مەملەكەت باسشىسى “ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم” اتتى جولداۋىندا ءبىزدىڭ قوعامدا ەڭبەكقورلىق، كاسىبيلىك سياقتى قاسيەتتەر وتە جوعارى باعالانۋعا ءتيىس دەپ اتاپ ءوتتى.
كەز كەلگەن ەڭبەك – ءقادىرلى. ەڭ باستىسى، اركىم جاۋاپكەرشىلىكتى تەرەڭ سەزىنىپ، ءوز مىندەتىن ساپالى اتقارۋعا ءتيىس. كاسىبىنە ادال ءارى جاۋاپكەرشىلىكپەن قاراعان ادام قاشاندا لايىقتى باعاسىن الادى.
وسى ورايدا بۇگىن ءبىز كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ انەستەزيولوگيا، رەانيماسيا جانە قارقىندى تەراپيا بولىمشەسىندە 9 جىلدان بەرى جۇمىس ىستەپ كەلە جاتقان كلينيگتىك قىزمەتىنىڭ مامانى ايدا نۇسىپبايەۆا تۋرالى ءسوز قوزعاعىمىز كەلەدى.
كلينيكانىڭ كەز كەلگەن بولىمشەسىندە، اسىرەسە رەانيماسيادا سانيتاردىڭ جۇمىسى وتە اۋىر. بۇل - تازارتۋ جۇمىستارى، توسەك-ورىن اۋىستىرۋ، قوقىس شىعارۋ، ءتۇرلى شارۋاشىلىق جۇمىستار، مەيىرگەرلەرگە كومەكتەسۋ عانا ەمەس، سونىمەن قاتار اۋىر، توسەك تارتىپ جاتقان ناۋقاستارعا كۇتىم جاساۋ جانە ت.ب.
ايدا – جاۋاپكەرشىلىگى مول، ەڭبەكقور، قامقور جان. ول ەمپاتيا، جاناشىرلىق، ادامدارعا كومەكتەسۋگە دايىن بولۋ، ۇقىپتىلىق، تارتىپتىلىك سياقتى قاراپايىم ادامي قاسيەتتەرىمەن ەرەكشەلەنەدى.
“كلينيگتىك قىزمەت ماماندارىنىڭ ارنايى بىلىمدەرى بولۋى كەرەك. ايدا اتتەستاسيادان وتكەن، سەرتيفيكاتتالعان مامان. ول “مەديسينالىق مەكەمەلەردەگى كاسىبي كلينيگ: تەوريا جانە تاجىريبە” اتتى ءتيىستى دايىندىقتان ءوتتى. ايدا وتە مەيىرىمدى، جيناقى جانە پىسىق. سوندىقتان دا ول ءاردايىم ابىرويلى”، — دەيدى ينستيتۋتتىڭ كلينينگتىك قىزمەت ءبولىمىنىڭ مەنەدجەرى گۇلنار قويلىبايەۆا.
كەيىپكەرىمىز بيىل مەديسينا قىزمەتكەرى كۇنى ادال ەڭبەگى ءۇشىن الماتى قالاسى المالى اۋدانى اكىمىنىڭ قۇرمەت گراموتاسىمەن ماراپاتتالدى.
حالىق دانالىعى: «تازالىق – دەنساۋلىق كەپىلى» دەيدى. كەز كەلگەن مەديسينالىق ۇيىم سانيتارلىق-ەپيدەميولوگيالىق رەجيمگە باعىنادى. ولاردىڭ ءارقايسىسى پاسيەنتتەر ءۇشىن عانا ەمەس، سونىمەن قاتار قىزمەتكەرلەر ءۇشىن دە ءقاۋىپسىز، تازا ورتانى قامتاماسىز ەتۋى كەرەك. بۇعان كەيىپكەرىمىز ايدا نۇسىپبايەۆانىڭ دا زور ۇلەسى بار.
تاعى ءبىر ايتا كەتەرلىگى، ايدا ەكى بالانىڭ اياۋلى دا ارداقتى اناسى، سۇيىكتى دە سۇيكىمدى، ادال، قامقور جار، وتباسىنىڭ ۇيتقىسى جانە بەرەكەسى.