كولىك تەرەزەسىنەن قولىن شىعارعان جولاۋشىلار مەن جۇرگىزۋشىلەرگە 10 ايلىق ەسەپتىك كورسەتكىش (اەك) مولشەرىندە ايىپپۇل قاراستىرىلعان، دەپ حابارلايدى aqshamnews.kz
قازاقستاندا تەرەزەدەن دەنە مۇشەلەرىن شىعارۋعا تىيىم سالاتىن زاڭ 2011 جىلدان بەرى قولدانىستا. الايدا، 2025 جىلعى 13 ناۋرىزدا بۇل تالاپ كۇشەيتىلدى. اكىمشىلىك قۇقىقبۇزۋشىلىق تۋرالى كودەكسكە ەنگىزىلگەن وزگەرىستەرگە سايكەس، كولىك سالونىنان تىس جەردە ادام تاسىمالداعانى ءۇشىن جەكە جاۋاپكەرشىلىك بەلگىلەندى.
ىشكى ىستەر مينيسترلىگىنىڭ مالىمەتىنشە، بۇل تالاپ كولىك تەرەزەلەرى مەن ليۋكتەرىنەن باس، قول نەمەسە اياق شىعارۋ جاعدايلارىنا دا قاتىستى. سونىمەن قاتار، كولىك ءجۇرىپ كەلە جاتقاندا ەسىكتى اشۋعا دا تىيىم سالىنادى. مۇنداي ارەكەتتەر جول قوزعالىسىنا قاتىسۋشىلاردىڭ ءومىرى مەن دەنساۋلىعىنا ءقاۋىپ توندىرەدى جانە جۇرگىزۋشىنىڭ نازارىن بۇزادى دەپ باعالانادى.
جاڭا نورماعا سايكەس، بۇل ەرەجەنى بۇزعانى ءۇشىن 10 اەك (شامامەن 39،3 مىڭ تەڭگە) مولشەرىندە ايىپپۇل قاراستىرىلعان. مۇنداي ارەكەتتەرگە جول بەرگەن جاعدايدا جاۋاپكەرشىلىك جولاۋشىلارعا ەمەس، جۇرگىزۋشىنىڭ وزىنە جۇكتەلەدى.
جاڭا تالاپتاردىڭ ورىندالۋىن پوليسيا تەك كوشەدەگى پاترۋلدەر عانا ەمەس، سونداي-اق جول بويىنداعى بەينەباقىلاۋ كامەرالارىنداعى جازبالار ارقىلى دا باقىلايدى.
ىشكى ىستەر مينيسترلىگى جۇرگىزۋشىلەرگە كولىك سالونىنداعى جولاۋشىلاردىڭ ءتارتىبىن مۇقيات باقىلاۋعا شاقىرادى. بۇل اسىرەسە، ادەمى كادرلار ءۇشىن الەۋمەتتىك جەلىلەرگە ۆيدەو نەمەسە فوتو تۇسىرۋگە تىرىساتىن بالالار مەن جاسوسپىرىمدەرگە قاتىستى.