بۇل تۋرالى كونستيتۋسيالىق كەڭەستىڭ ءتوراعاسى قايرات ءمامي ايتتى.
كەلەسى جىلدان باستاپ جەكە ادامدار كونستيتۋسيالىق سوتقا تىكەلەي شاعىمدانا الادى، دەپ حابارلايدى Almaty-akshamy.kz
ءمامي 5 ماۋسىمدا وتكەن رەفەرەندۋم ەلىمىز ءۇشىن ايرىقشا ءمانى بار تاريحي وقيعا بولعانىن اتاپ ءوتتى. ايتۋىنشا، كونستيتۋسيالىق رەفورما بۇكىل قۇقىق سالاسىن جاڭعىرتۋعا جول اشتى.
«جەكە ادامنىڭ قۇقىعىن قورعاۋ ءارى قاراي كۇشەيتىلدى. وسى رەفورما اياسىندا كونستيتۋسيالىق كەڭەس ورنىنا كونستيتۋسيالىق سوت قۇرىلاتىن بولدى. كەلەسى جىلدان باستاپ جەكە ادامدار كونستيتۋسيالىق سوتقا تىكەلەي شاعىمدانا الادى»، - دەدى ول.
سونداي-اق، رەفورما اياسىندا پرەزيدەنتتىڭ تىكەلەي ۇسىنىسىمەن كونستيتۋسيالىق سوتقا جۇگىنۋ سۋبەكتىلەرىنە باس پروكۋرور جانە ادام قۇقىقتارى جونىندەگى ۋاكىل قوسىلدى.
«جوعارىدا اتالعان وزگەرىستەر ەلىمىزدە ادام قۇقىقتارى مەن بوستاندىقتارىن ءتيىمدى قورعاۋ جۇيەسىن ءارى قاراي تەرەڭدەتۋگە جول اشتى. كونستيتۋسيالىق رەفورما اياسىندا بولعان جاڭالىقتار حالىقارالىق تاجىريبەگە سايكەس كەلەدى. اتالعان وزگەرىستەر جەكە ادامنىڭ كونستيتۋسيالىق باقىلاۋعا قول جەتكىزۋىن كەڭەيتۋدى قولدايدى»، - دەدى كونستيتۋسيالىق كەڭەس ءتوراعاسى.
ايتۋىنشا، ءقازىر «كونستيتۋسيالىق سوت تۋرالى» كونستيتۋسيالىق زاڭ ازىرلەنىپ جاتىر.