ق ر ەڭبەك جانە حالىقتى الەۋمەتتىك قورعاۋ مينيسترلىگىندە ۆەدومستۆو باسشىسى سۆەتلانا جاقىپوۆانىڭ توراعالىعىمەن القا وتىرىسى ءوتتى، وندا 2024 جىلدىڭ 10 ايىنداعى جۇمىس قورىتىندىلارى مەن 2025 جىلعا ارنالعان جوسپارلار تالقىلاندى، دەپ حابارلايدى aqshamnews.kz.
القا وتىرىسىنا ۆيسە-مينيسترلەر، اپپارات باسشىسى، كوميتەت ءتوراعالارى، دەپارتامەنت ديرەكتورلارى، اكىمدەردىڭ ورىنباسارلارى، ەڭبەكمينىنىڭ ۆەدومستۆولىق باعىنىستى ۇيىمدارىنىڭ، سونداي-اق ەلىمىزدىڭ بارلىق وڭىرلەرىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارمالارىنىڭ، ەڭبەك موبيلدىلىگى ورتالىقتارىنىڭ باسشىلارى قاتىستى.
كۇن تارتىبىندە 2025-2030 جىلدارعا ارنالعان ينكليۋزيۆتى ساياسات تۇجىرىمداماسىن قابىلداۋ جانە ودان ءارى ىسكە اسىرۋ، ارناۋلى الەۋمەتتىك قىزمەتتەر كورسەتەتىن ۇيىمداردىڭ قىزمەتىن ليسەنزيالاۋ، جۇمىسپەن قامتۋعا جاردەمدەسۋ شارالارىن كورسەتۋ جانە اتاۋلى الەۋمەتتىك كومەك (بۇدان ءارى – ااك) جۇيەسىن ترانسفورماسيالاۋ ماسەلەلەرى تۇردى.
ءوز سوزىندە ۆيسە-مينيستر اسقاربەك ەرتايەۆ 2025 جىلعى 1 قاڭتاردان باستاپ ارناۋلى الەۋمەتتىك قىزمەتتەر كورسەتەتىن ۇيىمداردىڭ قىزمەتىن ليسەنزيالاۋ ەنگىزىلەتىنىن ايتتى. وسى قىزمەتتەرگە تاريفتەردى قالىپتاستىرۋ ادىستەمەسىنىڭ جوباسى ازىرلەندى.
سونداي-اق، 2025-2030 جىلدارعا ارنالعان ينكليۋزيۆتى ساياسات تۇجىرىمداماسىنىڭ جوباسى ازىرلەندى، ول ۇكىمەت اپپاراتىنىڭ قاراۋىندا.
«تۇجىرىمداما جوباسىنىڭ تۇجىرىمدامالىق جاڭالىعى مۇگەدەكتىكتىڭ مەديسينالىق-الەۋمەتتىك-الەۋمەتتىك-قۇقىق قورعاۋ مودەلىنە كوشۋ بويىنشا جاعدايلار جاساۋ بولىپ تابىلادى. ينكليۋزيۆتى ساياساتتى ىسكە اسىرۋدىڭ جاڭا تاسىلدەرى ەرەكشە قاجەتتىلىكتەرى بار ادامداردىڭ قوعامعا تولىققاندى الەۋمەتتىك ىقپالداسۋى ءۇشىن جاعداي جاساۋعا باعىتتالعان پارمەندى شارالار كەشەنىن قابىلداۋدى كوزدەيدى. تۇجىرىمداما جوباسى 13 باعىتتى كوزدەيدى جانە 56 ءىس-شارادان تۇرادى»، – دەپ اتاپ ءوتتى ەرتايەۆ.
ۆيسە-مينيستر اسقار بياحمەتوۆ وڭىرلىك جۇمىسپەن قامتۋ كارتالارى شەڭبەرىندە 804 مىڭنان استام ادام جۇمىسقا ورنالاستىرىلعانىن، ونىڭ ىشىندە 260 مىڭى – مەملەكەت باسشىسىنىڭ «10 مىڭ تۇرعىنعا 100 جاڭا جۇمىس ورنى» باستاماسى اياسىندا جۇمىسقا ورنالاستىرىلعانىن حابارلادى. ول مينيسترلىك زەينەتاقى جارنالارى مەن ەلەكتروندىق ەڭبەك شارتتارى بويىنشا دەرەكتەردى تالداي وتىرىپ، اقپاراتتىق جۇيەلەر ارقىلى اپتا سايىنعى جۇمىسقا ورنالاسۋ مونيتورينگىن جۇرگىزەتىنىن اتاپ ءوتتى.
