2025 جىل قازاقستاندا جۇمىسشى ماماندىقتارى جىلى دەپ جاريالاندى. بۇل باستاما اياسىندا ەلىمىزدىڭ ءار وڭىرىندە، سونىڭ ىشىندە اباي وبلىسىندا، تەحنيكالىق جانە كاسىپتىك ءبىلىم بەرۋ سالاسىن دامىتۋعا ەرەكشە نازار اۋدارىلۋدا. وڭىردە زاماناۋي ءبىلىم بەرۋ باعدارلامالارىن ەنگىزۋ، جاڭا وقۋ باعىتتارىن اشۋ، سونداي-اق ستۋدەنتتەردى جاتاقحانامەن قامتاماسىز ەتۋ سياقتى ماڭىزدى جوبالار ىسكە اسىرىلماق، دەپ حابارلايدى Aqshamnews.kz..
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، الداعى التى جىلدا قازاقستاندا جۇمىسشى ماماندىقتارى بويىنشا 1،6 ميلليون مامان قاجەت بولادى. ونىڭ ىشىندە 400 مىڭعا جۋىق ادام – كاسىپتىك-تەحنيكالىق ءبىلىم العان جۇمىسشىلار. بۇل ەڭبەك نارىعىنداعى سۇرانىس تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋدىڭ ماڭىزدىلىعىن كورسەتەدى.
ءقازىردىڭ وزىندە مامانداردى دايارلاۋ ساپاسىن ارتتىرۋ ءۇشىن 1،6 مىڭ كاسىبي ستاندارت جاڭارتىلىپ، ءبىلىم بەرۋ باعدارلامالارىنىڭ 87%-ى سولارعا بەيىمدەلگەن. مۇنداي قادامدار وڭىرلەردەگى تەحنيكالىق ماماندىقتارعا دەگەن قىزىعۋشىلىقتى ارتتىرىپ، ولاردىڭ ەڭبەك نارىعىنداعى باسەكەگە قابىلەتتىلىگىن نىعايتادى.
اباي وبلىسى جۇمىسشى ماماندىقتارىن دامىتۋدا بەلسەندى تۇردە العا قادام باسۋدا. گەودەزيا، كارتوگرافيا جانە قۇرىلىس جوعارى كوللەدجىنىڭ ديرەكتورى قانىش تولەۋوۆ:
«تەحنيكالىق جانە كاسىپتىك ءبىلىم بەرۋ سالاسىندا ءبىز ۇلكەن وزگەرىستەر كۇتەمىز. قازىرگى تاڭدا ءبىزدىڭ كوللەدجدەگى ماماندىقتار ەڭبەك نارىعىندا وتە تاپشى. جاڭا باعىتتاردى ەنگىزۋ ارقىلى ءبىز وقىتۋ ساپاسىن ارتتىرۋعا سەنىمدىمىز»، — دەپ اتاپ ءوتتى.
ال IT جانە جاڭا تەحنولوگيالار جوعارى كوللەدجىنىڭ ديرەكتورى ورالحان سارتايەۆ بۇل جىلدى تەحنيكالىق ءبىلىم بەرۋ جۇيەسى ءۇشىن ماڭىزدى كەزەڭ دەپ باعالادى:
«پرەزيدەنتتىڭ شەشىمى ءبىلىم بەرۋ جۇيەسىن جاڭعىرتۋعا مۇمكىندىك بەرەدى. الداعى ءۇش جىلدا بارلىق ستۋدەنتتەردى جاتاقحانامەن قامتاماسىز ەتۋدى كوزدەپ وتىرمىز. جىل سايىن كوللەدجدەن 250-گە جۋىق تۇلەك شىعادى، ولاردىڭ 90%-دان استامى جۇمىسقا ورنالاسادى»، — دەدى ول.
اباي وبلىسىندا جاڭا وقۋ باعىتتارىن اشۋ جوسپارلانىپ وتىر. بۇگىندە وڭىردەگى تەحنيكالىق كوللەدجدەردە گەودەزيا، كارتوگرافيا، قۇرىلىس، IT جانە جاڭا تەحنولوگيالار سياقتى ماماندىقتار وقىتىلۋدا. بۇل ماماندىقتار قازىرگى ۋاقىتتا ەڭبەك نارىعىندا جوعارى سۇرانىسقا يە.
سونىمەن قاتار، ستۋدەنتتەردى جاتاقحانامەن قامتاماسىز ەتۋ ماسەلەسى دە نازاردان تىس قالمايدى. الداعى ءۇش جىلدا وزگە قالالاردان كەلگەن بارلىق ستۋدەنتتەرگە جاتاقحانا بەرۋ جوسپارى جۇزەگە اسىرىلادى. بۇل – ستۋدەنتتەر ءۇشىن ۇلكەن قولداۋ بولماق.
جۇمىسشى ماماندىقتارى جىلى – قازاقستاننىڭ تەحنيكالىق جانە كاسىپتىك ءبىلىم بەرۋ جۇيەسىن جاڭا دەڭگەيگە كوتەرۋگە ۇلكەن مۇمكىندىك. اباي وبلىسىندا وسى باعىتتا قولعا الىنعان جوبالار ايماق ەكونوميكاسىن دامىتىپ قانا قويماي، جاستارعا ساپالى ءبىلىم مەن تۇراقتى جۇمىسقا ورنالاسۋ مۇمكىندىگىن ۇسىنادى. بۇل قادامدار ەڭبەك نارىعىن بىلىكتى ماماندارمەن قامتاماسىز ەتۋگە، ەلدىڭ وندىرىستىك جانە يننوۆاسيالىق الەۋەتىن ارتتىرۋعا زور ىقپال ەتەدى.