قازاقستاندا بارلىق سالانى سيفرلاندىرۋ قارقىن الۋدا
ءبىرىنشى كەزەكتە الەۋمەتتىك-ەڭبەك سالاسىن سيفرلاندىرۋ باستالماق.
ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ جانە ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى (ءسدياوم) باعدات مۋسين الەۋمەتتىك-ەڭبەك سالاسىن سيفرلاندىرۋ بويىنشا جۇمىس كەڭەسىن وتكىزدى، ونىڭ بارىسىندا اتقارىلعان جۇمىستار مەن اعىمداعى جىلعا ارنالعان مىندەتتەر، سونداي-اق سيفرلاندىرىلعان مەملەكەتتىك قىزمەتتەردىڭ رەينجينيرينگى ماسەلەلەرى تالقىلاندى، دەپ حابارلادى Almaty-akshamy.kz. ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ تاراتقان حابارىنا سىلتەمە جاساپ.
ۆەدومستۆو باسشىلارىنان باسقا كەڭەسكە ەڭبەكمينى مەن ءسدياوم ۆيسە-مينيسترلەرى جانە دەپارتامەنت ديرەكتورلارى، ەڭبەك، الەۋمەتتىك قورعاۋ جانە كوشى-قون كوميتەتىنىڭ، «ازاماتتارعا ارنالعان ۇكىمەت» مەملەكەتتىك كورپوراسياسى» كەاق، «ەردو» اق، «زەردە» ۇيح» اق جانە «ۇات» اق وكىلدەرى قاتىستى.
سەرىك شاپكەنوۆ الەۋمەتتىك-ەڭبەك سالاسىندا كورسەتىلەتىن 45 قىزمەتتىڭ 41ء-ى (91%) ەلەكتروندىق تۇردە كورسەتىلەتىنىن، ونىڭ 18ء-ى پرواكتيۆتى، ياعني ازاماتتىڭ قاتىسۋىنسىز اۆتوماتتى تۇردە كورسەتىلەتىنىن حابارلادى. سونداي-اق، مينيستر ەلەكتروندىق ەڭبەك بيرجاسى، سيفرلىق جۇمىسپەن قامتۋ ورتالىقتارى، ەڭبەك شارتتارىن ەسەپكە الۋدىڭ ءبىرىڭعاي جۇيەسى، الەۋمەتتىك قىزمەتتەر پورتالى جانە ت.ب. سياقتى ەڭبەكمينى ىسكە اسىرىپ جاتقان جوبالار تۋرالى ايتىپ بەردى.
ءسدياوم وكىلدەرى 1 شىلدەدەن باستاپ «1411» بايلانىس ورتالىعى «1414» ءبىرىڭعاي بايلانىس ورتالىعىنىڭ پلاتفورماسىنا اۋىستىرىلاتىنىن حابارلادى. الداعى ۋاقىتتا 2 جانە 3-توقسانداردىڭ قورىتىندىسى بويىنشا بايلانىس ورتالىعىنىڭ قىزمەتىنە بىرلەسكەن باعالاۋ جۇرگىزىلەتىن بولادى.
ءوز كەزەگىندە ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ەربول وسپانوۆ الەۋمەتتىك قىزمەتتەر پورتالىن پايدالانۋشىلاردىڭ بەلسەندىلىگىنىڭ ارتۋىنا بايلانىستى 1 تامىزدان باستاپ «ەردو» اق بازاسىندا الەۋمەتتىك قىزمەتتەر پورتالى ماسەلەلەرى بويىنشا بايلانىس ورتالىعىن ىسكە قوسۋ جوسپارلانىپ وتىرعانىن حابارلادى.
«ازاماتتارعا ارنالعان ۇكىمەت» مەملەكەتتىك كورپوراسياسى» كەاق 1414 بايلانىس ورتالىعىنان الەۋمەتتىك قىزمەتتەر پورتالى ماسەلەلەرى بويىنشا قوڭىراۋلاردى اۆتوماتتى تۇردە باعىتتاۋدى جۇرگىزەدى»، – دەدى ول.
ەربول وسپانوۆ سونداي-اق مەملەكەت باسشىسىنىڭ زەينەتاقى مەن جاردەماقى تاعايىنداۋعا بايلانىستى پروسەستەردى تولىق سيفرلاندىرۋ تۋرالى تاپسىرماسىنىڭ ورىندالۋ بارىسى تۋرالى حابارلادى.