بۇدان باسقا جۇمىسشى ماماندىقتار جىلى شەڭبەرىندە جۇمىسكەرلەر قۇقىقتارىن قورعاۋ، جۇمىسشى كادرلاردى دايارلاۋ جۇيەسىن جەتىلدىرۋ، جۇمىس بەرۋشىلەردى مامانداردى وقىتۋعا تارتۋ، سونداي-اق جۇمىسشى كاسىپتەرىنىڭ بەدەلىن ارتتىرۋ جونىندەگى شارالار جوسپارلانعان.
اتاۋلى الەۋمەتتىك كومەك كورسەتۋ تەتىكتەرىن جەتىلدىرۋ جونىندەگى جوسپارلار تۋرالى ۆيسە-مينيستر ولجاس انافين ايتىپ بەردى.
«مەملەكەت باسشىسى ازاماتتاردىڭ شىعىستارىن ەسكەرە وتىرىپ، ااك كورسەتۋ تاسىلدەرىن قايتا قاراۋ مىندەتىن قويدى. وسىعان بايلانىستى وتباسىنىڭ سيفرلىق كارتاسىن پايدالانا وتىرىپ، مەملەكەتتىك جانە مەملەكەتتىك ەمەس ۇيىمداردىڭ جۇيەلەرىمەن ينتەگراسيالاۋ ارقىلى ااك-تى ترانسفورماسيالاۋ ۇدەرىسى جۇرەتىن بولادى. ااك تاعايىنداۋ تەتىگىندەگى الداعى وزگەرىستەر شىن مانىندە مۇقتاج ازاماتتاردى انىقتاۋعا جانە ولارعا مەملەكەت تاراپىنان نىسانالى قولداۋدى قامتاماسىز ەتۋگە مۇمكىندىك بەرەدى»، – دەدى ولجاس انافين.
مەملەكەتتىك ەڭبەك ينسپەكسياسى كوميتەتى ءتوراعاسىنىڭ م.ا. مۇرات مۇراتبەكوۆ 10 ايدا 4،5 مىڭنان استام تەكسەرۋ جۇرگىزىلگەنىن، 7 مىڭنان استام بۇزۋشىلىق انىقتالعانىن باياندادى. جۇمىس بەرۋشىلەرگە 2 723 ۇيعارىم بەرىلىپ، 339 ملن تەڭگە سوماسىنا 3 207 اكىمشىلىك ايىپپۇل سالىندى. رەسپۋبليكامىزدىڭ 268 كاسىپورنى 4،3 ملرد تەڭگە سوماسىنا جالاقى بويىنشا بەرەشەك ەكەنى انىقتالدى. قابىلدانعان شارالاردىڭ ناتيجەسىندە 3،2 ملرد تەڭگە تولەندى، 16،6 مىڭ قىزمەتكەردىڭ قۇقىقتارى قورعالدى.
وتىرىستى قورىتىندىلاي كەلە قاتىسۋشىلار جىل سوڭىنا دەيىن شەشىلۋى ءتيىس باستى مىندەتتەردى، سونداي-اق 2025 جىلعا جوسپارلانعان نەگىزگى ءىس-شارالاردى تالقىلادى. الەۋمەتتىك قولداۋ، قىزمەتتەردى سيفرلاندىرۋ جانە جۇمىسپەن قامتۋعا جاردەمدەسۋ شارالارىنىڭ تيىمدىلىگىن ارتتىرۋدا باسىمدىقتار بەرىلدى.
ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قويىلعان مىندەتتەردى ساپالى ورىنداۋدىڭ ماڭىزدىلىعىن اتاپ ءوتىپ، ولاردى ىسكە اسىرۋدىڭ اشىق مونيتورينگىن قامتاماسىز ەتۋ قاجەتتىگىنە نازار اۋداردى. ول سونداي-اق ازاماتتاردى الەۋمەتتىك قورعاۋدى نىعايتۋعا، ەڭبەك قۇقىقتارىن باقىلاۋدى كۇشەيتۋگە جانە حالىقتىڭ وسال توپتارىن قولداۋ تەتىكتەرىن جەتىلدىرۋگە باعىتتالعان ءبىرقاتار ناقتى تاپسىرمالار بەردى.