بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين مالىمدەدى.
بيىلعى وقۋ جىلىنان باستاپ ءىت-ماماندىقتاردى مەڭگەرگىسى كەلەتىن تالاپكەرلەر ۇبت-دا ينفورماتيكا پانىنەن تەست تاپسىرادى، دەپ حابارلايدى Almaty-akshamy.kz
«وسى وقۋ جىلىنان باستاپ IT-ماماندىقتارعا تۇسەتىن تالاپكەرلەر قاجەتتى پاندەردىڭ ءبىرى رەتىندە ينفورماتيكادان تەست تاپسىرادى. بۇل - قۋانتارلىق جاڭالىق. ءبىز بۇل ماسەلەنى ءبىلىم مينيسترلىگىمەن بىرگە بۇرىننان بەرى پىسىقتاپ كەلدىك»، - دەپ جازدى مينيستر الەۋمەتتىك جەلىدەگى پاراقشاسىندا.
ايتۋىنشا، ينفورماتيكانى ۇبت-نىڭ بەيىندى پاندەر تىزىمىنە كىرگىزۋ ارقىلى ءپاندى وقۋعا قىزىعۋشىلىق تانىتقان وقۋشىلار سانىن ۇلعايتۋعا مۇمكىندىك بولادى. ال بۇل ءوز كەزەگىندە ينفورماتيكا مۇعالىمدەرى كاسىبىنىڭ بەدەلى مەن مارتەبەسىن ارتتىرادى.
«ءاربىر ادام، ماسەلەن، ماتەماتيكانى بىلگەنى سياقتى باعدارلامالاۋ نەگىزدەرىن دە ءبىلۋى كەرەك دەپ ويلايمىن. باعدارلامالاۋ كەز كەلگەن كاسىپتە پايدالى بولۋى مۇمكىن، مەيلى، ول مەديسينا بولسىن، ينجەنەرلىك سالا بولسىن. ويتكەنى بولاشاقتىڭ بارلىق ماماندىعى IT سالاسىمەن بايلانىستى بولاتىنى شىندىق»، - دەيدى مۋسين.
ەسكە سالساق، بيىل اقپان ايىندا وقۋ-اعارتۋ مينيسترلىگى (بۇرىنعى ءبىلىم جانە عىلىم مينيسترلىگى) ءىت-باعىتتار بويىنشا وقۋعا تۇسكىسى كەلەتىن تالاپكەرلەر ۇبت-دا فيزيكا ەمەس، ينفورماتيكا پانىنەن تەست تاپسىراتىنىن مالىمدەگەن ەدى.
ۆەدومستۆو 2022-2023 وقۋ جىلىنان باستاپ «ينفورماتيكا مۇعالىمدەرىن دايارلاۋ»، «اقپاراتتىق تەحنولوگيالار» جانە «اقپاراتتىق قاۋىپسىزدىك» ءبىلىم باعدارلامالارى توپتارىنا تۇسەتىن وقۋشىلار ۇبت-دا «ماتەماتيكا+فيزيكا» ورنىنا «ماتەماتيكا+ينفورماتيكا» كومبيناسياسىن تاپسىراتىنىن حابارلادى.