ءىىم مۇددەلى مەملەكەتتىك ورگاندارمەن بىرلەسىپ، جاڭا تۋعان بالالارعا جسن (جەكە سايكەستەندىرۋ ءنومىرىن) بەرۋ بويىنشا پيلوتتىق جوبانى ىسكە قوستى.
بۇرىن بالاعا جسن اتا-اناسى تۋۋ تۋرالى كۋالىك الۋعا ءوتىنىش بىلدىرگەننەن كەيىن عانا بەرىلەتىن. سول سەبەپتى ءبىراز بالا اتا-انالارى مۇنداي كۋالىكتى العانعا دەيىن ەسەپكە الىنبايتىن. بۇرىنعى جۇيەگە سايكەس احات ورگانى الدىمەن بالانىڭ تەگىن، اتىن، اكەسىنىڭ اتىن كورسەتىپ، اتا-اناسىنىڭ ءوتىنىشى نەگىزىندە تۋۋ تۋرالى اكتىلىك جازبانى تىركەيتىن. سوسىن ىشكى ىستەر ورگاندارىمەن بالاعا جسن جاسالىپ، كەيىن اتا-اناسىنا تۋۋ تۋرالى كۋالىك بەرىلەتىن. ەندى احات ءبولىمى تۋۋ تۋرالى مەديسينالىق كۋالىكتى العاننان كەيىن اۆتوماتتى تۇردە بالانىڭ تۋۋ تۋرالى اكتىلىك جازباسىن جاسايدى، ونىڭ نەگىزىندە بالانىڭ جسن-ى قالىپتاسادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
بۇل ارقىلى بالانىڭ اتا-اناسىنىڭ جەكە ءوتىنىشىنسىز، پرواكتيۆتى فورماتتا (كورسەتىلەتىن قىزمەتتى بەرۋشىنىڭ ۇسىنىسى بويىنشا) ءبىرقاتار مەملەكەتتىك قىزمەتتەر اۆتوماتتى تۇردە كورسەتىلەدى. ولار: بالا تۋۋعا بايلانىستى جانە بالا كۇتىمى بويىنشا جاردەماقى الۋ؛ جۇكتىلىككە جانە بوسانۋعا بايلانىستى تابىسىنان ايىرىلعان جاعدايدا الەۋمەتتىك تولەمدى تاعايىنداۋ جانە تولەۋ؛ بالا 1،5 جاسقا تولعاننان كەيىن ونىڭ كۇتىمىنە بايلانىستى تابىسىنان ايىرىلعان جاعدايدا الەۋمەتتىك تولەم. سونىمەن قاتار جۇيە اناسىنا بالانىڭ تەگى، اتى جانە اكەسىنىڭ اتى (بار بولسا) تۋرالى مالىمەتتەردى بەرۋ تۋرالى SMS-حابارلاما جىبەرەدى (3 جۇمىس كۇنى ىشىندە جاۋاپ بەرۋ كەرەك).
دەرەكتەر الىنعاننان كەيىن تۋۋ تۋرالى كۋالىك ازىرلەنەدى. وسىلايشا تۋۋ تۋرالى كۋالىك بەرىلگەنگە دەيىن بالاعا جسن بەرۋ مەملەكەتتىك ورگانداردىڭ اقپاراتتىق جۇيەلەرىندە دۇنيەگە كەلگەن بالالاردى تولىققاندى ەسەپكە الۋعا عانا ەمەس، سونىمەن قاتار اتا-انالارعا بالانىڭ تۋۋىنا بايلانىستى مەملەكەتتىك قىزمەتتەر كورسەتۋگە مۇمكىندىك بەرەدى.