ءتىپتى كەزەگىنىڭ جىلجۋ بارىسىن دا ءار ازامات ءوز بەتىنشە باقىلاي الادى.
ەندى كامەلەت جاسىنا تولعان ءاربىر قازاقستاندىق ۇيدەن شىقپاي-اق، 10 سوتىق جەرگە eGov.kz ارقىلى ءوتىنىم بەرە الادى، دەپ حابارلايدى Almaty-akshamy.kz
ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ حابارلاۋىنشا، تۇرعىندار، ءتىپتى كەزەگىنىڭ جىلجۋ بارىسىن ءوز بەتىنشە باقىلاپ، جەر كەزەگىنە بۇدان بۇرىن بەرىلگەن ءوتىنىشىنىڭ دەرەكتەرىن وزەكتەندىرە الادى. بۇل پروسەس ءاربىر قازاقستاندىق الۋى ءتيىس 10 سوتىق جەردى الۋ بارىسىن بارىنشا اشىق قىلادى. ال اۆتوماتيزاسيا ارقاسىندا بۇل پروسەسكە 5 مينۋت قانا جۇمسالادى. بۇعان دەيىن جەر ۋچاسكەسىن الۋ كەزەگىنە تۇرۋ ءۇشىن قازاقستاندىقتار اكىمدىكتەرگە قاعاز جۇزىندە ءوتىنىش تاپسىراتىن، وندا كەزەك رەتى دۇرىس جۇرگىزىلە بەرمەيتىن. ونىڭ ۇستىنە، كەزدە كەزەككە تۇرۋ پروسەسى 12 كۇن ۋاقىتتى الاتىن. بۇل وتىنىشتەر 16 جىل بويى اۋدان، قالا، وبلىس دەڭگەيىندە بولەك-بولەك ساقتالدى.
«اكىمدىكتەر بەرگەن ءتىزىمدى ءبىز سيفرلاندىرىپ، ەلەكتروندى فورماتقا اۋىستىردىق. جەر تەلىمىنە كەزەكتى سيفرلاندىرۋ – سىبايلاس جەمقورلىقتى جويۋ جانە جەردى يگەرۋ ۇدەرىسىندە جاسالعان ۇلكەن ىلگەرى قادام. ەندى كامەلەت جاسىنا تولعان ءاربىر قازاقستاندىق ۇيدەن شىقپاي-اق، 10 سوتىق جەرگە eGov.kz ارقىلى ءوتىنىم بەرە الادى. تاعى ءبىر جاڭاشىلدىق – ەندى تاڭداعان ايماقتىڭ اكىمدىگىنە بارماي-اق، ەلىمىزدىڭ كەز كەلگەن وڭىرىنەن جەر تەلىمىنە ءوتىنىم بەرۋگە بولادى»، – دەپ ءتۇسىندىردى ق ر سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى اسەت تۇرىسوۆ.
بۇل قىزمەتتى پايدالانۋ ءۇشىن eGov.kz پورتالىنا كىرىپ، «جىلجىمايتىن مۇلىك» – «جەر قاتىناستارى» بولىمىنەن «جەكە تۇرعىن ءۇي قۇرىلىسىنا جەر ۋچاسكەسىن (10 سوتىق جەر) الۋعا كەزەكتى قاراۋ نەمەسە كەزەككە تۇرۋ» قىزمەتىن تاڭداۋ قاجەت.