ەڭبەكمين مۇگەدەكتىك ماسەلەلەرى بويىنشا شتاتتان تىس كەڭەسشىلەردى تاعايىنداۋ ەرەجەسىنىڭ جوباسىن ازىرلەدى

ق ر ەڭبەك جانە حالىقتى الەۋمەتتىك قورعاۋ مينيسترلىگى مۇگەدەكتىك ماسەلەلەرى بويىنشا مينيسترلەردىڭ، اۋدانداردىڭ، قالالاردىڭ، وبلىستىق ماڭىزى بار قالالاردىڭ، وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرىنىڭ شتاتتان تىس كەڭەسشىلەرىن تاعايىنداۋ قاعيدالارىن ازىرلەدى.

قۇجات «اشىق نقا» پورتالىندا 2024 جىلعى 5 ساۋىرگە دەيىن جاريا تالقىلاۋ ءۇشىن ورنالاستىرىلعان، دەپ حابارلايدى Almaty-akshamy.kz cالا مينيسترلىگىنە سىلتەمە جاساپ. 

كەڭەسشى قىزمەتىنىڭ ماقساتى رەسپۋبليكالىق جانە جەرگىلىكتى دەڭگەيلەردە شەشىمدەردى تالقىلاۋ جانە قابىلداۋ كەزىندە مۇگەدەكتىگى بار ادامداردىڭ زاڭدى مۇددەلەرىن ءبىلدىرۋ جانە ولاردىڭ پىكىرىن ەسكەرۋدى قامتاماسىز ەتۋ بولىپ تابىلادى.

ەرەجەگە سايكەس مۇگەدەكتىگى بار ادامداردىڭ قۇقىقتارىن قورعاۋ جانە مۇمكىندىكتەرىن كەڭەيتۋ سالاسىندا كەمىندە بەس جىل قوعامدىق جانە وزگە دە جۇمىس تاجىريبەسى بار، جەرگىلىكتى دەڭگەيدە كەڭەسشى تاڭداعان جاعدايدا – ءتيىستى اكىمشىلىك-اۋماقتىق بىرلىك شەگىندە تۇراقتى تۇراتىن، كەمىندە 18 جاستاعى ق ر ازاماتى كەڭەسشى بولىپ تاعايىندالۋى مۇمكىن.

كەڭەسشى ءبىرىنشى باسشىنىڭ الدىندا، سونداي-اق رەسپۋبليكالىق نەمەسە وڭىرلىك دەڭگەيدە مۇگەدەكتىگى بار ادامداردى الەۋمەتتىك قورعاۋ سالاسىنداعى ۇيلەستىرۋ كەڭەسىنىڭ الدىندا ەسەپ بەرەدى جانە جاۋاپتى بولادى.

كەڭەسشىنىڭ وكىلەتتىك مەرزىمى – ءۇش جىل. ءبىر ادام قاتارىنان ەكى رەتتەن ارتىق كەڭەسشى بولا المايدى.

كەڭەسشى لاۋازىمىنا كانديداتۋرالاردى مۇگەدەكتىگى بار ادامداردىڭ قوعامدىق بىرلەستىكتەرى، سونداي-اق ازاماتتار، ونىڭ ىشىندە ءوزىن-وزى ۇسىنۋ جولىمەن ۇسىنادى.

كەڭەسشى كانديدات:

1) مەملەكەتتىك لاۋازىمدى اتقاراتىن ادام، ازاماتتىق قىزمەتشى، قازاقستان رەسپۋبليكاسى پارلامەنتىنىڭ دەپۋتاتى، سۋديا؛ 

2) قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن وتەلمەگەن نەمەسە الىنباعان سوتتىلىعىنىڭ بولۋى؛

3) زاڭدا بەلگىلەنگەن تارتىپپەن سوت:

