قاراپايىم حالىقتىڭ قالتاسىن قاعىپ جۇرگەن بۇل قۇبىلىسقا ۇكىمەت نازار اۋدارا باستادى، دەپ حابارلايدى aqshamnews.kz
جاقىندا ۇكىمەت باسشىسىنىڭ ورىنباسارى ەرمەك كوشەربايەۆتىڭ دەپۋتاتتارعا بەرگەن جاۋابى جاريالاندى. كوشەربايەۆتىڭ جاۋابىنا سۇيەنسەك، قوعامداعى الاڭداۋشىلىق پەن الدانعان ازاماتتاردىڭ كوبەيۋىنە بايلانىستى ۇكىمەت كوۋچيڭ سالاسىنا نازار اۋدارا باستاعان. ەڭبەك جانە حالىقتى الەۋمەتتىك قورعاۋ مينيسترلىگى ۇلتتىق بىلىكتىلىك جۇيەسى اياسىندا "كوۋچ" كاسىبىنە ارنالعان كاسىبي ستاندارت ازىرلەۋگە كىرىسكەن. ماقسات – سالاداعى جاۋاپكەرشىلىكتى ارتتىرىپ، تۇتىنۋشىنىڭ قۇقىعىن قورعاۋ.
مەملەكەت باسشىسى قاسىم-جومارت توقايەۆ 2025 جىلعى 14 ناۋرىزدا وتكەن ۇلتتىق قۇرىلتايدا ول جالعان كوۋچتەر مەن پسيەۆدوپسيحولوگتار حالىقتى الداپ، زاڭسىز پايدا تاۋىپ جاتقانىن ايتىپ، جاۋاپتى ورگاندارعا ناقتى تاپسىرما بەرگەن ەدى. “بۇگىن دە بۇل جۇمىس ۇكىمەتتىڭ باقىلاۋىندا” دەيدى جاۋابىندا كوشەربايەۆ. ونىڭ سوزىنشە، تۇتىنۋشىلاردىڭ قۇقىقتارىن قورعاۋ جانە كوۋچيڭ سالاسىندا قىزمەت كورسەتەتىن تۇلعالاردىڭ كاسىبي جاۋاپكەرشىلىگىن ارتتىرۋ ماقساتىندا بۇل باعىتتى رەتتەۋدىڭ كەشەندى تەتىگى ازىرلەنەدى. ول كوۋچ-ترەنەرلەرگە قويىلاتىن بىلىكتىلىك تالاپتارىن بىرىزدەندىرۋ ارقىلى جۇزەگە اسادى.