ول ءۇشىن بانك قوسىمشاسىنىڭ «مەملەكەتتىك قىزمەتتەر» ءبولىمىن تاڭداپ، «ءمامس» بولىمشەسىنە جسن ەنگىزۋ كەرەك.
ءمامس جۇيەسىندەگى ستاتۋس پەن تولەمدەردى بانك قوسىمشالارى ارقىلى تەكسەرۋگە بولادى، دەپ حابارلايدى Almaty-akshamy.kz
مەديسينالىق قىزمەتتەردى پايدالانۋشىلار بۇدان بىلاي ءوز مارتەبەسىن قازاقستان حالىق بانكى، سەنتركرەديت بانكى جانە Kaspi Bank ءموبيلدى قوسىمشالارى ارقىلى تەكسەرە الادى، دەپ مالىمدەدى مەديسينالىق ساقتاندىرۋ قورىنىڭ الماتى قالالىق فيليالى.
وتكەن 12 ايعا جاسالعان تولەمدەر مەن ساقتاندىرۋ مارتەبەسى تۋرالى مالىمەتتى حالىق بانكىنىڭ قوسىمشاسى ارقىلى تەكسەرۋگە بولادى. ول ءۇشىن Halyk ءموبيلدى قوسىمشاسىنا تىركەلىپ، «مەملەكەتتىك قىزمەتتەر» ءبولىمىن تاڭداپ، «ءمامس» بولىمشەسىنە جسن ەنگىزۋ كەرەك. سونىمەن قاتار، Halyk بانكتىڭ قوسىمشاسى ارقىلى مەديسينا ۇيىمىنا تىركەۋ تۋرالى اقپاراتتى دا الۋعا بولادى. ول ءۇشىن «مەملەكەتتىك قىزمەتتەر» بولىمىنە كىرىپ، «انىقتامالار» باتىرماسىن باسۋ قاجەت. تۇتىنۋشىنىڭ تۇرعىلىقتى مەكەنجايى، تىركەلگەن ەمحانا اتاۋى جانە كۇنى كورىنىپ تۇرادى.
وتكەن 12 ايدىڭ تولەمدەرى مەن مارتەبەنى سەنتركرەديت بانكىنىڭ قوسىمشاسى ارقىلى دا بىلۋگە بولادى (BCC.KZ ءموبيلدى قوسىمشاسىنا تىركەلىپ، «مەملەكەتتىك قىزمەتتەر» بولىمىندەگى «ءمامس تۋرالى اقپارات» بولىمشەسى، جسن).
سونداي-اق، بۇل مالىمەتتەر Kaspi.kz ءموبيلدى قوسىمشاسىندا دا قولجەتىمدى. ول ءۇشىن «مەملەكەتتىك قىزمەتتەر» بولىمىنە كىرىپ، ارى قاراي «ءمامس مارتەبەسى» باتىرماسىن تاڭداۋ كەرەك.
ەگەر سوڭعى 12 اي ىشىندە جارنا جاسالماي قالعان ايلار بولسا، بەرەشەكتى بانك قوسىمشالارى ارقىلى وتەپ، «ساقتاندىرىلعان» ستاتۋسىنا يە بولۋعا بولادى.
ەستەرىڭىزگە سالا كەتسەك، بۇل اقپاراتتى:
- Qoldau 24/7 ءموبيلدى قوسىمشاسى
- fms.kz رەسمي سايتى
- Telegram-داعى @SaqtandyrýBot
- 1414 بايلانىس ورتالىعى
- Damumed ءموبيلدى قوسىمشاسى
- ەلەكتروندى ۇكىمەتتىڭ egov.kz پورتالى ارقىلى دا انىقتاپ بىلۋگە بولادى.