ق ر ەڭبەك جانە حالىقتى الەۋمەتتىك قورعاۋ مينيسترلىگى سۋ تاسقىنىنان زارداپ شەككەندەرگە وتەماقى تولەيتىنى تۋرالى مەسسەندجەرلەر مەن الەۋمەتتىك جەلىلەردە تاراتىلىپ جاتقان اقپارات شىندىققا جاناسپايدى.
بۇل تۋرالى Almaty-akshamy.kz ق ر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساي وتىرىپ حابارلايدى.
ەڭبەكمينى سۋ تاسقىنىنان زارداپ شەككەندەرگە وتەماقى تولەمدەرىن جۇزەگە اسىراتىنى تۋرالى الەۋمەتتىك جەلىلەردە جانە مەسسەندجەرلەردە جالعان اقپارات تاراتىلۋدا. بەلگىسىز تۇلعالار تولەمدەردى الۋ ءۇشىن «تولىعىراق» باتىرماسىن باسۋدى نەمەسە سىلتەمەگە ءوتۋدى ۇسىنادى.
مەملەكەت باسشىسىنىڭ تاپسىرماسىنا سايكەس سۋ تاسقىنىنان زارداپ شەككەن قازاقستاندىقتارعا جەرگىلىكتى اتقارۋشى ورگاندار ءبىرجولعى تولەم تۇرىندە كومەك كورسەتەدى. ولاردىڭ مولشەرى ءار وڭىردە كەلتىرىلگەن ماتەريالدىق زالالدى ەسەپتەۋ ءۇشىن قۇرىلعان ارنايى كوميسسيالاردىڭ شەشىمى بويىنشا جەكە-جەكە بەلگىلەنەتىن بولادى.
تيىسىنشە، حابارلامادا كورسەتىلگەن سىلتەمە الاياقتاردىڭ ازاماتتاردىڭ جەكە دەرەكتەرىن الۋ ءتاسىلى بولۋى مۇمكىن. الاياقتارمەن ءوزارا ارەكەتتەسۋدى بولدىرماۋ ءۇشىن ەشبىر جاعدايدا سىلتەمەگە وتپەۋگە كەڭەس بەرەمىز.
مەملەكەتتىك قولداۋدىڭ ءتيىستى شارالارى تۋرالى رەسمي اقپارات تەك قانا 1414 نومىرىنەن سمس-حابارلامالار ارقىلى تاراتىلادى.
ازاماتتاردى تەك قانا رەسمي اقپارات كوزدەرىنە سۇيەنۋگە شاقىرامىز.
جالعان اقپارات تاراتۋ زاڭمەن جازالاناتىنىن ەستەرىڭىزگە سالامىز.