الماتى قالاسىنىڭ ءبىلىم باسقارماسىنا قاراستى «ءۇمىت ءۇيى» كوممۋنالدىق مەملەكەتتىك مەكەمەسىندە مەملەكەت باسشىسى قاسىم-جومارت توقايەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جاڭا جولداۋى تالقىلاندى.
Amanat پارتياسىنىڭ باستاماسىمەن «ءۇمىت ءۇيى» كوممۋنالدىق مەملەكەتتىك مەكەمەسىندە ەل پرەزيدەنتىنىڭ 1 قىركۇيەك كۇنى جاريالاعان قازاقستان حالقىنا جولداۋى تالقىلانىپ، ەڭبەك ۇجىمىنا ونىڭ نەگىزى باعىتتارى ءتۇسىندىرىلدى. ايتىلعان جيىندا پەدياتريا جانە بالالار حيرۋرگياسى عىلىمي ورتالىعىنىڭ ديرەكتورلار كەڭەسىنىڭ ءتوراعاسى، مەديسينا عىلىمىنىڭ دوكتورى ماريا وماروۆا سپيكەر رەتىندە اقپاراتتىق-ناسيحاتتىق جۇمىستار جۇرگىزدى.
«مىنە، ءبىر ايدان استام ۋاقىت پرەزيدەنت جولداۋىن تالقىلاپ جاتىرمىز. سەبەبى، ءاربىر جولداۋ بۇل – ءسىز بەن ءبىزدىڭ كەلەشەكتەگى ماقساتىمىز بەن مىندەتىمىز. قىركۇيەكتىڭ ءبىرىنشى جۇلدىزىندا جاريالانعان جاڭا ۇندەۋ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتاۋىمەن شىقتى. وندا دەنساۋلىق ساقتاۋ سالاسىنا ۇلكەن كوڭىل ءبولىندى. ارينە، دەنساۋلىق ساقتاۋ سالاسى بولسىن، عىلىم سالاسى بولسىن، مادەنيەت سالاسى بولسىن، وتە وزەكتى ماسەلەلەر كوپ. ءبىراق ونىڭ ىشىندە پرەزيدەنتىمىزدىڭ مەديسينا پروبلەمالارىنا نازار اۋدارىپ، ءوز سوزىندە ناقتى شەشىمدەر ايتقانى كوڭىل قۋانتادى. اسىرەسە، اۋىلدارداعى دەنساۋلىق ساقتاۋ سالاسىنا ءمان بەرىلدى. ناقتى ايتقاندا، ەمدەۋ مەكەمەسى جوق 650 ەلدى مەكەندە الداعى ەكى جىلدا مەديسينالىق جانە فەلدشەرلىك-اكۋشەرلىك بولىمشەلەر سالىنىپ، قاجەتتى قۇرال-جابدىقپەن تولىق قامتاماسىز ەتىلەتىنى ايتىلدى. وسىلايشا، مەملەكەت ءبىر ميلليوننان استام ادامنىڭ العاشقى مەديسينالىق-سانيتارلىق كومەك الۋىنا مۇمكىندىك جاسايدى. سونىمەن قاتار، ۇلتتىق جوبا اياسىندا 32 اۋداندىق اۋرۋحانا زامانعا ساي جاڭارىپ، اۋدانارالىق كوپبەيىندى مەكەمەگە اينالماق. وندا ينسۋلتتەن ەمدەۋ ورتالىقتارى، حيرۋرگيا، جانساقتاۋ جانە وڭالتۋ بولىمدەرى اشىلادى. سونىڭ ارقاسىندا ءتورت ميلليوننان استام ادامعا كورسەتىلەتىن مەديسينالىق قىزمەتتىڭ ساپاسىن ارتتىرۋ كوزدەلىپ وتىر»، – دەدى ماريا وماروۆا.
سونداي-اق، م.وماروۆا جولداۋ بارىسىندا ايتىلعان وزگە دە ماڭىزدى ماسەلەلەرگە توقتالدى.
«مەملەكەت باسشىسى قىركۇيەك ايىنداعى جولداۋىندا ساپالى دارىگەرلەردى دايىنداۋ ماسەلەسىنە دە اسا ءمان بەردى. ءبىلىم بەرۋ سالاسىندا سان ەمەس، ساپا باستى ورىندا ەكەنىن ايتتى. وعان قوسا، رەزيدەنتۋرانىڭ مەملەكەتتىك گرانت كولەمىن 70 پايىزعا كوبەيتۋ كەرەكتىگىن حابارلادى. وزدەرىڭىز دە بىلەسىزدەر عوي، ساپالى دارىگەرلەر جەتىسپەيدى. سوندىقتان بۇل - قازاقستان مەديسيناسىن دامىتۋداعى وتە ءتيىمدى قادام»، – دەدى ول.
ايتا كەتكەن ءجون، الماتى قالاسى ءبىلىم باسقارماسىنىڭ «ءۇمىت ءۇيى» كوممۋنالدىق مەملەكەتتىك مەكەمەسى تاربيە مەن ءبىلىم بەرۋ فۋنكسيالارىن جۇزەگە اسىرۋ ءۇشىن ۇيىمدىق-قۇقىقتىق تۇردە قۇرىلعان، زاڭدى تۇلعانىڭ مارتەبەسىنە يە، كوممەرسيالىق ەمەس مەكەمە بولىپ سانالادى. 1994 جىلى «بوبەك» قايىرىمدىلىق قورىنىڭ باستاماسىمەن اشىلعان «ءۇمىت ءۇيى» كوممۋنالدىق مەملەكەتتىك مەكەمەسى - رەسپۋبليكاداعى ەرەكشە، جاڭا ۇلگىدەگى بالاماسى جوق مەكەمە. بۇل مەكەمەگە تۋعاننان 7 جاسقا دەيىنگى دەنساۋلىعىندا كىناراتى جوق، اتا-اناسىنان الەۋمەتتىك جاعدايىنىڭ ناشارلىعىنا بايلانىستى ۋاقىتشا اجىراتىلعان بالالار قابىلدانادى. اتاپ ايتقاندا، جالعىزباستى ستۋدەنت انالار مەن جالعىزباستى اكەلەر نەمەسە اسىراۋشىسىنىڭ بىرەۋىنەن ايىرىلعان بالالار كەلىپ تۇسەدى دە، ءوز مۇمكىندىگى اسىراۋ حالىنە جەتكەن كەزدە الىپ كەتەدى. قازىرگى ۋاقىتقا دەيىن 604 بالا تاربيەلەنىپ، وتباسىنا ورالىپ وتىر.