىن تۇرعىن ءۇيدىڭ قۇنىنا شەكتەۋ قويىلعان. ياعني ونلاين وپەراسيانى قۇنى 50 ملن تەڭگەدەن اسپايتىن پاتەردى ساتىپ العان نەمەسە ساتقان ازاماتتار جۇزەگە اسىرادى. ءقازىر جوبا استانا مەن الماتى قالالارىندا ءجۇرىپ جاتىر. ەگەر پيلوتتىق جوبا ءساتتى بولسا، قازاقستاننىڭ باسقا دا وڭىرلەرىن قوسۋ جانە تۇرعىن ءۇيدىڭ قۇنىن ۇلعايتۋ جوسپارلانىپ وتىر.