بۇدان بۇرىن اسىراپ العان بالالاردى بالالار ۇيىنە قايتارۋدىڭ جيىلەگەنى ايتىلعان.
قازاقستان بالا اسىراپ الاتىندارعا تالاپتى كۇشەيتەدى، دەپ حابارلايدى aqshamnews.kz
ءتيىستى تۇزەتۋلەردى سەناتورلار بالانىڭ قۇقىقتارىن قورعاۋ تۋرالى زاڭ جوباسى اياسىندا ماقۇلدادى.
سەناتور ءنۇريا نيازوۆا كونستيتۋسيالىق سوت ۇيلەنبەگەن ەر ادامدارعا بالا اسىراپ الۋعا تىيىم سالاتىن نورمانى زاڭسىز دەپ تانىعانىن ەسكە سالدى.
«2024 جىلى 23 شىلدەدە كونستيتۋسيالىق سوت نەكەدە تۇرماعان ەر ادامدارعا بالا اسىراپ الۋ قۇقىعىن شەكتەيتىن نەكە، ەرلى-زايىپتىلىق جانە وتباسى تۋرالى كودەكستىڭ 91-بابى كونستيتۋسياعا سايكەس كەلمەيدى دەپ شەشتى. الايدا جىل سايىن بالالارعا قارسى قىلمىستار، سونىڭ ىشىندە جىنىستىق زورلىق-زومبىلىق كوبەيىپ كەلەدى»، - دەپ اتاپ ءوتتى نيازوۆا.
2024 جىلى قازاقستاندا كامەلەتكە تولماعانداردىڭ جىنىستىق تيىسپەۋشىلىگىنە قول سۇعۋدىڭ 890 جاعدايى تىركەلگەن. بۇل بىلتىرعى جىلدىڭ سايكەس كەزەڭىمەن سالىستىرعاندا 8% ارتىق. باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ مالىمەتتەرى بويىنشا، مۇنداي قىلمىستاردىڭ 99% ەر ادامدار جاساعان.
نيازوۆا زاڭ جوباسىندا ەرلى-زايىپتىلار ءۇشىن بالا اسىراپ الۋدىڭ باسىم قۇقىعى قاراستىرىلۋى كەرەك دەپ سانايدى.
وقۋ-اعارتۋ ۆيسە-مينيسترى ەدىل وسپان ازىرلەنگەن زاڭ شىنىمەن دە ەرلى-زايىپتىلارعا ارتىقشىلىق بەرەتىنىن ايتتى. بۇدان باسقا، ءبىرقاتار قاتاڭداتۋ شارالارىن ەنگىزۋ جوسپارلانىپ وتىر:
بالا اسىراپ الۋشى مەن بالا اراسىنداعى جاس ايىرماشىلىعىن انىقتاۋ.
سوتتىلىعىنىڭ بولۋى تۋرالى مالىمەتتەردى جىل سايىن جاڭارتۋ.
پسيحولوگيالىق دياگنوستيكادان مىندەتتى تۇردە ءوتۋ.
اككرەديتتەلگەن ۇيىمدار ارقىلى وقىتۋ.
«اتالعان تۇزەتۋلەر ءقازىر مەملەكەتتىك ورگاندارمەن كەلىسۋ ساتىسىندا تۇر. پروسەس اياقتالعاننان كەيىن ولار پارلامەنتكە ەنگىزىلەدى»، -دەدى ۆيسە-مينيستر.