«نەگىزگى مىندەت – قىزمەت كورسەتۋدىڭ باستاماشىسى ازامات ەمەس، مەملەكەت بولۋى ءۇشىن وسى قىزمەتتى مۇمكىندىگىنشە پرواكتيۆتى فورماتقا كوشىرۋ. ول ءۇشىن مەملەكەتتىك ورگانداردىڭ اقپاراتتىق جۇيەلەرىندە ازامات تۋرالى اقپاراتتىڭ بولۋى قاجەت. بۇگىنگى تاڭدا زەينەتاقى تولەمدەرىن تاعايىنداۋ پروسەسى ازاماتتىڭ مەملەكەتتىك كورپوراسياعا جەكە بارىپ ءوتىنىش بەرۋى تالاپ ەتىلمەتىندەي ەتىپ سيفرلاندىرىلدى. قۇجاتتاردىڭ سايكەستىگىن ودان ءارى قاراۋ، ەلەكتروندىق زەينەتاقى ىستەرىن قالىپتاستىرۋ ەڭبەكمينىنىڭ اقپاراتتىق جۇيەلەرىندە جۇرگىزىلەدى»، – دەپ ءبولىستى ۆيسە-مينيستر.
ونىڭ ايتۋىنشا، بۇل باعىتتاعى جۇمىس جالعاسۋدا، ازامات تۋرالى اقپاراتتى مەملەكەتتىك ورگانداردىڭ اقپاراتتىق جۇيەلەرىنە تولىق اۋدارۋدىڭ مۇمكىن بولاتىن نۇسقالارىن ەسەپتەۋ جۇرگىزىلۋدە.
ەڭبەكمينى سونداي-اق زەينەتاقى تولەمدەرى مەن جاردەماقىلاردى اكىمشىلەندىرۋ جونىندەگى شىعىستاردى وڭتايلاندىرۋ بويىنشا جۇمىس ىستەۋدە. قازىرگى ۋاقىتتا ءاربىر جاردەماقى نەمەسە زەينەتاقى تولەمى ەكىنشى دەڭگەيدەگى بانكتەرگە جانە «قازپوشتا» اق-عا جەكە ەلەمەنت رەتىندە تۇسەدى، ولاردىڭ ءارقايسىسى ءۇشىن كوميسسيالىق الىم تولەنەدى. بۇل شەشىم كوميسسيالىق الىم تولەمدەرىنەن جىل سايىن شامامەن 4،5 ملرد تەڭگەنى ۇنەمدەۋگە مۇمكىندىك بەرەدى.
سونىمەن قاتار، كەڭەس بارىسىندا تاراپتار «بالا تۋۋعا بايلانىستى جانە ءبىر جاسقا دەيىنگى بالا كۇتىمى بويىنشا جاردەماقىلار تاعايىنداۋ» پرواكتيۆتى مەملەكەتتىك قىزمەتىن وڭتايلاندىرۋدى تالقىلادى. وسىلايشا، كورسەتىلەتىن قىزمەتتى الۋشىمەن ديالوگ كەزىندە SMS سانىنىڭ ەكىدەن بىرگە دەيىن قىسقارۋىنىڭ ارقاسىندا 1 ماۋسىمنان باستاپ پرواكتيۆتى تۇردە ءساتتى كورسەتىلگەن قىزمەتتەر سانى 10%-دان 37%-عا دەيىن ءوستى. جىل سوڭىنا دەيىن بۇل كورسەتكىشتى 50%-عا دەيىن جەتكىزۋ جوسپارلانىپ وتىر.
جىل سوڭىنا دەيىن تاعى كەلەسىدەي ءبىرقاتار پرواكتيۆتى قىزمەتتەردى وڭتايلاندىرۋ جوسپارلانۋدا:
– جۇمىسىنان ايىرىلعان جاعدايدا تولەنەتىن الەۋمەتتىك تولەمدى تاعايىنداۋ؛
– اسىراۋشىسىنان ايىرىلعان جاعدايدا تولەنەتىن الەۋمەتتىك تولەمدى تاعايىنداۋ؛
– اسىراۋشىسىنان ايىرىلۋ بويىنشا مەملەكەتتىك الەۋمەتتىك جاردەماقىنى تاعايىنداۋ؛
– ەڭبەك ەتۋ قابىلەتىنەن ايىرىلعان جاعدايدا بەرىلەتىن الەۋمەتتىك تولەمدى تاعايىنداۋ؛
– مۇگەدەكتىگى بويىنشا مەملەكەتتىك الەۋمەتتىك جاردەماقى تاعايىنداۋ؛
– «التىن القا»، «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان، «انا داڭقى» وردەندەرىمەن ماراپاتتالعان كوپبالالى انالارعا مەملەكەتتىك جاردەماقى تاعايىنداۋ.
كەڭەس قورىتىندىسى بويىنشا تاراپتار الەۋمەتتىك-ەڭبەك سالاسىن سيفرلاندىرۋ بويىنشا بەلسەندى ىنتىماقتاستىقتى جالعاستىرۋعا كەلىستى.