ارەكەتكە قابىلەتسىز نەمەسە ارەكەت قابىلەتى شەكتەۋلى دەپ تانۋعا؛

سىبايلاس جەمقورلىق قىلمىس جانە (نەمەسە) سىبايلاس جەمقورلىق قۇقىق بۇزۋشىلىق جاساعانى ءۇشىن كىنالىدەپ تانۋعا؛

4) پسيحيكالىق دەنساۋلىق سالاسىندا مەديسينالىق كومەك كورسەتەتىن ۇيىمداردا پسيحيكالىق، مىنەز-قۇلىق بۇزىلىستارىنا (اۋرۋلارىنا)، ونىڭ ىشىندە پسيحواكتيۆتى زاتتاردى قولدانۋعا بايلانىستى ەسەپتە تۇرۋى بولماۋى كەرەك.

ۇمىتكەرلەر كەلەسى جاعدايلاردىڭ ءبىرى بولعان جاعدايدا كونكۋرسقا جىبەرىلمەيدى:

1) وسى قاعيدالاردىڭ 3، 14-تارماقتارىندا بەلگىلەنگەن تالاپتارعا سايكەس كەلمەۋى؛

2) وسى قاعيدالاردىڭ 15-تارماعىندا كورسەتىلگەن قۇجاتتار جانە (نەمەسە) مالىمەتتەر ۇسىنىلماۋى؛

3) دايەكسىز اقپاراتتى قامتيتىن قۇجاتتاردى جانە (نەمەسە) مالىمەتتەردى ۇسىنۋ.

ەڭ كوپ داۋىس جيناعان كانديدات كەڭەسشى لاۋازىمىنا ۇسىنىلعان بولىپ سانالادى. بىردەي داۋىس سانىن جيناعان كانديداتتار بويىنشا جۇمىس توبىنىڭ باسشىسى شەشۋشى داۋىس قۇقىعىن وزىنە قالدىراتىن ءبىرىنشى باسشىعا ۇسىنىس ەنگىزەدى.

كەڭەسشى كەلەسى جاعدايلاردا ءوز قىزمەتىن مەرزىمىنەن بۇرىن توقتاتادى:

- كەڭەسشىنىڭ جەكە باستاماسى؛

- سوتتىڭ ونى ارەكەتكە قابىلەتسىز نەمەسە ارەكەت قابىلەتى شەكتەۋلى دەپ تانۋى؛

- سوتتىڭ ونى حابار-وشارسىز كەتتى دەپ تانۋى نەمەسە قايتىس بولدى دەپ جاريالاۋى؛

- وعان قاتىستى سوتتىڭ ايىپتاۋ ۇكىمى زاڭدى كۇشىنە ەنگەن؛

- قازاقستان رەسپۋبليكاسىنان تىس جەرلەرگە تۇراقتى تۇرۋعا كەتۋ؛

- كەڭەسشى قىزمەتىنىڭ تيىمدىلىگىن باعالاۋ نەگىزىندە بەلگىلەنگەن فۋنكسيونالدىق مىندەتتەردى ورىنداماۋ نەمەسە تيىسىنشە ورىنداماۋ؛

- مەملەكەتتىك، ازاماتتىق قىزمەتكە كىرۋ، قازاقستان رەسپۋبليكاسى پارلامەنتىنىڭ دەپۋتاتى بولىپ سايلانۋ، سۋديا بولىپ تاعايىندالۋ؛

- وكىلەتتىك مەرزىمىنىڭ اياقتالۋى.

كەڭەسشىنى تاعايىنداۋ ءراسىمى وسى قاعيدالاردا كوزدەلگەن تارتىپكە سايكەس قازىرگى كەڭەسشىنىڭ وكىلەتتىك مەرزىمى اياقتالعانعا دەيىن ەكى اي بۇرىن باستالادى.

قاعيدامەن تولىعىراق «اشىق نقا» پورتالىندا تومەندەگى سىلتەمە بويىنشا تانىسۋعا بولادى: https://legalacts.egov.kz/npa/view؟id=14989408