ۇلتتىق ۇلاننىڭ باس قولباسشىلىعىندا جەكە قۇرامعا جاڭا الەۋمەتتىك باستامانىڭ مازمۇنى تانىستىرىلىپ، ونى وڭىرلەردە ءتيىمدى ىسكە اسىرۋ جولدارى تالقىلاندى، دەپ حابارلايدى اqshamnews.kz ءتىلشىسى.
جيىندا 2026 جىلعى 1 قاڭتاردان باستاپ قازاقستانداعى بارلىق كۇشتىك قۇرىلىمداردىڭ اسكەري قىزمەتشىلەرى مەن ولاردىڭ وتباسى مۇشەلەرى جىلىنا ءبىر رەت ەل اۋماعىندا جولاۋشىلار پويىزىمەن تەگىن جۇرە الاتىنى ايتىلدى. باستاما اسكەري قىزمەتشىلەردىڭ الەۋمەتتىك جاعدايىن جاقسارتىپ، وتباسىمەن بىرگە ساپارلاۋ مۇمكىندىگىن كەڭەيتۋگە باعىتتالعان.
«جولاۋشىلار تاسىمالى» اق وكىلى اينۇر بازاربايەۆانىڭ تۇسىندىرۋىنشە، تەگىن جول ءجۇرۋ قۇقىعى تەك قازاقستان ىشىندەگى باعىتتارعا قاتىنايتىن جولاۋشىلار پويىزدارىنا قولدانىلادى. ال وسى شىعىندار «قازاقستان تەمىر جولى» ۇلتتىق كومپانياسىنىڭ قاراجاتى ەسەبىنەن وتەلەدى.
سونداي-اق كەزدەسۋدە «قتج» اق تاريف ساياساتى دەپارتامەنتىنىڭ ديرەكتورى دياس تۇسىپبەكوۆ جەڭىلدىكتى پايدالانۋ تارتىبىنە قاتىستى قويىلعان سۇراقتارعا جاۋاپ بەرىپ، مۇمكىن بولاتىن تەحنيكالىق جانە ۇيىمداستىرۋشىلىق ماسەلەلەرگە توقتالدى.
ءىس-شارا سوڭىندا ءىىم ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور قايرات ۇمبەتوۆ باستامانىڭ ماڭىزىن اتاپ ءوتىپ، جوبانى ىسكە اسىرۋ كەزىندە بەلگىلەنگەن تالاپتاردىڭ قاتاڭ ساقتالۋى قاجەت ەكەنىن جەتكىزدى. ونىڭ ايتۋىنشا، بۇل قولداۋ اسكەري قىزمەتشىلەر مەن ولاردىڭ وتباسى مۇشەلەرىنىڭ الەۋمەتتىك قورعالۋىن كۇشەيتىپ، دەمالىستى الدىن الا جوسپارلاۋعا جانە جول شىعىندارىن ايتارلىقتاي ازايتۋعا مۇمكىندىك بەرەدى.